PAPANAGUTIN ng Police Regional Office 6 (PRO6) ang Iloilo St. Pauls Hospital sa lungsod ng Iloilo matapos makatakas ang nakaratay na mayoralty bet na suspek sa pagpaslang sa bise alkalde ng Mambusao, Capiz na si Abel Martinez.
Sa panayam kay PRO6 director C/Supt. Agrimero Cruz Jr., kasong administratibo at kriminal ang maaaring isampa sa pamunuan ng ospital matapos nabigo ang mga pulis na maisilbi ang warrant of arrest sa suspek na si Leodegario Jun Labao Jr. na naka-confine dito.
Ngunit nilinaw naman ni Cruz na ito ay depende pa sa kanilang makakalap na ebidensya.
Ani Cruz, kapag napatunayan aniya na pinatakas ng ospital ang suspek sa kanilang intensive care unit (ICU), malaki ang kanilang magiging pananagutan.
Napag-alaman na nadismaya ang mga pulis dahil mistulang hinarang sila o inantala ng ospital ang kanilang operasyon sa pag-serve ng warrant of arrest sa suspek kaya’t tuluyan itong nakatakas.