RIZAL – Arestado sa isang follow-up operation ng pulisya ang dalawang kilabot na holdaper matapos nitong pasukin ang isang bahay at holdapin ang magka-ka-live-in sa bayan ng Rodriguez.
Kinilala ni Rizal PNP director P/Sr. Supt. Rolando Anduyan ang mga suspek na sina Michael Fider, 30 anyos, binata, residente ng Tibag 1, Brgy. Burgos at Dondi Flores, 37, binata, residente ng Sitio Curayos, ng nasabi ring lugar.
Positibong kinilala ang mga suspek ng mga biktima na sina Raquel Cabudoc, 34 anyos, at livein partner nitong si Florante Chavez, 35, kapwa residente ng Libis, Tibag 2, Brgy. Burgos, ng nasabi pa ring bayan.
Sa ulat, naganap ang insidente dakong ala-1:00 ng madaling araw sa loob ng bahay ng mga biktima.
Nabatid na pinasok ng mga suspek ang bahay ng mga biktima na pawang armado ng patalim at saka nagdeklara ng holdap at saka tinangay ang mamahaling cellphone at P14,500 cash.
Kaagad namang nagreklamo sa himpilan ng pulisya ang mga biktima at sa tulong ng mga impormante ay natukoy at naaresto ang dalawang suspek.
Kasong robbery ang inihahandang kaso ng pulisya laban sa dalawang suspek na pansamantalang nakadetine sa lock-up jail ng Rodriguez Police Station.