TODAS ang isang paralisadong lola nang hindi makalabas sa kanyang bahay na nasusunog sa Cebu province nitong Martes ng hapon (Abril 23).
Bagamat nailagay na agad ng mga firefighters ang sunog sa kanilang kontrol sa loob lamang ng dalawang minuto, huli na para masagip pa ang biktimang si Estrella Panuncia, 60-62 anyos, residente ng Minglanilla town sa Cebu province. Namatay si Panuncia sanhi ng suffocation sa loob mismo ng kanyang kinararatayan na kuwarto.
Naganap ang insidente dakong alas-tres nitong Martes ng hapon sa ikalawang palapag ng bahay ng biktima sa Deca Homes subdivision sa Tungkil village.
Sa inisyal na ulat, lumalabas na nag-overheat na electric fan ang sanhi ng sunog.
Sa Metro Manila, may P100,000 ari-arian ang nasira nang magsiklab ang sunog sa isang residential area sa Project 3, Quezon City nitong Martes din ng gabi.
Sinabi ng arson investigators na nagsimula ang sunog dakong 8:20 p.m. sa bahay ng isang Rosalinda Alcala, na umano’y sanhi ng paglalaro ng posporo ng 3-anyos na anak nito.