NASA malubhang kalagayan ngayon sa ospital ang isang lalaki matapos saksakin ng kanyang kalugar habang naglalakad sa Caloocan City, Huwebes ng hapon.
Ginagamot sa Tondo General Hospital si Robert Angeles, 31-anyos, taga-Maypajo ng lungsod, sanhi ng dalawang saksak sa likod.
Pinaghahanap naman ng mga pulis ang suspek na si Michael Robles, nasa hustong gulang at kalugar ng biktima.
Sa ulat, dakong alas-5:30 ng hapon, naglalakad papauwi sa Sawata, Maypajo, ng lungsod ang biktima nang lapitan ng suspek na armado ng patalim.
Nang makita ni Angeles ang suspek ay tumakbo ito subalit hinabol ng huli.
Nang maabutan ng suspek ay dalawang beses na sinaksak nito sa likod ang biktima.
Matapos ang ikinasang krimen ay tumakas ang suspek habang dinala naman ang biktima sa pagamutan.
Inaalam na kung ano ang motibo sa pananaksak.