TODAS ang isang tambay matapos tarakan sa kili-kili ng lalaking nag-akusa sa kanya na masamang tumingin sa Tondo, Maynila.
Dead on arrival sa Gat. Andres Bonifacio Medical Center si Ramil Quinio Y Garcia, 27-anyos, binata at taga-Kagitingan St., Tondo, sanhi tinamong saksak sa kaliwang kili-kili.
Tumakas naman ang suspek na si Rolando Panlilio Y Aguilar, 24-anyos, vendor at residente ng Paghanapin St., Tondo, bitbit ang ginamit na patalim.
Batay sa ulat ni Det.Richard Escarlan, kay P/Insp. Steve Casimiro, hepe ng Manila Police District-Crime Against Persons Investigation Section dakong 2:30 kahapon ng hapon nang maganap ang nasabing krimen sa harapan ng isang barbershop sa 1004 Kagitingan St., sa Tondo.
Nauna rito, nakikipagtalo si Quinio sa kanyang tiyahin na si Imelda Quinio, 57-anyos, nang mapadaan ang suspek sa lugar.
“Bakit ang sama mong tumingin ahh”. sabi ng suspek patungkol sa biktima.
Kasabay ng litanya, nagbunot ng patalim ang suspek at walang sabi-sabing tinarakan ang biktima.
Matapos ang pananaksak ay mabilis na tumakas ang suspek habang naiwang nakahandusay ang duguang biktima.
Ilang tambay naman sa lugar ang nagmagandang loob na isinugod ang biktima sa naturang pagamutan, subalit idineklara itong dead on arrival.