NAKAPIRING pa ang mata ng ng isang ‘di nakilalang lalaki na hinihinalang biktima ng summary execution na nagtamo ng tatlong tama ng bala sa ulo at natagpuan kaninang madaling-araw sa ibabaw ng Nagtahan-Zamora bridge sa Beata, Pandacan, Maynila.

Inilarawan ni PO2 Dennis Turla ng Manila Police District-Homicide Section (MPD-HS) ang biktimang nasa edad 35-40, may taas 5’4, katamtaman ang pangangatawan, naka-puting t-shirt at checkered na shorts.

Ayon sa testigong si Erick Perez, alas-4 ng madaling-araw nang madaanan nito ang duguang bangkay ng biktima na nakadapa sa tulay kaya kaagad niyang ipinagbigay-alam kay Barangay Chairman Armando Ferrer, ng Bgy. 865 Zone 94 na itinawag sa MPD-HS para sa kaukulang imbestigasyon.

Hinala ng pulisya na buhay pa ang biktima nang dalhin ng kanyang mga killer sa ibabaw ng tulay at doon binaril.

Samantala, nilagyan naman ng duck tape ang buong ulo, kamay at paa ng isa pang hinihinalang biktima ng salvage na natagpuang lumulutang sa Manila Bay sa may Sitio Damayan, Bgy. 105 NHA, R-10, Tondo, Maynila kagabi.

Tinatayang nasa edad na 30-35 ang biktima, naka-puting t-shirt, itim na pantalon at itim na sapatos.

Sa report ni SPO3 Rodelio Lingcong, may nakita ring sugat sa dibdib at namamaga na ang katawan ng biktima na hinihinala ng mga awtoridad na sinalvage.

Dinala ang bangkay sa St. Rich Funeral, habang ang unang bangkay ay dinala naman sa Arch Michael Funeral Homes para sa awtopsiya at safekeeping. JOCELYN TABANGCURA-DOMENDEN

BINISTAY ng bala ang 40-anyos na kilalang drug pusher ng dalawang hindi pa nakikilalang armadong lalaki kung saan hinihinalang nagkaonsehan ang mga ito sa iligal na droga kaninang madaling araw sa Parañaque City.

Idineklarang dead on arrival sa Protacio Medical Hospital ang biktimang si Romeo De Jesus, may asawa, walang trabaho, ng Riverside 1 Bgy. Tambo nang nasabing lungsod sanhi ng mga tama ng bala ng kalibre 45 baril sa ibat ibang parte ng katawan nito.

Inaalam naman ng pulisya ang pagkakakilanlan ng dalawang suspek na armado ng kalibre .45 na baril at sakay ng isang kulay pulang motorsiklo na hindi naplakahan na agad tumakas matapos ang pamamaril sa biktima.

Sa imbestigasyon ni PO2 Johnny Margate ng Station Investigation and Detective Management Section ng Parañaque City Police, alas-2 ng madaling-araw nang maganap ang insidente sa tapat ng bahay ng biktima sa Riverside 1 Bgy.  Tambo nang nasabing lungsod.

Nauna rito, nakatayo umano ang biktima sa harapan ng kanilang bahay nang sumulpot ang mga suspek sakay ng isang motorsiklo at walang sabi sabing pinagbabaril ang nauna.

Sa dami umano ng bala na ibinaon sa katawan ng biktima ay nagmistulang ulap ang kapaligiran sanhi ng makapal na usok mula sa mga pinaputok na baril ng mga suspek.

Nang duguang humandusay ang biktima ay agad na tumakas ang mga suspek kung saan agad na isinugod sa pagamutan ang nauna ngunit hindi na ito umabot nang buhay.

Batay sa nakuhang impormasyon ng pulisya, hindi umano nakapag-remit ang biktima sa mga pinagbentahan umano nito ng mga iligal na droga kaya’t tinambangan na ito ng mga suspek.

Samantala patuloy na nagsasagawa ng masusing imbestigasyon ang mga awtoridad hinggil sa nasabing insidente. JAY REYES

BINULABOG ng bomb threat ang Miriam College sa Katipunan Avenue, Quezon City kaninang hapon, Oktubre 9, 2014.

Bunsod nito, sinuspinde ang pasok ng mga mag-aaral sa naturang paaralan.

Ito’y makaraang makatanggap ng text message sa cellphone number +63939593856409 ang isang Brenda Puresa, president ng student council ng naturang paaralan, alas-12:08 ng tanghali na may bombang sasabog sa paaralan.

“Magandang umaga Miriam college may surpresa ang grupo namin para sa inyo, faculty staff at lalo na ang mga estudyante, makinig kayo. May tinago kaming mga pasabog sa campus ninyo. Hanapin n’yo kung makikita n’yo pero sigurado ako bago niyo mahanap napasabog na namin. Dadanak ang dugo sa Katipunan, maraming mamamatay at mga pangarap ang mga bata at magulang ang masisira pakiabangan ang mga estudyanteng hinuhuthutan ninyo,” ayon sa nagpadala ng text message.

Bunga nito, agad namang rumesponde sa lugar ang bomb squad unit ng Quezon City Police District (QCPD) at Anonas police.

Makaraang mahalughog ang mga lugar sa paaralan, ganap na alas-2:30 ng hapon ay idineklara ng pulisya na ligtas na ang lugar matapos magnegatibo sa bomba ang paaralan. SANTI CELARIO

LUMUTANG ang isa pang suspek sa pagpatay sa ina ng aktres na si Cherry Pie Picache sa tanggapan ng National Bureau of Inveatigataion (NBI) upang magbigay ng kanyang pahayag sa krimen.

Nauna nang inginuso na suspek na si Michael Flores si Sherwin Ledesma alyas “Weng” na siyang pangunahing suspek at pumatay sa biktimang si Zenaida Sison.

Kusang loob umanong nagtungo sa NBI si Ledesma upang linisin ang kanyang pangalan.

Matatandaang matapos maaresto si Flores sa Laguna ay sinabi nitong kasama niya si Ledesma  sa panloloob sa bahay ni Sison noong madaling-araw ng Setyembre 19.

Kinumpirma naman ni Ledesma na kilala niya nang personal si Flores pero wala siyang kinalaman sa krimen at sa katunayan, hindi rin niya alam na nagtatrabaho si Flores kay Sison.

Nagulat at nagalit nga raw siya nang idawit siya ni Flores sa krimen.

Sa ngayon ay hindi pa tiyak ng ahensya kung kakasuhan si Ledesma dahil maliban sa salaysay ni Flores na nagdadawit sa kanya sa krimen, wala namang matibay na ebidensya na sangkot siya sa panloloob at pagpatay.

Nabatid na hanggang hindi pa tapos ang isinasagawang imbestigasyon ng NBI mananatili si Ledesma sa ahensya.

Nalaman na kinuhanan na si Ledesma ng fingerprint at footprint.

Una na ring iginiit ni Flores sa Quezon City Police na tinulungan lamang niya si Weng at kasama nito para makapasok sa bahay ni Sison at hindi umano siya ang pumatay sa matanda kundi si Weng. JOCELYN TABANGCURA-DOMENDEN

HINIHINALANG droga ang pangunahing motibo sa pag-ambush na ikinamatay ng isang lalaki at pagkakasugat sa anim na iba pa sa Imus, Cavite.

Kinilala ang napatay na si Isnahaya “Durian” Pangandapon.

Kasama ito sa grupo ng konsehal ng barangay na si Bami Adjihasis na lulan ng isang Toyota Innova (WQD-945).

Ayon kay Police Sr. Supt. Joselito Esquivel, Huwebes ng madaling-araw, nang magkasa sila ng operasyon para tugisin ang lider ng Macatiwas group na si Macatiwas Misug na nagsilbing witness ang konsehal.

Hapon, pauwi na galing ng istasyon ng pulis si Adjihasis nang tambangan sa tapat ng Robinson’s Imus sa Aguinaldo Highway.

Napatay si Durian Pangandapon habang sugatan si Adjihasis pati ang iba pang kasamang sina Haifah Hadjiasis, Hadji Raihana Makalangan, Inocaya Pangadapon, Jamael Hadjitaha at Jeffrey Sanchez.

Ayon sa driver na si Jamael Hajitaha, bigla na lang silang pinagbabaril ng mga hindi kilalang suspek.

Una nang napaulat na dalawa ang napatay sa pananambang.

Pinabulaanan naman ng hepe ng Cavite Police na may koneksyon ang insidente sa EDSA hulidap.

Batay sa ulat, talamak ang bentahan ng droga sa Bgy. Datu Esmael at nakatira ang mga biktima ng ambush kaya ito ang posibleng dahilan ng krimen. JOHNNY ARASGA

MAGSILBI sanang babala sa mga non-performing officials ng Philippine National Police (PNP), ang ginawang pagsibak sa apat na district directors ng National Capital Region Police Office (NCRPO), kaugnay sa hulidap incident sa EDSA.

Sinabi ni Philippine National Police (PNP-PIO) Chief Superintendent Wilben Mayor, na mahigpit ang kautusan ni Department of Interior and Local Government (DILG) Secretary Mar Roxas na ipatupad ang pamantayan sa promosyon at demosyon ng bawat pulis.

Sinabi nito, kailangang maipakita ng mga ito na mayroon silang ginagawa para mapababa ang kriminalidad sa kanilang nasasakupan.

Binigyang-diin ni Mayor na kapag hindi nakatugon sa performance system ang isang pulis, walang dahilan para manatili pa ang mga ito sa kanilang posisyon. JOHNNY ARASGA

SUBMITTED na for resolution ang kaso ng pagpatay kay College of Saint-Benilde student Guillo Ceasar Servando.

Ayon kay Assistant State Prosecutor Stuart Allan Mariano, Chairman ng panel, natapos na nila ang desisyon sa kasong paglabag sa Anti-Hazing Law laban sa mga miyembro ng Tau Gamma Phi Fraternity na responsable sa pagkamatay ni Guillo.

Mayroon na lamang aniya silang pinag-uusapang ilang issue sa kaso at agad namang isasapinal at isusumite ang desisyon kay Prosecutor-General Claro Arellano.

Inaasahan na sa mga susunod na araw ay ilalabas na ng panel ang kanilang hatol laban sa mga akusado sa oras na matapos ni Arellano ang pag-review sa resolusyon ng prosecutors sa kaso.  JOHNNY ARASGA

PATAY ang mister habang sugatan naman ang misis nito matapos pagbabarilin sa harap ng kanilang tindahan kagabi sa Baseco Compound, Port Area, Maynila.

Idineklarang dead-on-arrival sa Gat Andres Bonifacio Medical Center (GABMC) ang biktimang si Antonio Biong, 49, vendor ng Blk. 1 Row 11, Unit 81, Habitat Baseco Compound, Port Area, Manila habang nagtamo naman ng daplis ng bala sa binti ang kanyang misis na si Annabelle, 55.

Sa report ni PO3 Cris Ocampo ng Manila Police District-Homicide Section (MPD-HS), naganap ang insidente alas-8:30 ng gabi sa palengke ng Baseco, Port Area, Maynila.

Nauna rito, nagtitinda ang mag-asawa nang lumapit at nagpanggap na kustomer ang suspek na inilarawan na nasa edad 20-25, naka-puting t-shirt at saka binaril nang malapitan ang biktima.

Gayunman, naglalaro umano ng games sa cellphone ang biktima habang katabi nito ang kanyang misis kaya hindi nito napansin ang pakay ng suspek.

Hindi naman nakilala ni Annabelle ang suspek dahil malabo na ang kanyang mata.

Dinala ang bangkay sa St. Rich Funeral para sa awtopsiya habang patuloy ang imbestigasyon ng pulisya para matukoy ang pagkakilanlan ng suspek. JOCELYN TABANGCURA-DOMENDEN

DINAKMA ng isang dating mental patient ang dibdib ng babaeng turista na nagbibilad sa araw sa Boracay kaninang umaga, Oktubre 10.

Nakakulong na ngayon sa Boracay Tourist Assistance Center (BTAC) detention cell at nahaharap sa kasong acts of lasciviousness ang suspek na si John Mervin Jerson, 28, tubong Antique.

Sa ulat, naganap ang insidente dakong 8:45 ng umaga sa front beach resort Station 3 sa isla ng Boracay.

Ayon sa biktima na isang Singaporean national na hindi nakuha ang pangalan, nagbabasa siya ng magazine habang nakahiga sa buhangin at nakasuot lamang ng two piece bikini nang hilingin ng suspek na makibasa sa kanyang hawak na magazine.

Dahil hindi kakilala, tumanggi ang biktima pero biglang dinakma ng suspek ang kanyang dibdib at pinisil-pisil pa.

Nakatakbo naman agad ang biktima at nakapagsuplong sa BTAC kaya naaresto agad ang suspek.

Sa presinto, sinabi ng suspek na hindi na baleng makulong siya, ang mahalaga ay nahawakan niya ang malulusog na dibdib ng biktima.

Sa imbestigasyon ng pulisya, napag-alaman na may diperensya sa pag-iisip ang suspek dahil dati na itong nakulong sa rehabilitation center ng Pototan Mental Hospital sa Pototan, Iloilo. ROBERT TICZON

KALABOSO ang isang lalaki matapos mahulihan ng shabu matapos masita dahil sa walang suot na helmet habang nakamotorsiklo sa Valenzuela City, Sabado ng umaga, Oktubre 11.

Kinilala ang suspek na si Carlos Santiago Jr., 37 Santiago st., Malanday, nasabing lungsod.

Sa ulat, alas-11 ng umaga, nagsasagawa ng checkpoint ang mga pulis sa MacArthur highway, Malanday nang padaanan ang suspek na walang suot na helmet habang sakay ng motorsiklo na naging dahilan upang sitahin.

Nang kapkapan ay nakuhanan ng isang sachet ng shabu na naging dahilan upang dalhin sa presinto at sampahan ng mga kaukulang kaso. Rene Manahan

UPANG mapulbos nang tuluyan, mahigit 2,000 sundalo ang ipinadala sa Sula para tumulong sa paghabol sa mga bandidong Abu Sayyaf Group (ASG) na  may hawak sa 12 bihag kabilang ang limang dayuhan.

Mismong si Armed Forces of the Philippines (AFP) chief Gregorio Pio Catapang, ang dumayo sa Sulu upang makipagpulong ukol sa aksyon kontra sa ASG members partikular sa tumataas na insidente ng kidnapping doon.

Pitong batalyon na ng sundalo ng Philippine Marines at Army ang nasa lalawigan pero posible pa itong dagdagan nang mapabilis ang pagtugis sa mga Abu Sayyaf na naka-puwesto sa kabundukan.

Bukod sa mga sundalo, nagpadala na rin ng K-9 units ang military para tumulong sa paghahalughog sa tinataguan  ng mga bandido.

May ipaparating din na tropa ng Special Forces ang Philippine Army na dinisenyo ang taktika sa pakikipagsagupa sa kabundukan at gubat.

Ngayong Lunes, inaasahang makikipagpulong si Catapang sa crisis management committee ng lalawigan ngunit dahil hindi ito matutuloy ay bumisita na lang ito sa tropa ng militar sa probinsya. Robert Ticzon

KALABOSO ang 25-anyos na Korean national nang gulpihin ang kanyang ex-girlfriend sa loob ng isang Korean restaurant, matapos tumangging makipagbalikan sa kanya sa Malate, Maynila.

Basag ang ngipin, at puno ng pasa at sugat sa katawan ang biktima na si “Joy” nang magtungo sa tanggapan ng Manila Police District-Women and Children Protection Desk.

Sa reklamo ng biktima, hinawakan siya ng mahigpit sa braso habang sinisikmuraan at tuhurin sa mukha ng suspek na si Jung Jiwoong, pansamanatalang nanunuluyan sa Adriatico Gardenia Tower, sa Adriatico St., Malate.

Naganap ang insidente ng pananakit alas-6:50 ng umaga ng Biyernes sa loob ng Jongloo Korean Restaurant, sa J. Bocobo St., Malate.

Sa salaysay ng biktima, alas 2:30 ng madaling araw nang magtungo sa pinapasukang KTV Bar sa Malate ang suspek at niyayaya siyang uminom na kanya namang pinaunlakan kaya nagtungo sila sa kalapit na  Korean restaurant.

Habang sila ay umiinom at nag-uusap, pilit ibinabalik ng suspek ang kanilang relasyon na tinanggihan ng biktima.

Ikinagalit naman ito ng suspek hanggang sa magkasigawan at saktan na nito ang biktima. Jocelyn Tabangcura-Domenden

MAKARAANG magsawa sa kaseselos ng misis, nagpakamatay ang isang mister sa pamamagitan ng pabaril sa sarili sa Andrada Subdivision, Barangay Banica, Roxas City kaninang umaga.

Hindi naman makapaniwala si Sally Alis na magpapakamatay ang kanyang mister na si Romeo Alis, nagbaril sa ulo gamit ang .38 caliber revolver.

Ayun sa anak ng mag-asawa na si Melvin, halos araw araw nag-aaway ang kanyang magulang dahil sa pagseselos ng ina at pagduda na may ibang babae ang ama.

Ilang araw bago ang pangyayari ay nagkwentuhan pa ang mag-ama at umamin ang biktima na gusto na niyang magpakamatay dahil nagsasawa na sa araw araw nilang pag-aaway ng misis na selos ang parating pinagmulan.

Napag-alaman na pupunta sana sa kanilang palaisdaan si Romeo nang humarang sa daan ang misis kaya nagdesisyon itong ipagpaliban ang lakad at sa halip ay pumunta sa kusina naupo sa upuan at ipinutok ang baril sa ulo. Gina Roluna

KAHIT gumagawa na ng kabutihan ang gobyerno, hindi pa rin nakaligtas mula sa mga kawatan ang ilang mga marker ng Philippine Institute of Volcanology and Seismology (PHIVOLCS) sa paligid ng nag-aalburotong bulkang Mayon.

Ayon sa report, sinira at ninakaw ang mga bakal sa mga marker na nagsisilbing panukat ng PHIVOLCS sa pag-alsa ng lupa sa paligid ng bulkan.

Mabuti na lamang at mabilis itong natuklasan ng mga taga-ahensya kaya’t naayos ito agad.

Samantala, balak na ngayon ng pamahalaang panlalawigan ng Albay na huwag nang pabalikin ang mga residenteng nakatira sa permanent danger zone sa paligid ng bulkang Mayon.

Ito ang nakikitang paraan ni Albay Governor Joey Salceda upang hindi na magkaproblema ang gobyerno sa paglalaan ng pondo sa tuwing may pangangailangan na ilikas ang mga residente roon.

Gayunman, dahil sa mangangailangan ng mahigit P3-bilyong pondo, partial relocation muna ang gagawin ng Albay provincial government dahil sa hindi pa nito kaya sa ngayon ang magsagawa ng full at permanent relocation. JOHNNY ARASGA

UMAABOT na sa 40 katao ang sugatan dahil sa patuloy na pananalasa ng Typhoon Vongfong sa Japan, na galing sa Pilipinas.

Ayon sa Japan Meteorological Agency (JMA), inaasahang magla-landfall ang naturang bagyo sa Kyushu island ngayong araw.

Matinding ulan ang hatid ng bagyo sa Japan, sanhi ng pagbaha sa mga apektadong lugar.

Batay sa forecast, asahan ang 80 millimeters na ulan sa mga lalawigan sa Japan na nasa Pacific coast.

Mamayang gabi, asahan naman ang 500 millimeters na ulan sa Shikoku island habang 300 millimeters naman sa Kyushu.

Wala pa ring suplay ng koryente sa mga isla ng Okinawa at Kadena na unang hinagupit ng bagyo.

Umaabot na sa halos 400,000 katao ang inilikas.

Nakansela naman ang higit 400 biyahe ng eroplano dahil pa rin sa pananalasa ng typhoon Vongfong.

Shutdown naman ang mga tren ngayong araw dahil sa malakas na bagyo. JOHNNY ARASGA

BINABAKLAS na ng mga awtoridad sa Hong Kong ang mga barikada ng raliyista.

Unang nilinis ng pulisya ang mga barikada sa Admiralty district at mayroon din sa Mongkok.

Ayon sa pulisya, walang kilos-protesta sa site at nais na bawiin ang kontrol sa government property.

Nabatid na dalawang linggo nang naparalisa ang malaking bahagi ng Hong Kong dahil sa kilos-protesta.

Kahapon ay sinabi ni Hong Kong leader Leung Chun-ying na “almost zero” ang tiyansa na pagbigyan ng China ang hiling ng mga nagpoprotesta na ganap na kalayaan sa pagpili ng lider.

Sinabi ni Leung na gagamit ang pulisya ng “minimum amount of force” sa pagtanggal sa mga barikada. MARJORIE DACORO

LAOAG CITY, ILOCOS NORTE – Like father, like son.

Ito’y matapos pagtulungang pagtatagain hanggang sa mamatay ng mag-ama ang isang lalaki sa Bgy. Bengcag, Laoag City, nasabing lalawigan.

Kinilala ang mga suspek na sina Christopher Pimentel, Sr. at Christopher Pimentel, Jr., ng Dingras, nasabing bayan.

Samantala, kinilala ang biktima na si Ferdinand Domingo, 32, ng Bgy. 7, San Gabriel, San Nicolas, Ilocos Norte.

Ayon sa pulisya, ang biktima, kasama ang ilang mga kaibigan ay nagpunta sa isang karinderya upang bumili ng maiinom.

Pero nilapitan sila ng mag-ama saka pinagtataga. ALLAN BERGONIA

BANGUI, ILOCOS NORTE – Nang dahil sa “selfie”, isang dalaga ang namatay matapos malunod sa dagat ng Bangui, nasabing lalawigan.

Kinilala ng Bagui police ang biktima na si Cheska Agas, 19, nasabing bayan.

Sa imbestigasyon, kasama ang anim na kaibigan ay nagtungo sila sa beach sa Bgy. Masikil at doon ay nagkuhanan ng picture.

Nag-“sellfie” ang biktima sa tabi ng dagat pero nang nahagip ng malaking alon ay kasama siyang inanod.

Ang insidente ay nangyari malapit sa famous na Bangu windmills. ALLAN BERGONIA

ARESTADO ang isang pekeng pulis at dalawang kasamahan nito sa isang dragnet operation sa Quezon City kaninang madaling-araw, Oktubre 13, Lunes.

Kinilala ni bagong Quezon City Police District (QCPD) Director Police Senior Superintendent Joel D. Pagdilao ang suspek na si Rodel Tojoy, 24, tubong Masbate, security guard ng Purok 3, Bgy. Turbina, Calamba City, Venjamin Ibañez, 19, Bgy. Matandang Balara at Kevin Ebasabal, 27, ng Greenland Subdivision, Vinuya, San Mateo, Rizal.

Ayon sa ulat, dinakip si Tojoy ng mga pulis sa isang checkpoint matapos magpakilalang pulis, na nakagupit police officer, naka-itim na jacket na “PULIS”, may posas, at nahulihan ng isang hindi lisensyadong cal. 38 na baril na may mga bala.

Sinabi sa ulat na nagsasagawa ng checkpoint ang mga operatiba ng Quezon City Police station 10 – Kamuning dakong 12:35 ng madaling-araw nang sitahin ng mga ito ang walang plakang motorsiklo ng suspek sa Bgy. Don Manuel, QC.

Subalit sa halip na huminto ay matulin pa rin pinatakbo ng mga suspek ang kanilang motorsiklo dahilan para habulin at arestuhin ang mga suspek.

Nadakip ang mga suspek sa kahabaan ng Scout Tobias corner Dr. Lazcano St., Bgy. Laging Handa, QC. SANTI CELERIO

PATAY ang tatlong mga bata habang kritikal naman ang kanilang mga magulang matapos malason sa kinaing pawikan sa lalawigan ng Sorsogon.

Kinilala ang mga biktima na sina, Jovelyn, isang taon at anim na buwan gulang, Jose Bernard, 5, at Jacob Alun, habang ang mga magulang ay kinilalang sina Pio at Teresa Alun, ng bayan ng Irosin sa nasabing lalawigan.

Ayon sa imbestigasyon, binili umano ang nasabing pawikan sa isang tindero ng isda.

Matapos kainin, dumaing na nang pananakit ng tiyan ang tatlong mga bata.

Agad namang dinala ang magkakapatid sa ospital pero hindi na naisalba pa ang kanilang buhay.

Sa ngayon, nananatili pa sa ospital ang mga magulang ng mga bata at patuloy na ginagamot.

Patuloy naman ang imbestigasyon ng mga awtoridad sa nasabing pangyayari. MARJORIE DACORO