NABUKO ng Armed Forces of the Philippines (AFP) ang tangkang pag-rescue ng mga Abu Sayyaf sa loob ng Reformatory Center sa Zamboanga City.

Sa nakalap na impormasyon, kinumpirma ni AFP spokesperson Col. Restituto Padilla na pinaplano ng mga bandidong Abu Sayyaf (ASG) na magsagawa ng rescue operation sa loob ng Zamboanga City Reformatory Center kung saan nakakulong ang kapatid ni ASG leader Furuji Indama na si Bensar Indama.

Sinabi ni Padilla na mismo ang mga detainees ang nagbigay ng impormasyon bukod sa intelligence unit na tinitiktikan ang galaw ng grupong Abu Sayyaf.

Giit pa ni Padilla, matagal na umanong pinaplano ng ASG ang rescue operation subalit dahil sa matinding pagbabantay at monitoring ng militar kaya hindi naisagawa ang kanilang plano.

Noong Lunes, Enero 19, nasabat ng mga Jail guards ang mga bala at armas na tangkang ipuslit sa loob ng kulungan kaya napigilan ang planong rescue operation.

Dagdag pa ni Padilla, sa ngayon ay nakaalerto ang buong Zamboanga Peninsula Region partikular ang Zamboanga City dahil sa planong rescue operation.

Sinabi ni Padilla na desidido umano si Furuji Indama na i-rescue ang kanyang kapatid sa loob ng kulungan anoman ang mangyari.

Inihayag ni Padilla na sa ngayon mayroon ng request para ilipat sa mas secured na kulungan ang mga tinaguriang high profile inmates.

Samantala, tiniyak ng AFP sa pamamagitan ng Western Mindanao Command na todo ang kanilang koordinasyon at suporta sa PNP sa region 9 ng sa gayon mapanatili ang peace and order sa lugar at rehiyon. JOHNNY ARASGA

SAPUL sa ulo ang isang dentista nang pasadahan ng kilabot na riding-in-tandem sa Agusan del Sur nitong nakaraang Lunes ng gabi (Enero 20).

Namatay agad sanhi ng isang tama ng bala ng kalibre .45 sa kanang bahagi ng ulo ang biktimang si Dr. Owen Gonzaga-Fernando, 48, dating municipal dentist sa Agusan del Sur town.

Blangko pa ang pulisya kung sino ang nagpapatay sa biktima at kung ano ang motibo sa krimen.

Sa ulat, naganap ang insidente dakong 10:25 p.m. sa loob mismo ng bahay ng biktima sa Primland Subdivision, Purok Uno, Bgy. Poblacion.

Bago ito, nasa loob ng kanilang bahay ang biktima nang biglang asintahin sa ulo ng isa sa dalawang kalalakihan na sakay ng motorsiklo.

Nang bumulagta ang kanilang target, humarurot na ang mga salarin sa hindi malamang direksyon.

Dahil sa insidente, sumisigaw ng hustisya ang mga tao sa bayan ng Rosario, Agusan del Sur dahil kilalang mabait at matulungan ang biktima. ROBERT TICZON

PATAY ang isang 68-anyos na Bgy. Chairman nang ratratin ng riding-in-tandem habang papauwi galing sa barangay hall kamakalawa ng gabi sa Taguig City.

Namatay habang ginagamot sa Saint Luke’s Medical Center (SLMC) sa Bonifacio Global City (BGC) ang biktimang si Aurelio Paulino, ng Bgy. Lower Bicutan sanhi ng mga tinamong tama ng bala sa katawan mula sa hindi pa batid na kalibre ng baril.

Kasalukuyang inaalam pa ng mga awtoridad ang pagkakakilanlan ng dalawang suspek na agad tumakas sakay ng hindi naplakahang motrsiklo.

Sa isinumiteng ulat kay S/Supt. Arthur Felix Asis, hepe ng Taguig City Police, alas-9:30 ng gabi nang maganap ang insidente sa kahabaan ng Manuel L. Quezon Ave., Purok 3, Bgy. Lower Bicutan.

Nauna rito, naglalakad umano pauwi ang biktima mula sa kanyang duty bilang punong-barangay sa kanilang lugar nang biglang sumulpot ang mga suspek sakay ng motorsiklong walang plaka at walang sabi-sabing pinagbabaril ang biktima.

Duguang humandusay ang biktima habang mabilis na tumakas ang mga suspek.

Agad na dinala ng mga barangay tanod at tauhan ng rescue team ang biktima sa Taguig-Pateros District Hospital upang malapatan ito ng paunang lunas bago inilipat sa SLMC kung saan dito na siya binawian ng buhay.

Hinala naman ng pulisya na may kinalaman sa pagiging punong-barangay ng biktima ang dahilan ng ambush.

Inaalam ng pulisya kung may CCTV camera sa naturang lugar at kung nakuhanan ang naganap na krimen. JAY REYES

WALA umanong balak ang Japan na magbigay ng ransom money sa militanteng ISIS.

Ito’y sa kabila ng banta ng ISIS na pupugutan ng ulo ang kanilang dalawang Japanese hostages kung hindi magbabayad ng $200-million na ransom ang Japan.

Sa halip, nag-demand si Japanese Prime Minister Shinzo Abe sa ISIS na palayain kaagad ang mga hostages.

Ayon kay Abe, hindi susunod ang Japan sa mga terorista.

Nabatid na binigyan lamang ng ISIS ng 72-oras na ultimatum ang Japan para magbayad ng ransom. ROBERT TICZON

DAHIL sa umalingasaw na amoy, isang naaagnas na bangkay ng retiradong guro ang natagpuan sa loob ng kanyang bahay sa Quezon City kaninang umaga, Enero 21, 2015 Miyerkules.

Kinilala ang biktimang si Teodoro Ganapin, na nadiskubre ang bangkay dahil sa masangsang na amoy na nalanghap ng mga kapitbahay.

Nabatid kay SPO4 Rafael de Peralta, nadiskubre ni Marilyn Saclasa ang bangkay ng biktima dakong 9:00 ng umaga sa may loob mismo ng bahay ng huli sa no. 445 Binondo Lane, Bgy. Talipapa, QC.

Dahil umano sa mabahong amoy sa loob ng bahay ng biktima ay sumilip sa bintana si Saclasa hanggang sa makita nito ang nakahandusay na katawan ng biktima habang nagkalat naman ang gamit sa kuwarto nito.

Agad na ipinagbigay-alam ni Saclasa ang insidente sa barangay na mabilis namang rumesponde kung saan natagpuan ang kalunos-kunos na bangkay ng biktima na pawang nakagapos ang mga kamay at paa.

Hinala ng otoridad na pagnanakaw ang ugat ng insidente dahil sa nagkalat na gamit sa loob ng bahay ng biktima.

Inaalam pa ng mga otoridad kung may sugat ang biktima dahil sa nasa state of decomposition na ang katawan nito. SANTI CELARIO

SASAMPAHAN ng multiple murder with multiple frustrated murder si Iligan City Mayor Celso Regencia at 16 na iba.

Kasunod na rin ito ng resulta ng imbestigasyon ng Special Investigation Task Group (SITG) Congressman Belmonte sa pananambang sa convoy ni Iligan City Congressman Vicente Belmonte, Jr. sa Bgy. Gasi, Laguindingan, Misamis Oriental noong December 11, 2014.

Ipinabatid ni Senior Supt. Aurelio Trampe, Deputy Regional Director for Operations ng PNP-Region 10, na positibong itinuro ng mga testigo ang mga sangkot sa krimen.

Kabilang din sa kakasuhan si Amador Baler, may-ari ng baby armalite na ginamit sa grupo ni Dominador Tumala na una nang naaresto matapos makitang duguan at palaboy-laboy dalawang araw matapos ang krimen. JOHNNY ARASGA

SA patuloy na pagsugpo sa ipinagbabawal na gamot ng pinagsanib na puwersa ng Mabalacat PNP at PDEA-3, nagimbog ang isang barangay kagawad at isa pa na hinihinalang sangkot sa pagtutulak ng iligal na droga sa bayan ng Mabalacat, Pampanga.

Sa ulat sa tanggapan ni P/Ssupt. Rodolfo Recomono, Jr., Pampanga police provincial director, kinilala ang mga suspek na si Ernie Flake alyas “Flakes”, 52, may asawa, walang trabaho, at Allan Garcia alyas “Lan”, 53, may asawa,  Kagawad ng Bgy. Dolores.

Ayon sa imbestigasyon, dakong 4:00 ng hapon nang isagawa ang buy-bust operation sa Sitio Aguso, Bgy. San Francisco, ng may magpanggap na poseur buyer sa mga ito kung saan nakumpiska ang tatlong plastic heat-sealed sachet na hinihinalang shabu na ‘di pa batid ang timbang, isang 9mm pistol, isang magazine at walong pirasong bala at P1,000.00 marked money.

Kasong paglabag sa Section 5 and 11, ng Art. II ng R.A. 9165 at Violation of R.A. 8294 (Illegal Possession of Firearms and Ammunitions) ang kakaharaping kaso ng mga ito na walang piyansang inerekomenda.

Sa ngayon ay nakapiit na ang dalawang suspek sa Mabalacat Municipal Police Station. GARY BERNARDO

DALAWA ang nalagas habang dalawa naman ang nasugatan nang magsuwagan ang dalawang sasakyan sa Dagupan City kaninang madaling-araw (Enero 22).

Kapwa dead-on-arrival sa pagamutan ang biktimang sina Willy Agsaway, nagmamaneho ng isang Sedan at isang Edison Meneses.

Sugatan naman at ngayon’y kapwa nasa kritikal na kondisyon ang nagmamaneho ng Mitsubishi Montero na si Mark Patrick Jacinto at pasahero ng kotseng si Jeffrey Agpalasim.

Sinabi ni Senior Inspector Joseph Sibayan, deputy chief ng Dagupan City police, naganap ang insidente dakong 1:25 a.m. sa Caranglaan district, Dagupan City.

Bago ito, kapwa tumatakbo sa magkabilang direksyon ang minamanehong SUV ni Jacinto at ang Sedan na dala naman ni Agsaway.

Sa hindi pa malamang dahilan, biglang nagsuwagan ang dalawang sasakyan at sa lakas ng banggaan ay naipit ang halos lahat ng biktima.

Nahirapan naman ang mga rescue team na saklolohan ang mga biktima na naipit sa kani-kanilang sasakyan at gumamit pa ng bolt cutter para madala agad sila sa ospital. ROBERT TICZON

ARESTADO ang isang “tulak” at lider ng isang grupo ng Commando gang matapos inguso ng lima niyang naging kustomer sa ipinagbabawal na gamot, Sta. Ana, Maynila.

Kakasuhan ng paglabag sa Republic Act 9165, ang suspek na si Eric Gawat, 25, ng 2307 Medel St., Sta. Ana.

Ayon kay P/Supt. Robert C. Domingo, hepe ng Sta. Ana Police Station 6, nadakip sa buy-bust operation ang suspek ng mga tauhan ng Station Anti-Illegal Drugs ng MPD-PS6 sa ng kahabaan ng Suter at Medel Sts. Sta. Ana matapos siyang ituro ng kanyang naging kostumer sa pulisya.

Agad namang nagsagawa ng buy-bust ops ang mga awtoridad kaya nadakip ang suspek matapos magbenta ng droga sa isang nagpanggap na asset ng pulis. JOCELYN TABANGCURA-DOMENDEN

TULUYAN nang ibinasura ng Quezon City Prosecutors Office (QCPO) ang motion for reconsideration (MR) na isinampa ng biktima ng rape ng actor at TV host na si Vhong Navarro.

Sa resolusyon ni QC Prosecutor Donald Dee, dinismis ang hirit sa korte ng complainant na si Margarita “Mai” Fajardo na mapag-aralang muli ang kasong naisampa niya sa aktor.

Ayon sa korte, kulang sa probable cause ang mosyon na naisampa ni Fajardo bukod sa mistulang inulit lamang nito ang mga substantial argument na nagsasabing hinalay siya ng aktor.

Una nang na-dismiss ng QC court ang rape case na isinampa ni Fajardo kay Navarro.

“The motion of the complainant raises no new matter or substantial argument that would make the prosecutor’s office reverse the Oct 15, 2014 resolution that dismissed the rape charges against Navarro,” nakasaad sa resolusyon ni Dee.

Matatandaang si Fajardo ay isa sa mga nagsampa ng kasong rape kay Navarro na nauwi rin sa pagbasura sa kaso dahil sa kawalan ng matibay na ebidensya na nagdidiin kay Navarro sa kasong rape katulad din ng naisampang kasong rape sa aktor ng modelong si Denise Cornejo at beauty pageant contestant na si Roxanne Cabañero. ROBERT TICZON

IKINUSTODIYA ng awtoridad ang isang motorista matapos mahagip ang isang tauhan ng Metropolitan Manila Development Authority (MMDA) sa Quezon City kaninang umaga (Enero 22).

Isinasailalim na sa masusing interogasyon at nahaharap sa kasong reckless imprudence resulting to attempted homicide ang hindi napangalanang suspek.

Isinugod naman sa pinakamalapit na pagamutan sanhi ng tinamong pinsala sa ulo at katawan ang biktimang si traffic constable Joseph Alejo.

Sa ulat, naganap ang insidente sa pagitan ng 9 hanggang 9:30 a.m, sa tapat ng Robinson eastbound sa kanto ng EDSA cor. Ortigas Ave., sa Q.C.

Ayon kay Charlie Nozales ng MMDA metrobase, nagmamando ng trapiko sa lugar ang biktima nang biglang sumulpot ang isang Subaru at nahagip ito.

Hindi naman malaman pa kung sinadya ng suspek na sagasaan ang biktima.

Noong nakaraang Disyembre, nabiktima ng hit-and-run ng isang sports utility vehicle (SUV) ang isa ring MMDA constable na si Sonny Acosta sa Cubao, Q.C.

Namatay si Acosta ilang araw matapos maratay sa St. Luke’s Hospital. ROBERT TICZON

SWAK sa kulungan ang isang lola na hinihinalang drug pusher matapos madakip ng Philippine Drug Enforcement Agency (PDEA) sa isinagawang buy-bust operation sa Quezon City nitong nakalipas na linggo.

Kinilala ni PDEA Director General Undersecretary Arturo G. Cacdac, Jr. ang suspek na si Cresencia Garcia, alyas Cresencia DC Sibug o alias Ateng, ng 4-D Neptune St., Bgy. Bahay Toro, Project 8, QC.

Ayon sa PDEA, dakong 3:45 ng hapon, nagsagawa ng buy-bust ops ang mga operatiba ng PDEA Regional Office-National Capital Region (PDEA RO-NCR) sa ilalim ni Atty. Jacquelyn L. De Guzman sa kahabaan ng Pluto St. sa likod ng Cherry Fooderama, Bgy. Bahay Toro, QC na nagresulta ng pagkakadakip kay Garcia matapos pagbilhan ang isang PDEA agent, na umakto bilang poseur-buyer.

Nakumpiska kay Garcia ang isang pirasong heat-sealed transparent plastic sachet ng shabu na may timbang na 500 gramo, isang piraso ng dark grey pouch na naglalaman ng Nokia cellphone, isang ID ng Office of the Senior Citizen Affairs (OSCA), isang Honda CR-V na kotse (XFY 122), at P1,000 cash.

Nakapiit ngayon ang suspek sa PDEA RO-NCR detention cell at nahaharap sa kasong palabag sa Section 5 (Sale of Dangerous Drugs) at Section 11 (Possession of Dangerous Drugs), Article II of RA9165, o The Comprehensive Dangerous Drugs Act of 2002. SANTI CELARIO

DALAWANG lalaki ang iningusong suspek sa pagpatay sa isang retiradong guro matapos matagpuan ang bangkay nito sa loob ng kanyang tahanan sa Quezon City, kahapon ng umaga, Enero 21.

Ayon sa source sa Quezon City Police District (QCPD), kinilala ang dalawang suspek sa alyas na Putoy at Roroy na umano’y kabarangay ng biktima.

Magugunitang nadiskubre ang bangkay ng biktimang si Teodoro Ganapin, isang retiradong guro, dahil sa mabahong amoy ayon sa kapitbahay nitong si Marilyn Saclasa.

Dakong 9:00 ng umaga nang matagpuan ang bangkay nito sa loob mismo ng bahay nito sa no. 445 Binondo Lane, Bgy. Talipapa, QC nitong nakalipas na Huwebes.

Sinabi pa ng source sa QCPD na hindi na umano makita sa barangay sina Putoy at Roroy matapos matagpuan patay ang biktima. SANTI CELARIO

KALAT na sa social networking sites tulad ng ‘Facebook’ ang kopya ng resolusyong nagbabawal sa larong Defense of the Ancients o DOTA sa mga computer shop sa Bgy. Salawag, Dasmariñas, Cavite.

Nakasaad sa Resolution Number 008-S-2015 na ang larong DOTA ay nagiging ugat ng kaguluhan hindi lamang sa loob ng mga computer shop kundi pati na rin sa komunidad at sa pamilya.

Ito rin umano ang dahilan ng pagkamatay ng isang binatilyo noon lamang nakaraang Disyembre kung saan may nakaalitan ito na kalaro sa DOTA.

Naniniwala rin ang punong-barangay na si Enrico Paredes at pitong kagawad na bunga ng laro ay nagiging bayolente at natututong manloko, magnakaw at maging ang pagpatay makapaglaro lamang nito.

Sorpresang iniinspeksyon ng awtoridad ang mga computer shop sa lugar kung may mga naka-install pang software ng DOTA sa mga unit nito.

Sa resolusyong pinagtibay noong Enero 5, mahaharap sa isang buwang suspensyon ang Computer shop sa 1st offense; habang sa 2nd offense ay babawiin ang business permit nito; at sa ikatlong opensa naman ay permanente nang isasara ang mahuhuling shop at hindi na bibigyan pang muli ng business permit.

Inaasahang ipatutupad din ito sa iba pang mga barangay at mga lugar upang mailayo ang mga kabataan sa posibleng kapahamakan. GILBERT MENDIOLA

NAMATAY ang isang taxi driver nang pagbabarilin ng tatlong hindi pa nakikilalang holdaper nang tangkain ng biktimang manlaban habang kinukuha ang kanyang magdamagang kita kahapon ng madaling-araw sa Malabon City.

Hindi na umabot nang buhay sa Pagamutang Lungsod ng Malabon (PLM) ang biktimang si Gerardo Orias, 42, sanhi ng mga tinamong tama ng bala ng hindi nabatid na kalibre ng baril sa katawan.

Patuloy namang nag-iimbestiga ang mga awtoridad upang matukoy ang pagkakakilanlan ng mga mga suspek na mabilis tumakas matapos ang krimen.

Sa imbestigasyon nina Sp01 Jerry Dela Torre at P02 Benjamin Sy, naganap ang insidente dakong 1:30 ng madaling-araw sa panulukan ng Maya-Maya St. at Dagat-dagatan Ave., Bgy. Longos ng nasabing lungsod.

Kasalukuyan umanong nag-aabang ng pasahero ang biktima sa naturang lugar habang nasa loob ng kanyang taxi (UVK-320) nang biglang lapitan ito ng mga suspek na armado ng baril.

Agad na nagdeklara ng holdap ang mga suspek at sapilitang kinuha ang pera, cellphone at iba pang gamit na pakikinabangan sa biktima ngunit nanlaban ito hanggang sa pagbabarilin at mapatay siya ng mga suspek saka tumakas. ROGER PANIZAL

TODAS ang isang lalaki habang walo ang sugatan sa shooting incident sa McKinley St., Bgy. Pio del Pilar, Makati City.

Kinilala ang nasawing si Jessie Garcia, 22.

Sa imbestigasyon, nasa kalagitnaan ng pamamasyal ang mga biktima sa McKinley St. nang bigla silang pinagbabaril ng napadaang mga suspek lulan ng isang gray na kotse.

Narekober sa pinangyarihan ng krimen ang 30 empty shells ng high-powered firearms kasama na ang M-16 rifle, kalibre .45 at .38 handgun.

Patuloy pa rin ang imbestigasyon sa nasabing insidente. MARJORIE DACORO

ISANG limang-buwang buntis ang ginahasa bago pinatay ng sarili nitong tiyuhin sa Bgy. Gapas, Sta. Fe, Leyte.

Ayon sa tiyahin ng biktima na si Josephine Modeloso, hustisya ang kanilang isinisigaw para sa pagkamatay ng kanyang pamangkin na si Annie Trecenio, 27, ng naturang lugar.

Sa ulat ng Sta. Fe Police, nadatnan na lang ng pamilya ng biktima sa mismong bahay nito ang bangkay ng biktimang tadtad ng saksak sa katawan.

Napag-alamang pwersahang pinasok ang biktima ng suspek na mismong tiyuhin nito dahil sa mga natuklap na dingding na gawa sa plywood.

Nagsasagawa na ngayon ng manhunt operation ang mga awtoridad para matukoy ang kinaroroonan ng suspek. JOHNNY ARASGA

MAGKASUNOD na nilooban ang isang coffee shop at spa sa Quezon City kagabi, Enero 22.

Bandang alas-9:30 ng gabi nang pasukin ang Cafe Hugo Cakes and Coffee sa kanto ng E. Rodriguez at Tomas Morato ng isang singkit na lalaking naka-itim na cap, puting t-shirt at nakasalamin.

Umorder ito ng dark chocolate saka nagtanong kung saan ang CR.

Maya-maya’y umupo na ito sa pintuan, naglabas ng baril saka nagdeklara ng holdap kasunod ng paggapos sa mga biktima na ikinulong sa CR kabilang ang dalawang barista at dalawang customer sabay halungkat sa kanilang mga gamit.

Tinangay ng suspek ang mga pera, cellphone, tablet, laptop maging ang closed-circuit television (CCTV) ng coffee shop.

Samantala, sa Bgy. South Triangle, alas-10:00 ng gabi naman nang pasukin ng lalaking nakasalamin, nakapantalon at puting pantaas ang isang spa.

Kwento ng receptionist na si Rochelle Tolentino, tinanong siya ng suspek kung may available pang room saka nagsabing makiki-CR muna.

Paglabas ay nakita aniya siya ng suspek na kinandado ang vault at sinabing, “Natunugan mo ako ah!” sabay tutok sa kanya ng baril.

Nasa P9,000 hanggang P10,000 at mga cellphone ang natangay mula sa kanila.

Inaalam na sa ngayon kung may kaugnayan ang dalawang nasabing krimen at kung sino ang mga suspek. JOHNNY ARASGA

ASINGAN, PANGASINAN – Pinaghahanap ngayon ng Asingan police ang dalawang rider na bumaril at pumatay sa isang lalaking pinaghihinalaang nasa “drug watch list” sa nasabing bayan.

Kinilala ng Asingan police ang biktimang si Arnulfo Lime, 43, ng nasabing bayan. Siya ang nasa drug watch list dahil sa umano’y pagtutulak ng shabu.

Sa inisyal na imbestigasyon, nakaupo sa harap ng isang botika sa Ramos St. ang biktimang nang lapitan umano ito ng mga suspek saka binaril sa ulo.

Nakarekober sa pinangyarihan ng pitong slug at deformed jacket ng .9mm pistol.

Si Lime ay nasa drug watch list ng Municipal Anti-Drug and Abuse, ngunit iniimbestagahan pa rin kung ano ang tunay na motibo sa pagpatay.

Sa ngayon, nagsasagawa ng manhunt operation para sa dalawang suspek. ALLAN BERGONIA

DALAWA ang nasaktan nang suyurin ng isang trak ang tatlong sasakyan bago sumalpok sa pader sa Quezon City nitong Huwebes ng gabi, Enero 22.

Isinugod sa Quirino Memorial Medical Center ang drayber ng isang six-wheeler truck at isang mambobote na kapwa hindi nakuha ang pangalan.

Inaalam naman ng pulisya kung lango sa alak ang truck driver matapos makakita ng mga basyo ng beer sa sahig ng sasakyan.

Sa ulat, naganap ang insidente dakong 10:45 p.m. sa B. Serrano, Q.C.

Bago ito, patungong EDSA ang trak nang biglang mawalan ito ng kontrol at banggain ang isang taxi, sports utility vehicle (SUV) at kotse saka sumalpok sa pader. ROBERT TICZON