NAKAALERTO na ang pamunuan ng pambansang pulisya sa posibilidad na “retaliation attack” o pagganti ng kampo ng napatay na most-wanted terrorist sa buong Asya na si Zulkifli Bin Hir alyas Marwan.

Ayon kay PNP PIO chief, Police Chief Supt. Generoso Cerbo, hindi na nila binabalewala ang mga bagay na ito at dahil dito patuloy silang nagmo-monitor ng mga posibleng banta mula sa mga taong na-recruit at naturuan ni Marwan sa paggawa ng bomba.

Sinabi ni Cerbo na wala pa namang natatanggap na intelligence report ang PNP hinggil sa planong pag-atake ng mga tao ni Marwan dito sa Metro Manila.

Ipinaliwanag ni Cerbo na normal lamang ang mga order o direktiba ng liderato ng pambansang pulisya kung meron man, sa iba’t ibang units para sa pagiging alerto upang maagapan ang anomang posibleng banta ng seguridad.

Dahil sa posibleng paghiganti, inaatasan ng PNP ang lahat ng units nito sa buong bansa na lalo pang palakasin ang seguridad sa mga kampo at pinapayuhan ang lahat ng personnel lalo na ang mga taga-SAF sa Camp Bicutan na huwag lalabas ng kampo nang walang kasamang buddy o partner at walang armas. JOHNNY ARASGA

DAHIL mas gumagrabe na ang pamemerwisyo, nagdeklara na kaninang umaga (Pebrero 12) ang pulisya ng isang hot-pursuit operation laban sa dalawang tirador ng establisyimento sa Quezon City.

Ang hakbang ay agarang inilatag na ng Quezon City Police District (QCPD) matapos paslangin ng mga suspek ng isang Korean national na nakikilalang si Mik Kyung Park, 40, ng Eastwood Regrant Tower, Bgy. Bagumbayan, Libis, Q.C. nitong Miyerkules ng 1:30 ng hapon sa Bay Leaf restaurant sa Holy Spirit Drive sa Bgy. Holy Spirit, Q.C.

Dahil iisa lamang ang pagsasalarawan ng mga testigo sa itsura ng suspek na armado ng kalibre .45, kutob ni QCPD-Criminal Investigation and Detection Unit (CIDU) C/Insp. Rodel Marcelo, na ang pumatay sa babaeng banyaga at ang nanggahasa sa empleyada ng isang furniture shop sa Katipunan Ave. at nangholdap din sa isang SPA sa Bgy. South Triangle at sa Café Hugo cakes and coffee sa kanto ng East Rodriguez Ave. at Tomas Morato ay iisang tao lamang na may kasabwat na nagmamaneho ng motorsiklo na kanilang getaway vehicle.

Maging ang estilo aniya ng panghoholdap ng suspek ay halos magkakahawig na tulad ng magpapanggap muna itong kustomer saka magdedeklara ng holdap.

Pinaghuhubad din aniya ng damit ang mga taong kanyang hoholdapin saka itatali at ikukulong sa banyo para hindi kaagad makahingi ng tulong. At kapag aniya nakuha na ang pakay, lalabas na itong parang walang nangyari at sasakay sa naghihintay na motorsiklo sabay sisibat na.

Ang pananamit din aniya ng suspek sa kanyang apat na panghoholdap sa lungsod ay halos iisa lamang na tulad ng nakasuot lamang ito ng t-shirt, short pants at baseball cap para matakpan ang kanyang mukha. Kadalasan din itong naka-smoke glass.

Pati aniya ang oras ng modus operandi ay iisa lamang at ito’y sa panahon na patay ang oras o oras na walang masyadong tao sa kalsada.

Madalas din aniyang targetin ng suspek ay ang mga establisyimento na walang nakatalagang security guard at kung mayroon man nakalatag na CCTV ay sisirain muna ito bago tumakas.

Matatandaang, nagpalatag na si QC Mayor Hebert Bautista ng police checkpoint kahit sa katanghalian para masawata ang modus operandi ng suspek pero hanggang ngayon ay wala pang nasisilo. ROBERT TICZON

NATANGAYAN ng cash ang isang sangay ng LBC matapos maholdap ng isang hindi nakilalang suspek sa Pureza, Maynila.

Sa reklamo nina Cerna Caldo, 22, at Aprilyn Aquino, 29 pawang mga empleyado ng nasabing remittance center, bigla na lamang pumasok ang suspek na inilarawang may taas na 5”6, naka-maong pants, berdeng jacket at bull cap at may back pack.

Bitbit ang isang fan knife, biglang nagdeklara ng holdap ang mga suspek sa mga biktima.

Mismong ang mga suspek pa ang nagbukas sa mga drawer at kinuha ang mga nakatagong pera na umabot sa halagang P7,850 saka mabilis na tumakas.

Nahagip naman ng CCTV ng barangay na nakakasakop sa lugar ang panghoholdap ng suspek sa LBC.

Pinayuhan naman ng Manila Police District – PS 4 ang ilang nagmamay-ari ng establisyimento sa lugar na maglagay ng CCTV at security guard para na rin sa seguridad at upang agad na matukoy ng mga kawatan. JOCELYN TABANGCURA-DOMENDEN

SA patuloy na pagsugpo sa iligal na droga ng pinagsanib na puwersa ng lubao PNP at PDEA-3, arestado ang dalawang hinihinalang pusher sa bayan ng lubao Pampanga.

Sa ulat sa tanggapan ni P/Ssupt. Rodolfo Recomono, Jr. PPPO Director, kinilala ang dalawang suspek na sina Bryan Terence Morales a.k.a. Tintoy, 27, may asawa, at Richard Morales a.k.a. Choy, 44, kapwa ng Manuel Roxas St., Bgy. Sta. Cruz, Lubao, Pampanga.

Dakong 3:30 ng hapon nang isagawa ang buy-bust operation ng may nagpanggap na poseur buyer at nakumpiska sa mga ito ang walong plastic sachet ng hinihinalang shabu kasama ang ilang drug paraphernalia, at isang P500 bill na ginamit bilang marked money.

Kasong paglabag sa Section 5 at 11, ng Art. II ng R.A. 9165 ang kakaharapin ng mga ito at kasalukuyang nakadetine na sa Lubao Municipal police detention cell. GARY BERNARDO

DEAD-ON-THE-SPOT ang isang 32-anyos na vendor matapos barilin ng ‘di nakilalang lalaki kaninang umaga sa Quiapo, Maynila.

Kinilala ang biktimang si Jennifer Sulayman, hiwalay sa asawa at residente ng 24 Basan St. ng nasabi ring lugar.

Sa ulat ni SPO2 Glenzor Vallejo, alas-6:40 ng umaga sa River Banks ng Ilog Pasig sa nasabing lugar nang maganap ang pamamaril ng suspek na inilarawanng nasa edad na 30-35, may taas na 5’-5’5, naka-itim na jacket, asul na maong pants at armado ng ‘di pa batid na kalibre ng baril.

Nauna rito, naglalakad ang biktima sa lugar pauwi nang lapitan siya ng suspek at barilin nang dalawang beses.

Matapos ang pamamaril ay kaswal lang na naglakad ang suspek dala ang baril na ginamit.

Patuloy naming inaalam ng pulisya ang pagkakakilanlan ng biktima. JOCELYN TABANGCURA-DOMENDEN

DAHIL pumalag sa tangkang panggagahasa, isang dalagita ang pinagsasaksak ng kanyang sariling tiyuhin sa San Mateo, Rizal nitong Lunes ng gabi (Pebrero 9).

Nagtamo ng pitong saksak sa braso, tiyan at dibdib at kinailangan isailalim sa maselang operasyon ang biktimang itinago sa pangalang Marian, 15.

Hinahanting na ngayon ng San Mateo PNP para panagutin sa krimen ang hindi pinangalanang suspek na pinsan ng nanay ng biktima.

Sa ulat, naganap ang insidente dakong 11:35 p.m. sa bahay ng biktima sa San Mateo.

Bago ito, nag-inuman ang biktima at ang suspek pero nang makarami na ang dalagita, nagpaalam na ito para matulog.

Pero habang natutulog, nagising ang biktima dahil nakadagan sa kanya ang suspek.

Bago maisakatuparan ang balak, nasipa ng biktima ang suspek saka tumakbo palabas ng kanilang bahay pero inabutan siya ng suspek at sinaksak nang pitong beses gamit ang icepick. ROBERT TICZON

SWAK sa kulungan ang isang Liberian national matapos masakote ng pinagsanib na pwersa ng Philippine Drug Enforcement Agency (PDEA) at Philippine National Police (PNP) sa isang buy-bust operation sa lalawigan ng Pampanga nitong nakalipas na Pebrero 7, 2015, Sabado.

Kinilala ni PDEA Director General Arturo G. Cacdac, Jr. ang nadakip na suspek na si Izo Noble, 35, tubong Camp Johnson Rd., Monrovia, Liberia at residente ng Don Rosario St., Angeles City.

Sa ulat, dakong 6:30 ng gabi nang isagawa ang buy-bust operation sa kahabaan ng McArthur Highway, Bgy. Dau, Mabalacat City, Pampanga.

Nabatid na nagkasundo ang suspek at ang poseur buyer ng PDEA para magkita sa nasabing lugar at isasagawa ang transaksyon.

Saktong iniaabot na ng suspek sa ahente ng PDEA ang droga nang dambahin ito ng mga nakaantabay na pulis at PDEA agent.

Narekober ng mga awtoridad ang isang medium pack sachet ng shabu na 98 gramo ang timbang at may street value na P700,000.

Nakapiit na ngayon sa Mabalacat City Police station ang suspek at nahaharap sa kasong paglabag sa Section 5 (Sale of Dangerous Drugs), at Section 11 (Possession of Dangerous Drugs), Article II ng Republic Act 9165, o mas kilala sa Comprehensive Dangerous Drugs Act of 2002. SANTI CELARIO

AABOT sa 100 pamilya ang nawalan ng bahay sa sunog na naganap sa Bgy. Bagbag, Novaliches, Quezon City kagabi, Pebrero 9, 2015 (Lunes).

Ayon kay Quezon City District Fire Marshall Senior Supt. Jesus Fernandez, sumiklab ang sunog sa dalawang palapag na bahay ni Ignacio Babaylon sa Abbey Rd., Bgy. Bagbag, Novaliches dakong 8:00 ng gabi.

Sinabi ni Fernandez, mabilis na nilamon ng apoy ang 2-storey bldg. dahil gawa sa kahoy at agad ding nadamay ang 50 kabahayan sa lugar.

Umabot ang sunog sa 4th alarm at ganap na na-fireout dakong 9:00 ng gabi.

Walang nasugatan o nasawi sa sunog, ngunit umabot naman sa P750,000 halaga ng ari-arian ang naabo. SANTI CELARIO

NAGSAMPA ngayon ng reklamo ang isang 72-anyos na lola matapos umanong gahasain ng isang 32-anyos na binata sa Sitio Lamsini, Bgy. Sinolon, T’boli, South Cotabato.

Ayon kay Pol. Chief Inspector Jose Marie Simangan, inimbita ng suspek na kinilalang si Felizardo Roquero Bane-bane, binata, walang trabaho, ang na biktima na magpunta sa kabundukan, at dito na isinagawa ang panghahalay.

Matapos ang nasabing krimen, inireklamo ng lola ang ginawa ng suspek sa mga kaagad namang nahuli ito.

Sa ngayon, nakakulong na si Felizardo sa lock-up cell ng T’boli PNP at nahaharap sa kasong rape.

Samantala, itinatanggi ng suspek na siya ang may kagagawan sa nasabing panghahalay. JOHNNY ARASGA

HAWAK na ng Moro Islamic Liberation Front (MILF) ang dalawang lalaking pinaniniwalaang nagnguso sa mga awtoridad kung nasaan ang Malaysian terrorist na si Zulkifli Bin Hir alyas Marwan.

Gayunman, hindi pa mabatid kung ang pagtuturo sa lokasyon ni Marwan ang dahilan kaya’t isinailalim sa kustodiya ng MILF ang dalawang tipster o nais lamang maprotektahan ang mga ito lalo’t sila ang tatanggap ng US$5-million reward.

Nagtago umano ang mga tipster sa teritoryong kontrolado ng Bangsamoro Islamic Freedom Fighters (BIFF), matapos ang inilunsad na oplan exodus, ang operasyon na napatay ang dayuhang terorista sa Mamasapano, Maguindanao.

Ang paglipat ng dalawang tipster na kapwa MILF member sa teritoryo ng kalaban ang dahilan umano kaya nagkasagupa ang MILF at BIFF sa bayan ng Pikit, North Cotabato.

Gayunman, inihayag ni Lt. Col. Audie Edralin, Commanding Officer ng 7th Infantry Battalion, walang nakararating sa kanilang impormasyon ng anomang engkwentro sa pagitan ng MILF at BIFF. JOHNNY ARASGA

VILLASIS, PANGASINAN – Nababahala na ang mga residente dahil dumarami ang kasong dengue na ikinamatay ng isang bata sa Villasis sa nasabing lalawigan.

Sa kasalukuyan, may dalawang bata at dalawang may edad na ang nagkaroon ng “dengue fever” sa Bgy. Lipay, Puelay at Poblacion Zone 1.

Kamakailan, isang walong-taon gulang na nakilalang si Chloe Martinez, ng Poblacion Zone 1, ng nasabing bayan ang namatay dahil sa dengue.

Napag-alamang pati ang apo ni Villasis Mayor Dita Abrenica, ang kinagat ng lamok na may dala ng sakit na dengue.

Kahapon lamang (February 10) isinugod sa pinakamalapit na hospital si Merrian Mortera, ng Bgy. Puelay, Villasis dahil sa nasabing sakit.

Panawagan ng mga residente na sana’y magkaroon na ng “anti-dengue fogging” para puksain ang nasabing sakit.

Ayon pa sa kanila, unti-unti nang nagkakaroon ng outbreak ng dengue sa nasabing bayan. ALLAN BERGONIA

INIREKLAMO ng isang estudyante ng Centro Escolar University (CEU) ang isang miyembro ng Manila Traffic and Parking Bureau (MTPB) matapos hingan ng pera sa Sta. Cruz, Maynila.

Ayon sa reklamo ni John Nikko Gelizon, 24, ng 1626 Camino St., Guadalupe, Nuevo, Makati City sa tanggapan ng MPD-General Assignment Section (MPD-GAIS), alas-4 kahapon nang parahin siya ng isang alyas “R. Ramos”, miyembro ng MTPB sa harap ng Isetann Mall sa Sta. Cruz, Maynila.

Pakaliwa umano siya nang parahin ni Ramos dahil umano sa traffic violation na “swerving.”

“Swerving lang ang violation ko, tinikitan na ako, gusto pa i-impound ang sasakyan ko at hinihingan ako ng P1,500,” ayon sa biktima.

Samantala, anim na miyembro naman ng Manila Towing Services at RMW Towing Services, ang sinampahan naman ng kasong carnapping, grave coercion at malicious mischief ng tatlong katao.

Kabilang sa mga kinasuhan sina Hilario Ramos, Jr., driver ng truck ng towing service; Rolly Gerva, Reignson Badi, Avisd Altorado, Michael Casimiro at Benjamin Mendoza, Jr.

Inireklamo nina Benny Joe Paul Alandoni, 39; Jennifer Alberto, 27, at Jesus Sales, 38, ang mga suspek sa MPD-GAIS dahil sa ginawang pagbatak sa kanilang mga sasakyan.

Naganap umano ang insidente alas-4:30 ng hapon sa may kahabaan ng Villegas St. sa tapat ng William Goiding Bldg. Ermita, Maynila noong Pebrero 9. JOCELYN TABANGCURA-DOMENDEN

ISANG Pinay nurse na umuwi sa Pilipinas mula Saudi Arabia ang nagpositibo sa sakit na Middle East Respiratory Syndrome (MERS), na dulot ng MERS-Coronavirus (CoV).

Ito ang kinumpirma kahapon ng Department of Health (DOH) sa idinaos na pulong balitaan.

Ayon kay DOH Secretary Janette Garin, Pebrero 1 nang dumating sa bansa ang 32-anyos na nurse mula Saudi.

Tumanggi naman ang kalihim na pangalanan pa ang nurse para sa proteksyon nito at ng kanyang pamilya.

Naka-confine na ang pasyente sa Research Institute for Tropical Medicine (RITM) sa Muntinlupa City simula pa noong Pebrero 10 at kasalukuyang sinusuri ng mga eksperto.

“Testing was done on the patient and yielded positive results. The patient is currently confined in a negative pressure room at RITM. Patuloy syang sinusubaybayan ng ating mga doctors at health workers,” ayon kay Garin.

Stable na naman sa ngayon ang nasabing pasyente.

Nagsasagawa na rin ang DOH ng contact tracing sa iba pang pasahero na nakasabay nito sa biyahe pag-uwi sa Pilipinas bagama’t nilinaw na ng mga eksperto na maliit naman ang posibilidad na nakahawa ito.

Kaugnay nito, muli namang nananawagan ang DOH sa publiko na makipagtulungan sa pagbabantay upang hindi lumaganap sa ating bansa ang mga emerging infectious diseases kagaya ng MERS-CoV.

Tiniyak naman ng DOH na handa ang pamahalaan na gamutin ang mga maysakit pero malaking tulong anila kung maagang magpapakonsulta ang sinomang may nararamdaman ng mga sintomas ng sakit, lalo na kung mula ang mga ito sa Middle East Region.

Ang mga sintomas ng sakit ay tulad ng nararamdaman sa trangkaso gaya ng lagnat, ubo, hirap sa paghinga, pangingiki, pananakit ng ulo at katawan.

Matatandaang noong Setyembre 2014 ay may isa na ring Pinay nurse na nagpositibo sa MERS-CoV. MACS BORJA

TIGOK ang isang 63-anyos na lalaki matapos suwagin ng tricycle habang bumababa sa sinasakyang tricycle sa Bgy. Damayan, Quezon City kahapon, Pebrero 10, 2015 (Martes).

Kinilala ang biktimang si Abraham Dominguez, may-asawa, ng 199 Calamba St., Bgy. Talayan, QC.

Si Dominguez ay idineklarang dead on-arrival sa Quezon City General Hospital dahil sa tinamong pinsala sa katawan.

Sumuko naman ang suspek na si Orlando Obosa, 34, may-asawa, tricycle driver ng 2 West River Side St., Bgy. Damayan, QC.

Sa ulat ni P01 Isabelo Pajarilla ng Quezon City District Traffic Enforcement Unit Traffic Sector 1, naganap ang insidente sa kahabaan ng Tolentino cor. Flores St., Bgy. Damayan, QC dakong 4:00 ng hapon.

Nabatid na sakay ang biktima ng isa pang tricycle na minamaneho ni Salvador Ferrer habang tinatahak ang kahabaan ng Tolentino St. patungong Frisco.

Pagsapit sa Flores St., huminto ang tricycle na sinasakyan ng biktima at bumaba ito at dito na siya sinalpok ng minamanehong tricycle ni Obosa.

Sa lakas ng pagkakasalpok, nagtamo ng matinding pinsala ang biktima na ikinasawi nito.

Nahaharap sa kasong reckless imprudence resulting in homicide ang suspek dahil sa naturang insidente. SANTI CELARIO

SUMUKO na sa awtoridad ang isang pulis na nagpasabog ng granada at ikinamatay ng dalawang opisyal ng pulisya sa Bukidnon nitong nakaraang Lunes.

Kasama ng suspek na nakikilalang si PO1 Gorospe Cairo ang isang lokal na opisyal nang sumuko ito nitong Martes ng hapon.

Agad itong idinetine sa Malaybalay city police station. Isasailalim pa sa interogasyon ang suspek para malaman ang motibo kung bakit niya initsahan ng dalawang granada ang kanilang presinto.

Si Cairo ay nakatakdang sampahan ng kasong double murder at frustrated murder.

Tinutugis si Cairo dahil sa pagsabog ng granada sa loob mismo ng Cabanglasan police station na ikimatay nina police chief Senior Inspector Crisanto Molina at deputy Inspector Dexter Garcia. ROBERT TICZON

SINUWAG muna ng isang taxi ang center island sa may East Avenue sa Quezon City  saka bumaliktad sa kalsada kagabi, Martes.

Itinanggi ng tsuper na si Victoriano Madrigal na nakainom siya ng alak pero kinalaunan ay inamin din.

Sa ulat, naganap ang insidente dakong 11:45 p.m. sa may East Avenue, Barangay Piñahan, Q.C.

Ayon sa nakasaksi, mabilis ang takbo ng taxi nang bigla itong bumangga sa center island sanhi para buliktad at bumalandra sa kalsada.

Si Madrigal ay mahaharap sa kasong reckless imprudence resulting to damage property at Anti-Drunk and Drugged Driving Law. ROBERT TICZON

NALAPNOS ang katawan ng isang vendor habang sugatan naman ang 14 iba pa kabilang ang siyam na mga estudyante nang sumabog ang isang kerosene gas stove sa loob mismo ng food park ng Cebu Technological University main campus kaninang umaga (Pebrero 11).

Sinabi ni SFO1 Tristan Tadatada ng Cebu City Bureau of Fire Protection (BFP), na habang nagluluto ang biktimang si Arenato Catarongan, 41, sa hindi pa malamang dahilan ay biglang sumabog ang kerosene gas stove na lumikha ng apoy na mabilis  na kumalat sa katabing mga tindahan.

Bukod kay Catarongan, sinabi ni Tadatada na nalapnos din ang katawan ng mga katabing vendors na sina Fibua Lauron, 35; Jelly Ann Dedicatoria, 17; Jenelyn Tuburan, 15; at Janice Tabar, 40, gayundin ang siyam na mga estudyante at isang administrative officer.

Inanunsyo naman ni Dr. Rogelio Villamor, university doctor, na ligtas na ang mga nasabing mga estudyante maliban kay Charish Lynn Barinaga, 17, na nananatili pa rin sa pagamutan na nahilo matapos ma-suffocate.

Tinatayang aabot sa 10 mga stalls ang naabo at dalawang partially-damaged naman ang iniwan ng nasabing insidente.

Sa ngayon, patuloy pang iniimbestigahan ng mga awtoridad ang tunay na dahilan ng mga pangyayari. ROBERT TICZON

SWAK sa kulungan ang dalawang notoryus na pusher matapos madakip ng Philippine Drug Enforcement Agency (PDEA) at Philippine National Police (PNP) sa isinagawang buy-bust operation sa Tibagin, Angeles City nitong nakalipas na Pebrero 7, 2015 (Sabado).

Kinilala ni PDEA Director General Usec. Arturo G. Cacdac, Jr. ang mga nadakip na suspek na sina Abdul Fatah Unte, 35, at Absari Mohamad Boriongan, 37, kapwa ng Purok 6, Bgy. Pampang, Angeles City.

Ayon sa PDEA, ang dalawang suspek ay nadakip matapos pagbilhan ng tatlong piraso ng transparent plastic sachet ng una ang isang PDEA agent na umaktong poseur buyer sa Tibagin, Angeles City.

Nabatid na habang isinasagawa ang buy-bust operation ng mga awtoridad dakong 4:30 ng hapon ng pinagsanib na operatiba ng PDEA Regional Office 3 (PDEA RO3), SWAT Angeles City, Angeles City Police Office at Pampanga Criminal Investigation Detection Group (CIDG) sa bahay ni Unte sa Purok 6B, Bgy. Pampang, Angeles City.

Nakumpiska sa suspek ang 19 na piraso ng heat-sealed transparent plastic sachets na naglalaman ng shabu na may timbang na 100 gramo at paraphernalia. SANTI CELARIO

SINURI na ng Department of Health (DoH) ang mahigit kumulang na 47 sa 225 na pasahero ng Saudi Airlines flight 860 para malaman kung nahawaan ang mga ito ng Middle East Respiratory Syndrome-Coronavirus (MERS-CoV) makaraang magpositibo sa virus ang isang Pinay nurse na dumating sa bansa noong Pebrero 1.

Sinabi ni acting DOH Secretary Janette Garin, mas maiging magpatingin na ang mga ito sa doktor para maiwasan ang pangamba ng publiko na kumalat ang sakit.

Sa ngayon ay patuloy nilang inaalam ang origin ng iba pang pasahero na lulan ng eroplano para maobserbahan.

Aniya pa, wala pang partikular na gamot ang nadidiskubre para sa virus.

Dahil dito, hiniling kahapon ng DoH sa publiko na kapag may kakilala silang kasama ng nurse sa eroplano ay agad nila itong ipagbigay-alam sa pinakamalapit na health facilities o opisina ng DOH.

Samantala, patuloy naman ang monitoring ng DoH sa 32-anyos na nurse na nahawaan ng MERS-CoV na ngayo’y nasa isolaton room sa Research Institute for Tropical Medicine (RITM) sa Muntinlupa at nasa stable naman itong kalagayan.

Isasailalim na rin ang kanyang mga nakasalamuha partikular ang pamilya para tingnan kung nahawaan ang mga ito ng sakit.

Napag-alamang nakapasok ang MERS-CoV sa bansa dahil noong dumating ang nurse ay wala pa sa kanya ang virus at hindi pa ito na-monitor ng thermal scanner sa airport.

Gayunman, pagkatapos ng ilang araw ay dito lamang lumabas ang sintomas at nang magpatingin sa doktor ay positibo ito sa virus. JOHNNY ARASGA

SINUNOG ng mga pinaniniwalaang rebeldeng New People’s Army (NPA) ang ilang equipment ng isang engineering firm sa Masbate.

Ayon sa San Jacinto Municipal Police Station, sinunog ng hindi mabilang na mga armadong lalaki ang isang unit ng truck at road roller sa Sitio Cawa-Cawa, Bgy. Bagahanglad sa nasabing bayan.

Nabatid na pag-aari ang mga sinunog ni Engr. John Mark Tina Dejumo ng Bgy. District 2, naturang bayan.

Pinaniniwalaan na ang hindi pagbibigay ng revolutionary tax ang dahilan sa panununog ng mga rebelde. MARJORIE DACORO