TIMBOG ang isang Sri Lankan national na wanted sa kasong qualified theft na nagtatago sa kanyang tinitirahan sa North Baybay, Galas, Dipolog City.

Kinilala ang nasakoteng banyaga na si Wijesinghie Arachige Supon Chamikar, 36, may asawa at pansamantalang nakatira sa nabanggit na lugar.

Sa ulat ng Dipolog City police station, tinungo ng mga pulis ang bahay ng suspek para maisilbi ang warrant of arrest nito na inilabas ng Regional Trial Court (RTC) 9 Branch 8 sa Dipolog City noong ika-22 ng nakaraang buwan.

Hindi pa tinukoy ng pulisya kung sino ang nagsampa ng kaso laban sa banyaga.

Nakapiit na sa selda ng Dipolog City Police Station ang nahuling suspek habang hindi pa nitong nabayaran ang halagang P30,000 na inirekomendang piyansa ng korte para sa kanyang pansamantalang paglaya. JOHNNY ARASGA

NAHAHARAP ngayon sa kasong homicide ang isang lalaking nakapatay sa kanyang live-in partner dahil sa matinding selos.

Sugatan din ang ina ng biktima nang sumaklolo ito habang sinaksaksak ng suspek ang babae dahil sa selos.

Kinilala ang napaslang na biktimang si Jecil Salundagi habang ang live-in partner na suspek ay nakilalang si Melgray Obido, 33, driver at kapwa ng Bgy. Lopoc, Labason, Zamboanga del Norte.

Sa inisyal na imbestigasyon ng Labason-PNP, nagsimula umano ang naturang insidente sa mainitang pagtatalo ng dalawa noong gabi bago matulog ang mga ito.

Sinasabing sa kalagitnaan ng pamamahinga ay mayroong nag-text sa biktima subalit hindi nagustuhan ng suspek ang naging tugon nito nang tanungin kung sino ang nasa kabilang linya.

At dahil sa matinding selos ay hindi man lang daw nagdalawang-isip ang suspek na kunin ang anim na pulgadang kutsilyo na pinangsaksak sa dibdib ng biktima.

Matapos ang insidente ay agad din namang sumuko ang suspek sa kanyang tiyuhin na siyang naghatid nito sa Labason Police Station. JOHNNY ARASGA

PINANINIWALAANG minasaker muna ng isang dayuhan ang kanyang asawang Pinay at tatlong anak saka nagpakamatay sa San Juan City.

Pawang tadtad ng saksak ang bangkay ng 50-anyos Taiwanese na mister, misis nito, dalagang anak na edad 18, at dalawang batang lalaki na edad 15 at 12.

Sa ulat, nadiskubre ang krimen dakong 6:45 ng umaga sa loob mismo ng master bedroom sa bahay ng mga biktima sa Midland Subdivision sa Greenhills, San Juan.

Bago ito, nabatid na tila may malaking problemang pang-pinansyal ang naturang dayuhan kaya sa pagkadismaya ay minasaker ang kanyang mag-iina bago nagpakamatay.

May nakita rin na isang suicide note ang katulong ng mga biktima na hindi nakuha ang pangalan na nakalagay sa may kusina.

Kabilang sa mga kahilingan ng naturang padre de pamilya sa suicide note ang instraksyon sa kanyang kaibigan na ipa-cremate agad ang kanilang bangkay.

Inaalam pa ng pulisya ang tunay na motibo sa naturang murder-suicide. ROBERT TICZON

DAHIL sa labis na kalungkutan, naglaslas ng pulso ang isang Taiwanese na babaeng bilanggo sa Aklan Rehabilitation Center (ARC) kaninang umaga (Pebrero 7).

Sa kabutihang-palad, nailigtas naman agad ng mga manggagamot sa Aklan Provincial Hospital ang buhay ng presong si Chia Huei Ma, 28, alyas Chia-Chia na nahaharap sa kasong iligal na droga sa isla ng Boracay.

Sa ulat, naganap ang insidente dakong 9:20 ng umaga sa selda ng dayuhan.

Nadiskubre ng mga kasamahang preso na duguan at naglaslas ng pulso ang dayuhan gamit ang isang naputol na blade.

Ayon sa mga jailguards ng ARC, matagal nang naikukwento ng Taiwanese ang sobrang kalungkutan dahil hindi niya kapiling ang kanyang anak bukod pa sa wala rin na dumadalaw sa kanya na mga kamag-anak.

Nabatid na anim na buwang buntis ang Taiwanese nang maaresto ng awtoridad dahil sa pagtutulak ng shabu sa isinasagawang anti-drug operation sa tinitirhang apartment nito sa Bgy. Manoc-Manoc, Boracay noong Marso 12, 2014.

Sa loob na ng kulungan nanganak ang preso, ngunit dahil bawal na isama sa loob ng kulungan ay pinaalagaan muna ang kanyang bagong silang na sanggol sa kanyang mga kaibigan sa Boracay.

Maliban kay alyas Chia-Chia, isa pang babaeng Taiwanese ang nahuli sa nasabing operasyon kasama ang dalawang iba pang Pinoy. Nakumpiska sa kanila ang 12 plastic sachet ng shabu. ROBERT TICZON

NASAKOTE ng pinagsanib na puwersa ng AFP-PNP ang dalawang high ranking NPA Leaders sa ikinasang operation sa Bgy. sa Sinaragan, Matanao, Davao del Sur.

Mismong sa inokupahang bahay sa nabanggit na lugar natimbog ang magkalive-in na sina Raunil Nudalo Mortejo alyas Ka Nestor o Angkol at si Jasmin Castor Badilla alyas Ka Antali.

Ayon kay Police Chief Insp. Elmar Cabuslay, hepe ng Matanao PNP, mayroong warrant of arrest ang dalawa na inisyu ng RTC Branch 3, Nabunturan Comval.

Si Ka Nestor ay may kasong kidnapping at serious illegal detention habang kasong Robbery with against or intimidation of persons ang kinakaharap ni Ka Antali. Pinabulaanan naman ng dalawa na kasapi sila sa NPA.

Ngunit ayon pa sa intelligence report ng PNP na aktibo pa sa kilusan ang dalawa. Napunta lamang umano sila sa Davao del Sur upang makahanap ng trabaho.

Subalit sinundan ito ng mga Intelligence unit at matagumpay na nahuli ang mga rebelde. JOHNNY ARASGA

NAGLUNSAD na ngayon ng manhunt operation ang mga pulis sa Zamboanga Sibugay laban sa kanilang kapwa pulis na suspek sa pagpatay sa umano’y live-in partner nito.

Sa report ng Kabasalan municipal police station, kinilala ang suspek na pulis na si P02 Rolly Balde, na naka-assign sa nabanggit na police station habang ang biktima ay nakilalang si Michell Udtohan Abracia, 38.

Nangyari ang insidente sa mismong inuupahang kuwarto ng dalawa sa isang boarding house sa Bgy. Poblacion sa bayan ng Kabasalan.

Ayon sa mga residente sa lugar na ilang minuto bago sila nakarinig ng putok ng baril ay nag-away pa umano ang dalawa na maaaring dahilan ng insidente.

Agad namang tumakas ang suspek dala ang kanyang baril na ginamit sa pamamaril.

Nabatid na parehong may kani-kanilang pamilya ang suspek na pulis at ang kinakasama nito.

Inaalaam pa ngayon ng pulisya kung ano talaga ang tunay na dahilan sa pamamaril. JOHNNY ARASGA

KINUWELYUHAN ng National Bureau of Investigation (NBI) ang apo ni Cavite Rep. Elpidio Barzaga dahil sa paggamit ng droga nitong Sabado ng gabi (Pebrero 7).

Sinabi ni NBI Anti-Illegal Drugs Unit chief Eric Isidoro, na ang suspek na si Harrel Barzaga, 39, at apat pang kasamahan ay naaktuhang nagpa-pot session sa Barzaga cmpd. sa Dasmariñas, Cavite dakong 9:45 p.m.

Dinampot ang mga suspek sa bisa ng search warrant na inilabas ng hukuman nang magreklamo ang mga kapitbahay ng mga Barzaga na halos gabi-gabing nanggugulo at nag-iingay sa kanilang lugar ang grupo ni Harrel.

Nakuha sa mga suspek ang siyam na pakete ng hinihinalang shabu at ilang assorted drug paraphernalias.

Nakakulong na sa NBI detention facility ang mga suspek na mahaharap sa kasong paglabag sa Comprehensive Dangerous Drugs Act. ROBERT TICZON

TINATAYANG aabot sa mahigit P1-milyon ang natangay sa isang kapatid ng empleyado ng TV 5 matapos mabiktima ng dugo-dugo gang sa magkakahiwalay na lugar sa Maynila.

Personal na dumulog sa tanggapan ng Manila Police District-General Assignment and Investigation Section (MPD-GAIS) ang complaint na si Angeli Obrado, 35, dalaga,ng 24 Quirino St., Tondo, Maynila.

Sa reklamo ni Angeli, isang ‘di nagpakilalang caller ang tumawag sa kanyang nakababatang kapatid na si Mia, 17, at sinabing nakadisgrasya ang kanilang kamag-anak at kailangan ng malaking halaga.

Inutusan umano ng suspek si Mia na kunin ang mamahaling alahas saka dalhin at magkita sa pinagkasunduang lugar.

Dala umano ng biktima ang tinatayang aabot sa P1.2-milyong halaga ng iba’t ibang uri ng alahas ng kanilang pamilya saka ibinigay sa suspek sa may Jollibee sa Tutuban Mall at sa Sangandaan, Caloocan City alas-4 kahapon.

Pag-uwi sa bahay ay saka lamang nalaman ng biktima na naisahan ito ng mga miyembro ng dugo-dugo gang nang malaman nitong wala namang nangyari sa kanila.

Dahil dito, agad nagtungo ang nakatatandang kapatid ng biktima na si Angeli sa MPD headquarters upang magreklamo. JOCELYN TABANGCURA-DOMENDEN

HINDI na muna makabibiyahe ang lahat ng 70 city operation bus ng Dela Rosa Transit ngayong Lunes matapos masangkot ang isa nitong unit sa aksidente noong Huwebes na nadaganan at nayupi ang isang bagong kotse sa EDSA.

Simula alas-6:00 ngayong Lunes ng umaga, hindi muna makabibiyahe ang mga bus sang-ayon sa utos ni LTFRB Chairperson Winston Ginez para isailalim ang mga ito sa roadworthiness inspection.

Sasalang naman ang mga driver sa drug test at safety driving seminar.

Tumulak na patungo sa garahe ng Dela Rosa Transit sa Biñan, Laguna si Ginez kasama ang PUV Inspection Team at ilan pang miyembro ng board para sa inspeksyon.

Sakaling pumasa ang mga bus, makalalarga na rin ang mga ito maliban sa limang unit na kasama sa prangkisa ng naaksidenteng bus na suspendido sa loob ng 30-araw simula noong Biyernes. JOHNNY ARASGA

BINUBUSISI na ngayon ng awtoridad ang naganap na suwagan ng isang pampasaherong van at forward truck sa National Highway sa Kilometer Mabohay Bansalan, Davao del Sur.

Sa inisyal na imbestigasyon, karamihan sa mga namatay ay mga pasahero ng GT Express Service Van na biyaheng Kidapawan City-Davao City.

Dahil sa lakas ng impact, halos nabasag ang lahat ng salamin ng van at nagkalat ang dugo ng mga biktima.

Samantalang ang nakabangga na forward truck ay dumiretso naman sa bangin sa National Highway.

Napag-alamang nakatulog umano ang driver ng forward truck kaya nagsalpukan ang dalawang sasakyan.

Sa kasalukuyan, inaalam pa ng Bansalan PNP ang pangalan ng mga biktima. JOHNNY ARASGA

LAGAS ang isang miyembro ng Abu Sayyaf Group (ASG) matapos makaengkwentro ang militar at Moro Islamic Liberation Front (MILF) sa Sumisip, Basilan.

Sabado ng umaga nang magpadala ng tatlong platoon ng 64th Infantry Division ang militar upang sumaklolo sa MILF nang makaengkwentro nito ang nasa 50 miyembro ng ASG sa Barangay Baiwas.

Umatras ang ASG nang makita ang ipinadalang reinforcement ng pamahalaan.

Sugatan sa insidente ang isang miyembro ng MILF na agad isinugod sa Basilan Community Hospital.

Bahagi ito ng mas pinaigting na kampanya laban sa rebeldeng grupo. JOHNNY ARASGA

SAN JUAN, PANGASINAN – isang 18-year-old na binata ang patay matapos malunod habang nagswi-swimming sa isang barangay sa bayan ng San Juan sa nasabing lalawigan kahapon, February 8.

Kinilala ng NDRRMC ang biktimang si Paul Tabao-Ican, ng nasabing bayan.

Sa imbestigasyon ng San Juan police, nalunod ang bata sanhi ng malakas ng water current ng dagat alas-5:45 p.m. sa Bgy. Urbiztondo.

Ang katawan ng biktima ay narekober sa hindi kalayuang lugar at wala ng buhay.

Nagbabala ang local rescue teams na huwag maliligo sa dagat ‘pag masyado na itong hapon sapagkat malakas na ang water current. ALLAN BERGONIA

TODAS makaraang barilins sa ulo isa driver ng UV Express malapit sa gas station sa J.P. Rizal St. sa Bgy. Balite Rodriguez, Rizal kaninang umaga, Lunes, Pebrero 9.

Kasalukuyang nag-iimbestiga ang pulisya sa pagkakakilanlan ng suspek at kung ano ang motibo sa pamamaril.

“Nagpaparada ang biktima nang binaril,” ayon kay Rodriguez police head Superintendent Robert sa panayam sa radyo.

Sa inisyal na imbestigasyon, kinilala ang biktimang si Karding Pabliga, 53, na umano’y magpapagasolina nang mangyari ang insidente.

Nagmamaniobra umano si Pabliga malapit sa gas station nang lumapit ang suspek sa kanyang sasakyan saka siya na binaril sa ulo sanhi ng agarang niyang pagkamatay. MARJORIE DACORO

ISANG 32-anyos na lalaki ang natagpuang nakabitin ng nylon cord sa loob ng kanyang k​uwarto sa Tondo, Maynila kagabi.

Hinihinalang may ilang oras nang patay ang biktimang si Jeck Monteverde, binata, walang trabaho, ng 991 Int., 16 Hermosa St., Tondo.

Sa ulat ni SPO1 Charles John Duran ng Manila Police District (MPD)-homicide section, dakong 7:30 ng gabi nang nadiskureng patay ang biktima sa loob ng kanyang kuwarto.

Alas-8:00 ng umaga nang lumabas ito at humingi ng mainit na tubig sa malapit na tindahan saka bumalik ulit sa kanyang kuwarto.

Ganap na alas-7:30 ng gabi nang isang Rona Froa, 16, ang naghanap sa biktima upang maningil ng utang, subalit nakailang katok na siya ay wala pa ring sumasagot dahilan upang sumilip sa butas ng bahay at makita ang biktimang nakabigti na agad naman nitong ipinaalam sa kapitbahay na si Greg Navarro, 47.

Bunsod nito, pwersahang sinira ni Navarro ang pintuan ng bahay ng biktima at inalis sa pagkakabigti ang biktimang wala ng buhay.

Inaalam pa ng pulisya kung may naganap na foul play sa insidente. JOCELYN TABANGCURA-DOMENDEN

DAKIP ang isang mag-asawang hinihinalang big-time drug pusher sa San Fernando, Pampanga ng Regional Philippine Drug Enforcement Agency (PDEA) Central Luzon kamakalawa.

Sa ulat sa tanggapan ni PDEA-3 director Jeoffrey Tacio, kinilala ang mga suspek na sina  Paul Omina, 33, at Merlyn Ates, 32, kapwa ng Bgy. San Antonio 1, Noveleta, Tanza, Cavite.

Sa tulong ng isang impormante, nagsagawa kaagad ng isang buy-bust operation na may nagpanggap na poseur buyer sa isang fastfood chain sa kahabaan ng Jose Abad Santos Ave., at nakumpiska sa mga ito ang isang plastic heat-sealed sachet na hinihinalang shabu na may timbang na humigit kumulang sa 200 gramo na may street value na P700.000.

Kasong paglabag sa Section 5 at 11, ng Art. II ng R.A. 9165 ang kakaharapin ng mga ito na kasalukuyan nang nakadetine sa PDEA-3 compound. GARY BERNARDO

PINAINOM muna ng sleeping pills saka binalutan ng plastic bag ang ulo ng kanilang tatlong anak bago naglason ang mag-asawang Taiwanese national na natagpuang wala ng buhay sa kanilang bahay sa San Juan City nitong Linggo ng umaga.

Ito ang lumabas na resulta ngayon sa pagsisiyasat ng mga imbestigador sa nasabing kaso ni San Juan City Police Chief Supt. Ariel Arcinas hinggil sa pagkamatay ng mga biktimang sina Luis Hsieh, 50, misis nitong si Roxanne, 53, at mga anak na sina Amanda, 19, Heffrey, 14, at Josh, 12.

Sa madaling salita, plinano ng mag-asawang Hsieh ang krimen nang hindi pinaaalam sa kanilang mga anak.

Sa ulat, pinakain muna umano ng may pampatulog na pagkain ng mag-asawa ang kanilang anak saka sinakluban ng plastic sa ulo nang makatulog na at binalutan ng masking tape para hindi makahinga hanggang sa mamatay. Ipinuwesto ng mag-asawa si Amanda sa kuwarto nito habang ang dalawang lalaking anak ay inihiga sa sahig ng kanilang master bedroom.

Matapos ito, lumaklak naman umano ng lason ang mag-asawang Hsieh saka ipinuwesto ang kanilang sarili sa kama ng kanilang master bedroom.

Nang madiskubre ang mga bangkay ng mag-asawang ay kapwa bumubula ang mga ibig na isang senyales ng uminom sila ng lason.

Ang nasabing mga teyorya ay lalo namang pinagtibay ng mga kasambahay ng Hsieh family na nagsabing nagluto ang naturang ginang ng isang putahe na kinalauna’y pinakain umano sa kanyang tatlong anak.

Tumitibay din ang mga ebidensya na pagkalugi ng kanilang furniture business at malaking pagkakautang nila na umaabot ng milyon-milyon ang motibo sa nangyari family suicide pact. ROBERT TICZON

MASUSING iniimbestigahan ng Pasay City Police ang motibo sa pamamaslang sa isang taxi driver nang madiskubre na lamang itong wala ng buhay at tadtad ng saksak sa katawan sa loob ng kanyang minamanehong taxi kahapon sa nabatid na lungsod.

Patay na nang madiskubre ang biktimang si Soriano Pantinople, Jr., nasa hustong gulang, ng #780 Masagana Homes, Phase 3, Tabang, Guiguinto, Bulacan, sanhi ng mga tinamong saksak sa iba’t ibang bahagi ng katawan.

Inaalam naman ng pulisya ang pagkakakilanlan ng suspek na agad tumakas matapos ang pananaksak sa biktima.

Sa imbestigasyon nina SP04 Ronaldo Frades at SP01 Rodolfo Suquina, Jr., ng Station Investigation and Detective Management Branch (SIDMB), Pasay City Police, alas-4:03 kahapon ng umaga nang matagpuan ang biktimang bangkay na sa loob ng minamaneho nitong puting taxi na may body name na “Arnaiz Taxi” at may plakang TYF-644 na nakabalandra sa kahabaan ng Piccio Garden Rd., malapit sa Villamor Air Base Elementary School, Pasay City High School at Philippine School of Aeronautics, ng naturang lungsod.

Sa salaysay ng guwardiyang si Tomas Romeo Chiong, 22, ng Z-Four Security Agency, alas-3:35 ng madaling-araw habang nagpapatrulya siya sa naturang lugar nang makarinig siya ng malakas na ingay mula sa naturang taxi, kung agad niya itong pinuntahan.

Nang puntahan ng guwardiya ang pinagmulan ng ingay ay namataan niya ang tatlong lalaking naglalakad malapit sa nabatid na taxi na pawang nasa 20-anyos ang edad, mga lasing at malalakas ang boses, na nakasuot ng dilaw na polo shirt na may nakasulat na “Criminology” at naka-short pants.

Agad na umalis papalayo ang tatlong lalaki nang makita nila ang guwardiya.

Ilang minuto lamang ang nakalipas ay nadiskubre ang bangkay ng biktima kaya’t agad itong ipinagbigay-alam sa mga awtoridad.

Sa isinagawang technical investigation ng mga tauhan ng Scene of the Crime Office, Southern Police District (SOCO-SPD), narekober sa bulsa ng biktima ang kanyang driver’s license, security guard license at P3,500 cash.

Iniimbestigahan pa rin ng pulisya kung biktima ito ng panghoholdap. JAY REYES

LIGTAS na naibaba sa billboard sa EDSA-Kamuning ang isang lalaking nakilalang si Joshua Ortega, 20, taga-La Union.

Matapos ang dalawang oras ay nagawang maibaba ng mga rescuers si Ortega na tinangkang tumalon mula sa itaas ng nasabing billboard.

Nagdulot ito ng pagbigat sa daloy ng trapiko dahil bukod sa mga nakaharang na firetruck ay maraming mga sasakyan din ang nagsihintuan para makiusyoso.

Napag-alamang problema sa pag-ibig ang dahilan ng tangkang pagtalon ni Ortega dahil nakipagrelasyon umano ito sa asawa ng kapatid niya o hipag nito.

Dinala na sa presinto si Ortega at sasampahan ng kasong alarming scandal. GILBERT MENDIOLA

NALAGAS na naman ang isang sundalo sa naganap na engkwentro laban sa pwersa ng New People’s Army (NPA) sa Bgy. Imelda, Las Navas, Northern Samar.

Ihahain ng militar ang warrant of arrest laban sa isang Lopito “Demit” Bucatcat at mga kasamahan nitong nagsasanay umano sa paggawa ng pampasabog noong Pebrero 3 nang makabakbakan ang NPA.

Makalipas ang 15-minuto, umatras ang NPA pero nalagasan na ng isa ang militar. Kinilala ang napatay na sundalo na si 2nd Lt. Raphael Cubillan, 23.

Labis naman ang pagluluksa ng mga kaanak ni Cubillan lalo’t nagsisimula pa lang ang karera nitong bilang sundalo. Kabilang si Cubillan sa PMA Class 2014. JOHNNY ARASGA

BINMALEY, PANGASINAN – Isang security guard ang patay habang tatlo ang malubhang sugatan nang magbanggaan ang dalawang motosiklo sa Bgy. Dulag, Binmaley sa nasabing lalawigan.

Dead-on-the spot ang driver ng isang motorsiklo na si Rey delos Santos, ng nasabing bayan, na nagtamo ng head at body injury.

Samantala, itinakbo sa pinakamalapit na pagamutan dahil sa tinamong mga sugat sina Jojemar Fernandez, Jonald Sandoral at Jerome Mendoza.

Napag-alamang mga walang helmet at mga nakainom pa ang mga biktima nang mangyari ang insidente.

“Wala pong ilaw sa lugar na nagbanggaan, madilim ‘yung area. Mabilis po ‘yung takbo ng mga sasakyan,” ani Binmaley police deputy commander Chief Inspector Ildefonso Cojpag. ALLAN BERGONIA