PATAY ang isang dating barangay executive officer na sinasabing sangkot sa droga matapos pagbabarilin ng hinihinalang miyembro ng vigilante group kaninang umaga, Disyembre 16, sa Brgy. Tugatog, Malabon City.

Kinilala ni Malabon Police C/S Supt. John Chua ang nasawing si Reynaldo Cruz, 57, ng No. 10, Plata St., Brgy. Tugatog na nagtamo ng tama ng bala sa katawan at ulo na agaran nitong ikinamatay.

Sa ulat, alas-7:00 kanina, naglalakad si Cruz sa Nervana St., Brgy. Tugatog nang biglang harangin ng dalawang suspek na sakay ng motorsiklo at pagbabarilin.

Bago tumakas, nag-iwan pa ang mga gunman ng kapirasong papel na may nakasulat na “Huwag ako tularan. Pusher ako, susunod ka na.”

Narekober sa pinangyarihan ang dalawang empty shells ng cal. 9mm. at ilang pirasong sachet ng shabu naman sa loob ng bulsa ng biktima. ROGER PANIZAL

NALAGAS sa malagim na aksidente ang isang mayor ng Isabela town habang sugatan naman ang tatlong iba pa nang sumemplang ang kanilang sinasakyang van sa kinukumpuning kalsada sa Santiago City nitong Huwebes ng gabi.

Namatay habang ginagamot sa ospital sanhi ng tinamong pinsala sa ulo at katawan ang biktimang si Palanan Mayor Rodolfo Bernardo Jr., 57.

Sugatan naman ang iba pang kasama sa sasakyan ni Bernardo Jr. na sina Engr. Melito Casasola, Jr., 39, at Municipal Planning and Development Coordinator (MPDC) ng LGU-Palanan; Engr. Emerson Velarde, 46, MPDC naman ng Divilacan, Isabela at ang driver na si Rommel Donato Alvarez, 24, ng Woodcrest, Cauayan City.

Naganap ang insidente dakong 11:14 p.m. sa national highway ng Santiago City.

Ayon kay Traffic Management Group ng Santiago City Police Office (SCPO) chief P/Supt. Genato Birung, lulan si Mayor Bernardo at iba pang biktima ng kanyang Toyota Fortuner (ZTY 898) na minamaneho ni Alvarez.

Pagsapit sa lugar, hindi napansin ni Alvarez na inaayos ang isang bahagi ng national highway at inunahan nito ang isang sasakyan.

Dahil dito, na-swak ang van sa isang butas at samabog ang gulong bago bumaligtad nang ilang ulit sa kalsda saka sumadsad sa irigasyon.

Sa panayam kay Alvarez sa ospital, sinabi niyang hindi niya napansin ang kinukumpuning daan dahil sa kakulangan ng signages.

Sina Mayor Bernardo, Casasola at Velarde ay galing sa seminar na isinagawa ng Department of Interior and Local Government (DILG) sa Metro Manila at pauwi na sa Cauayan City nang mangyari ang aksidente. BOBBY TICZON

TUBAO, LA UNION – Patay ang isang 10-taong-gulang na babae kahapon matapos masagasaan ng Sport Utility Vehicle (SUV) sa bayan ng Tubaosa nasabing lalawigan.

Kinilala ng Tubao Police Station (TPS) ang biktimang si Analyn Gaguas, ng Brgy. Rizal sa nasabing bayan.

Sa imbestigasyon, sinabi ng TPS na binabagtas ng sasakyang minaneho ni Alexander Licop, 48, ng Mabalacat, Pampanga, ang nasabing kalsada patungo sa silangan nang biglang tumawid ang bata.

Dito ay nahagip ang biktima at nagtamo ng malalang mga sugat sa katawan na nagdulot ng kanyang agarang pagkamatay.

Sa ngayon, hawak ng pulisya ang driver at patuloy ang sinasagawang imbestigasyon hinggil sa aksidente. ALLAN BERGONIA

NAHAHARAP sa kaso ang isang pulis-Biñan makaraang makunan sa video na binabaril ang isang lalaking nagwawala umano at nagpupumilit na pumasok sa loob ng isang bangko sa San Pedro, Laguna nitong Biyernes.

Ito’y matapos lumutang ang naturang video sa social media at makarating sa kaalaman ng pumunuan ng San Pedro City police.

Sa naturang video, makikitang rumesponde ang pulis na nakilala sa pangalang PO3 Dizon sa pagwawala umano ng biktimang si Sharief Amatonding sa harap ng isang bangko sa San Pedro.

Tinangkang hilahin palabas ng bangko ng pulis si Amatonding ngunit mariin ang pagkakapit nito sa pintuan ng establisimiyento.

Nang hindi makuha sa paghila, bahagyang umatras ang pulis at pinaputukan ang biktima hanggang sa mapatay.

Bagama’t hindi nakunan ng video ang aktuwal na pamamaril, ilang putok naman ng baril ang maririnig sa background ng video.

Giit ng kampo ng Biñan police, nagtangka umanong mang-agaw ng baril ang nagwawalang si Amatonding kaya’t napilitan na ang suspek na pulis na paputukan ito.

Gayunman, sa bahagi ng video, malinaw na makikitang nakakapit lamang ito sa pintuan nang tutukan ng baril ng pulis. JOHNNY ARASGA

UTAS ang isang abogado at kanyang bodyguard matapos barilin habang dumadalo sa Misa de Gallo sa bayan ng San Pablo sa Isabela kaninang madaling-araw, Disyembre 20.

Kinilala ang abogadong si Atty. Arlan Castañeda habang inaalam pa ang pagkakakilanlan ng kanyang bodyguard.

Nabatid na dating sangguniang bayan member ang abogado at ngayon ay marami umanong hawak na kaso.

Sa ngayon, nagsasagawa pa ng imbestigasyon ang PNP para alamin kung sino ang dalawang salarin at kung ano ang motibo sa pamamaril sa mga biktima. JOHNNY ARASGA

ISANG meat dealer ang pinagbabaril ng riding-in-tandem kaninang madaling-araw sa Tondo, Maynila.

Namatay habang ginagamot sa Tondo Medical Center ang biktimang si Hector Borja, 47, meat dealer, ng 06 San Jose cor. Lacson St., Tondo, sanhi ng dalawang tama ng bala sa katawan.

Hindi naman nakilala ang mga suspek na tumakas matapos ang pamamaril lulan ng motorsiklo.

Sa ulat ni PO3 Roderick Magpale, ng Manila Police District –Homicide Section, nabatid na alas-3:00 ng madaling-araw nang maganap ang insidente sa Lacson Ave., kanto ng Simoun St. sa Tondo.

Kasalukuyan umanong nakatayo ang biktima sa naturang lugar nang hintuan ng mga suspek at kaagad pagbabarilin, bago humarurot patungo sa Ugbo St.

Patuloy na inaalam ng awtoridad ang motibo ng pamamaslang at pagkakilanlan ng mga suspek. JOCELYN TABANGCURA-DOMENDEN

TODAS ang isang 39-anyos na lalaki nang barilin ng isang pulis-Bicutan sa Tondo, Maynila kaninang umaga.

Binawian ng buhay habang ginagamot sa Gat Andres Bonifacio Hospital ang biktimang si Augusto Bulan, ng Pier 18 Vitas St., Balut, Tondo, Maynila sanhi ng tama ng bala sa katawan.

Pinaghahanap naman ng pulisya ang suspek na si PO2 Roderick Maniti, nakatalaga sa National Capital Regional Police Office (NCRPO) at taga-Malabon City.

Sa ulat ni SPO2 Milbert Balingan ng Manila Police District (MPD)-Homicide Section, dakong 5:20 ng umaga nang naganap ang insidente sa C. M. Recto malapit sa panulukan ng Sto. Cristo St., Tondo.

Sa imbestigasyon, katatapos lamang rolyohin at ayusin ng biktima at ni Rodolfo Rivera, 16, ang isang electrical wire at habang naglalakad upang ihatid sa isang warehouse ang narolyong wire ay nakasalubong nila ang suspek at binati ang biktima at sinabing “Ok ka lang Pare”.

Gayunman, hindi pinansin ng dalawa ang suspek na ikinagalit naman ng huli dahilan para bumunot ng baril at walang sabi-sabing pinaputukan ang biktima.

Hindi pa nakuntento ang suspek, muli pa nitong nilapitan ang biktima at muling binaril saka kaswal na naglakad papalayo sa lugar.

Ang bangkay ng biktima ay kasalukuyang nakalagak sa Sol Funeral para sa safekeeping at awtopsiya. JOCELYN TABANGCURA-DOMENDEN

NAPAGBALINGAN lamang ng galit matapos umawat sa away ang isang 48-anyos na karpintero na sinaksak ng tricycle driver kagabi sa Tondo, Maynila.

Patay na bago dumating sa Ospital ng Tondo ang biktimang si Romeo Agocejo, ng 753 A Kagandahan St., Tondo, Manila sanhi ng mga saksak sa katawan.

Tumakas naman ang suspek na si Anthony dela Paz, alyas Mark, 33, may-asawa, ng 750 Interior 15 J. A. Planas St., Gagalangin, Tondo.

Sa ulat ni SPO2 Joseph Kabigting, ng Manila Police District (MPD)-Homicide Section, alas-6:15 ng gabi nang maganap ang insidente sa G. Perfecto St. malapit sa panulukan ng Kagandahan St., Gagalangin.

Nauna rito, kararating lamang ng biktima sa trabaho ng nasabit sa pakikipagkwentuhan sa kanyang kapitbahay na si Jack Lou Hernandez hanggang sa dumating ang suspek na armado ng patalim at sinabihan ang huli na “Ano ngayon, kayo matatapang” at walang sabi-sabing sinugod ito ng saksak.

Nakailag si Hernandez kaya namagitan ang biktima subalit ikinagalit ito ng suspek kaya siya naman ang binalingan at inundayan ng saksak na agad napuruhan sa dibdib.

Bagama’t may tama, tumakbo papalayo ang biktima subalit hinabol siya ng suspek hanggang sa madapa ito at muling pinagsasaksak hanggang sa mawalan na ng malay.

Kasalukuyang nakalagak ang bangkay ng biktima sa Amurao Funeral Homes para sa safekeeping at awtopsiya. JOCELYN TABANGCURA-DOMENDEN

ISANG Grade III pupil ang hinalay umano sa bayan ng Lal-lo, Cagayan.

Ayon sa lola ng 9-anyos na biktima, nangangaroling ito kasama ang iba pang bata sa Brgy. Magapit nang isinakay ito ng nakamotorsiklong suspek kasama ang isa pang bata.

Nagtiwala umano ang dalawa na ibababa sila sa kanilang bahay sa nasabi ring barangay kung kaya’t pumayag silang sumakay nang yayain sila ng suspek.

Subalit, ibinaba umano ng suspek ang kasama ng biktima sa sementeryo ng Brgy. Tucalanna habang idineretso naman sa Brgy. Jurisdiction, Lal-lo ang biktima kung saan naganap ang panggagahasa.

Kwento ng lola ng biktima, umaga ng December 19 natagpuan ang biktima sa isang palayan sa Brgy. Jurisdiction matapos halayin doon nitong December 18.

Dalawang matandang nangangahoy ang nakakita sa nakahandusay na biktima na agad nilang itinawag sa rescue team ng bayan ng Lal-lo na siyang nagdala sa pagamutan.

Hinihinalang tinangkang patayin ng suspek ang biktima dahil puno umano ito ng pasa sa katawan at nanghihina ito nang makitang hubot-hubad sa palayan.

Sa ngayon ay nilalapatan ng lunas sa Cagayan Valley Medical Center (CVMC) ang biktima. JOHNNY ARASGA

TATLONG residente ng Brgy. Addition Hills ang namatay matapos pagbabarilin sa magkakahiwalay na lugar sa loob ng halos isang oras.

Unang pinasok ng armadong grupo ang bahay ni Jepoy Pinasbo na kilalang pusher sa barangay at pinagbabaril.

Bagama’t nadala pa sa pagamutan, idineklara rin itong dead-on-arrival sanhi ng mga tama ng bala.

Nasaksihan naman ng isa pang biktimang si Bubot Sarvida ang pangyayari, habang pauwi na sana galing ng pagsamba sa kapilya ng Saksi ni Jehova malapit lang sa lugar.

Dahil dito, sinundan umano ito ng suspek hanggang sa bahay at doon na binaril hanggang sa mapatay.

Ayon sa saksi, apat na motorsiklo ang pinagsakyan ng walong katao sa pagtakas.

Sa hindi kalayuan, napatay naman sa tabi ng convenience store sa A. Bonifacio, Brgy. Hagdan Bato, Libis, Mandaluyong si Michael Desvarro, 39, ng Blk. 35, Brgy. Addition Hills, cigarette vendor.

Hinala naman ng asawa ng biktima na si Me-Anne Desvarro, may kinalaman ang amain ng kanyang asawa na dating pulis kung bakit pinagbibintingan na pusher si Michael kaya ito pinatay.

Mariin naman itinanggi ni Me-Anne na gumagamit ng bawal na gamot o nagbebenta ang kanyang asawa.

Mabait umanong asawa ang biktima na matiyagang nagbebenta ng sigarilyo sa tabi ng convenience store sa A. Bonifacio tuwing gabi. JOHNNY ARASGA

ISANG dalagita ang nasugatan sa patuloy na pamamaslang sa mga pinaghihinalaang tulak ng bawal na gamot.

Sa Sto. Rosario st. Brgy. Plainview, Mandaluyong, tinamaan ng bala ng baril sa kaliwang binti ang 15-anyos na si Jennica Perez, matapos barilin sa tabi niya si Annabelle dela cruz na kilalang runner ng bawal na gamot sa lugar.

Ayon sa tanod na si Danilo Alabado, parehong naglalakad pababa ng Sto. Rosario St. si Dela Cruz at Perez nang lapitan ng dalawang armadong lalaki si Dela Cruz at pagbabarilin.

Sa takot, tumakbo papatakas si Dela Cruz habang sumunod naman sa kanya ang dalagita papasok ng eskinita kaya nadamay ito nang muling paputukan ng dalawang suspek si Dela Cruz na bagama’t naisugod pa sa ospital ay binawian din ng buhay.

Ayon kay Alabado, si Dela Cruz ay minsan nang sumuko sa Oplan Tokhang pero hindi umano nagbago sa pagiging runner ng bawal na gamot.

Ilang oras bago ang pamamaril sa ginang, tatlo pang biktima ng pamamaril ang naitala sa Mandaluyong City.

Pawang mga lalaking nakamotor ang pasimuno ng sunud-sunod na pamamaril sa lungsod. JOHNNY ARASGA

KULONG ang isang encoder matapos ireklamo ng isang limang-buwang buntis na menor-de-edad ng panggagahasa sa loob ng kanilang tahanan sa Tondo, Maynila.

Hawak ngayon ng Manila Police District (MPD)-Station 1 ang suspek na si Jayman Daguy, 24, binata, encoder, taga-Tondo.

Nag-ugat ang pagkakaaresto sa suspek bunsod ng reklamo ni Annie (‘di tunay na pangalan) may live-in partner.

Sa report ni Supt. Robert Domingo, Station Commander ng MPD-Station 1, dakong 10:15 ng gabi naganap ang insidente sa loob ng bahay ng biktima.

Ayon sa biktima, mag-isa lamang ito nang pasukin siya ng suspek at sapilitang ginahasa.

Naireklamo kaagad ng biktima ang suspek na nagresulta sa kanyang pagkaaresto matapos ang follow-up operation ng mga awtoridad dakong 2:00 ng madaling araw. JOCELYN TABANGCURA-DOMENDEN

PUMALO na sa 90 ang bilang ng nabiktima ng paputok mula nang simulan ang kampanya ng Department of Health (DOH) noong Disyembre 22 na iwas-paputok.

Ito’y ilang araw pa bago sumapit ang pagsalubong sa taong 2017 o Bagong Taon.

Sa press conference ni Health Sec. Pauline Jeane Ubial, isa ang naitalang nakalunok ng watusi, habang 89 ang nasugatan sa paputok.

Ang piccolo pa rin ang pangunahing dahilan ng firecracker related-injuries kung saan pawang mga kabataan ang biktima.

Sa datos na hawak ng DOH, 58 porsyento ng nasabing bilang ay galing sa iligal na piccolo.

Mula naman sa National Capital Region (NCR) ang may pinakamaraming bilang ng insidente ng naputukan na sinundan ng Region 6, CALABARZON at Region 4-A. JOCELYN TABANGCURA-DOMENDEN

LIMANG katao ang nasa malubhang lagay habang higit sa 30 naman ang nasugatan nang magkasunod na sumabog ang dalawang improvised explosive device (IED) sa isang boxing arena sa Leyte town nitong Miyerkules ng gabi.

Sinabi ni P/Supt Franco Simborio, hepe ng Leyte Police Provincial Office (LPPO), kinilala ang mga biktimang sina John Reynal Lamo, 15, Vicente Nunez, 24, Jessica Geli, 19, Mary Aves, 31, Ricardo Regaton, 53, Jun Rey Lumbre, 20, Aldrin Goltiano, Joseph Ryan Bohol, 24, Domingo Oliva, 60, Kevin Manicar, 13, Cristita Ano-Os, 47, Jay Miguel Liba, 15, Christian Lelis, 14, Letecia Liba, 55, Erwin Liba, 33, Rudy Bulfa, 33, Giselle Managbanag, 25, Edgar Acsol, 56, Elmer Rebullos, 27, King Michael Melgazo, 15, Leonilo Villaro, 28, Doroteo Libres, 50, Roselyn Lasmarias, 42, Wilbert Fornis Alingasa, 14, Guillermo Solera, Rogelio Managbanag, 26, Banoy Abes, 31, Marnilo Macarat Lusuegro, Chris Angel Abina, 7, Jessie Abina, 32, Marcelina Abina, 67, habang ang ilan naman ay hindi nakuha ang mga pangalan.

Karamihan sa mga ay kalalakihang nagtamo ng shrapnels sa katawan.
Isinugod ang karamihan sa Hilongos District hospital habang ang ilan naman ay sa Baptist Hospital sa Tacloban City .

Blangko pa ang pulisya sa kung sino ang mga taong nasa likod ng pagpapasabog at kung ano rin ang motibo sa pag-atake.

Sa ulat, naganap ang insidente dakong 9:20 p.m. sa tapat ng Hilongos Municipal Hall.

Bago ito, nagdiriwang ng kapistahan ang Hilangos town at nagpa-boxing sa tapat ng naturang munisipyo.

Pero habang nanonood ng laban ang mga boxing fans, biglang sumambulat ang isang bomba na itinanim sa ilalim ng boxing arena at ilang segundo lamang ang nakalipas ay sinundan pa ulit ng isa pang pagpasabog.

Ayon kay Simborio, may isa pang bomba ang narekober sa lugar at sinuwerteng hindi sumabog habang ang ginamit bilang pampasabog ay bala ng 81mm. mortar.

Ang una aniyang pagsabog ay full blast habang ang sumunod naman ay “low order” o halos kalahating pagsabog lamang.

Mayroon na aniyang natukoy na ilang “person of interests” pero patuloy pa ring na iniimbestigahan ang pagkakakilalanlan ng mga ito.

Nire-review na rin nila ang CCTV footage para malaman ang kabuang nangyari sa naturang insidente. BOBBY TICZON/PHOTO BY:  BOHBIE FLORES

PITONG katao kabilang ang isang buntis at dalawang menor-de-edad ang namatay habang isa naman ang nasa kritikal na kalagayan matapos pagbabarilin ng apat na hindi kilalang mga suspek sa Caloocan City kagabi.

Kinilala ni Northern Police District (NPD) Director S/Supt. Roberto Fajardo ang mga biktimang sina Angelito Soriano, 16, Grade 8 student ng Bagong Silang High School, ng Blk. 25, Phase 8A, Package 14, Brgy. 176; Jonel Segovia, 15, ng Phase 8A, Package 14; Sonny Espinosa, 20, ng Phase 8A, Package 14, Blk. 15, Excess Lot; Cristina Santor, 45, at Analyn Dayamla, 25, kapwa ng Blk. 17, Lot 36, Phase 8A, Package 14 na agad namatay sa pinangyarihan ng krimen sanhi ng mga tama ng bala habang sina Ednel Santor, 22, at Kenneth Lim, 25, ay idineklarang dead-on-arrival sa Jose Rodriguez Memorial Hospital.

Ginagamot naman sa naturang pagamutan si Edward Villanueva, 18, ng Phase 8A, Package 14, sanhi ng tinamong tama ng bala sa katawan.

Sa ulat, dakong 9:00 ng gabi, nasa loob ng Santor residence ang mga biktima nang pasukin ang mga ito ng apat na armadong suspek na pawang nakabonet at maskara at walang sabi-sabing pinagbabaril ang mga biktima saka mabilis na tumakas sakay ng dalawang motorsiklo.

Sa pahayag ni Brgy. 176 Purok Leader Ludencio Ramos sa pulisya, ang bahay ng Santor family ay ginagawa umanong batakan ng droga tuwing gabi at sinabi rin nitong ang mga menor-de-edad na mga biktima ay miyembro ng Scout Royal Brotherhood gang sa pamumuno ng isang Toks Francisco kung saan sangkot ang mga ito sa mga gang wars sa naturang lugar.

Ilang drug paraphernalia, tatlong plastic sachet ng hinihinalang shabu at 16 basyo ng bala ang narekober sa pinangyarihan ng insidente.

Ayon naman kay Caloocan deputy police chief for administration Supt. Ferdie del Rosario, isa sa apat na suspek ang kanilang naaresto na hindi muna nila pinangalanan habang patuloy pa rin ang follow-up operation sa tatlong pang mga kasamahan nito.

Sa isinagawang press conference kahapon ng umaga sa Caloocan Police station, binigyan ni Philippine National Police (PNP) chief Dir. Gen. Ronald “Bato” dela Rosa si city police chief S/Supt. Johnson Almazan ng 24-oras upang resolbahin ang naturang krimen simula alas-9:00 ng umaga kahapon.

Sakaling mabigo si Almazan na maresolba ang naturang krimen ay tatanggalin niya ito sa puwesto kabilang ang pinuno ng Police Community Precinct (PCP) na nakakasakop sa pinangyarihan ng insidente.

“Pati ang District Director (S/Supt. Fajardo) sisibakin ko kapag hindi ako satisfy sa resulta ng kanilang follow-up operation,” ani Dela Rosa.

Sinabi pa ni Dela Rosa na ang motibo sa pagpatay ay hinggil sa drug war sa pagitan ng dalawang drug gangs ng San Jose del Monte City (SJDMC) sa Bulacan at ang drug gangs na nakabase sa naman Caloocan.

“Onsehan ito sa droga, nag-aaway sila dahil hindi nagkabayaran sa kanilang drug transaction,” dagdag na pahayag ni Dela Rosa. RENE MANAHAN

SAN JUAN, ILOCOS SUR – Kulam, ito ang pinaniniwalaang dahilan sa pagbaril sa mag-asawa na ikinamatay ng lalaki at ikinasugat ng babae sa bayan ng San Juan sa nasabing lalawigan kahapon, December 29.

Sinabi ng San Juan police, nagtamo ng tama ng baril sa iba’t ibang bahagi ng katawan si Joselito Briones, 54, na siyang dahilan ng kanyang agarang kamatayan.

Samantala, ang kanyang asawang si Lorna Briones, 53, ay nabaril sa kanyang hita.

Ayon kay San Juan police Commander C/Insp. Benjamin Raquedan, dumaan ang suspek na si Romeo Collado Jr., ng Tamurong, Sta. Catalina, Ilocos Sur, sa terrace ng tahanan ng mag-asawa at pinagbabaril sila habang kumakain.

Ayon kay Raquedan, mismong si Mrs. Briones ang nagsabi na nakita niya mismo si Collado na siyang bumaril sa kanila.

Sa police report, si Lorna at Joselito ay anak at manugang ng nabaril noon na si Ninay Raping na umano’y kumulam sa mga namatay na kapamilya ng suspek.

Ilang oras, inaresto ng mga police ang suspek at siya ngayon ay nakakulong San Juan police station. ALLAN BERGONIA

ARESTADO ang 15-anyos na Muslim matapos nitong saksakin ang isang 29-anyos na pedicab driver na nambully sa kanya sa Tondo, Maynila.

Ginagamot naman sa Jose Reyes Memorial Medical Center (JRMMC) ang biktimang si Ernesto Gavino, ng 1328 A.H. Lacson St. Sta.Cruz, Maynila dahil sa tama ng saksak sa likurang bahagi ng katawan.

Kinilala naman ang naarestong suspek na si Jimmy ng Tondo, Maynila.

Ayon kay SPO2 Gene Reyes, ng Manila Police District-Police Station 2 ,dakong alas-4 ng hapon nang mangyari ang insidente sa panulukan ng Quiricada at Almeda St. Tondo, Maynila.

Ayon sa biktima, namamasada umano siya sa nabanggit na lugar nang biglang sumulpot ang suspek at kaagad siyang sinaksak sa likuran.

Nakorner naman ang suspek ng mga tao sa lugar at saka dinala sa himpilan ng pulisya para sa kaukulang imbestigasyon.

Nabatid na nagalit umano ang biktima sa suspek dahil sa pambu-bully nito sa kanya. JOCELYN TABANGCURA-DOMENDEN

INULAT ng Department of Health (DOH) na pumalo na sa 116 ang bilang ng mga firecracker-related injuries na naitala nila, isang araw bago ang bisperas ng Bagong Taon.

Nabatid na ang naturang bilang ay naitala ng DOH simula Disyembre 21, kung kailan sinimulan nila ang monitoring dito, hanggang 6:00 ng umaga lamang ng Disyembre 30.

Nilinaw naman ng DOH na mas mababa pa rin ang naturang bilang ng 71 kaso o 38% kumpara sa 187 na naitalang firecracker-related injuries sa kahalintulad na petsa noong 2015.

Mahigit kalahati ng naturang bilang o 63% ay mula sa National Capital Region (NCR) at ang mga biktima ay nagkakaedad ng mula tatlong taong gulang hanggang 62-anyos.

Ang 108 sa mga biktima ay mga lalaki habang 89 naman ang mga bata.

Ang 115 sa kanila ay nasugatan dahil sa paputok habang isa naman ang nakalunok ng paputok.

Ang 76 sa mga biktima ay nagtamo ng sugat sa kamay habang 21 naman ang nasugatan sa mata at 21 naman ang nasugatan habang nanonood ng nagpapaputok o di kaya’y napadaan sa mga lugar na may nagpapaputok.

Patuloy pa rin namang nambibiktima ang mga ipinagbabawal na paputok, tulad ng piccolo na nakasugat na sa 69 indibidwal, na karamihan ay mga bata, at ang boga, na nakapambiktima naman ng 11 katao.

Wala pa namang naitatalang insidente nang pagkamatay dahil sa paputok ang DOH.  MACS BORJA

ISA na ang naitalang biktima na ligaw na bala sa bansa .

Ito ang kinumpirma ng Department of Health (DOH) ngayon kung saan ito ay mula anila sa probinsya ng Nueva Ecija.

Ayon kay Health Spokesperson Dr. Eric Tayag, lalaki ang biktima na nasa edad 27 .

Ito ay tinamaan ng stray bullet sa ulo habang kasalukuyang nanonood ng telebisyon sa kanilang bahay sa bayan ng Bagbag sa Nueva Viscaya nitong nakalipas na Disyembre 25.

Sa nakalap na impormasyon ng DOH, inakala umano ng pamilya ng biktima na paputok lamang ang narinig na pagsabog.

Gayunman, nang makita ang biktima ay nakitang may umaagos na dugo sa kanyang ulo na ngayon ay inoobersabahan pa ng mga doktor at pinag-aaralan kong kinakailangang tanggalin ang bala na nakabaon pa sa kanyang utak.

Batay sa huling datos ng DOH umabot na sa 116 ang kaso ng firecracker related injuries mula Disyembre 21 .

Mas mababa naman ang nasabing bilang kumapara sa nakalipas na taon na may 187 lamang.

Umaasa naman ang DOH na hindi na ito lumubo pa ng malaki kasabay ng paalala sa publiko na umiwas sa paputok upang malayo sa anumang disgrasya na minsan ay nauuwi sa kamatayan. JOCELYN TABANGCURA-DOMENDEN