TIGOK ang isang lalaki matapos hindi makapagbayad ng kanyang inutang na shabu mula sa isang kilalang drug dealer sa Brgy. Lapasan, Cagayan de Oro city.

Kinilala ng Agora Police Station 3 (PP-3) ang napaslang na biktima na si Jhonnie Rey Flores alyas Jongjong, 26 taong gulang, may-asawa at residente ng nasabing lugar.

Ayon kay Police Senior Inspector Gerry Ligan, deputy station commander ng PP-3, ibinulgar ng kanyang mga kaibigan na may malaking atraso ang biktima sa suspek na kinilalang si Abdul Wahab, 46, Alyas Rayray.

Nangutang umano ng malaking halaga ng shabu ang biktima sa suspek at matagal nang hindi pa nakapagbayad.

Dahil dito, pinaslang ni Wahab ang biktima gamit ang cal. 45 na baril na hindi na umabot nang buhay sa tama ng bala sa ulo.

Sa ngayon ay nagsagawa na ng manhunt operation ang mga kapulisan laban sa suspek. -30-

PATAY ang isang 58-anyos na lola makaraang pagbabarilin ng tatlong armadong suspek sa Brgy. Batasan Hills, Quezon City kagabi, Hulyo 28.

Ayon sa report ni SPO3 Joel Gagasa, desk officer ng Quezon City Police District-Criminal Investigation and Detection Unit (QCPD-CIDU), nakilala ang biktimang si Berlina Bactol, negosyante, ng 104 Cotabato St., Brgy. Batasan Hills, QC.

Si Lola Berlina ay agad nasawi sa pinangyarihan ng insidente dahil sa tama ng bala ng kalibre .45 na baril.

Sa imbestigasyon ng CIDU, alas-10:30 ng gabi nang pagbabarilin ng tatlong armadong lalaki ang biktima sa kanto ng Cotabato St. at Sinangtala St., Brgy. Batasan Hills.

Nabatid na kasasakay pa lamang ng biktima sa tricycle para magpahatid sa TODA terminal sa IBP Rd. nang biglang humarang ang isang sasakyan na Toyota Corrola na walang plaka.

Sa puntong ito, lumabas ang mga suspek sa kotse saka hinatak si lola palabas ng tricycle at walang habas na pinagbabaril hanggang sa duguang humandusay.

Nang masigurong wala nang buhay ay mabilis na nagsitakas ang mga suspek sakay ng kotse patungo sa San Mateo Rd., Brgy. Batasan.

Agad naman ipinag-utos ni QCPD director C/Supt. Guillermo Lorenzo Eleazar sa kanyang mga tauhan ang pagtugis sa mga suspek at pag-alam sa motibo ng mga ito. SANTI CELARIO

HUMANTONG sa madugong bakbakan ang pagsisilbi ng search warrants nang kumasa sa mga miyembro ng Regional Criminal Investigation Detection Group (RDIDG) ang mga tauhan ni Ozamiz City Mayor Reynaldo Parojinog kaninang Linggo ng madaling-araw.

Sinabi ni Misamis Occidental Provincial Police Office chief S/Supt. Jaysen de Guzman, pawang namatay noon din sanhi ng mga tama ng bala sa katawan ang naturang mayor, asawa nitong si Susan, board member na si Octavio Parojinog at limang mga miyembro ng civilian volunteer organization na nakilalang sina Miguel del Victoria, Nestor Cabalan, Daniel Vasquez, at dalawang hindi pa nakikilalang lalaki.

May ilang kapulisan naman ang nasugatan sa pagsabog at ngayo’y nagpapagaling na lamang sa pagamutan.

Binitbit naman sa presinto ang vice mayor ng lungsod at anak ni Reynaldo na si Nova Princess Parojinog Echavez at ilan pang indibidwal at ngayo’y isinasailalim sa interogasyon.

Nakatakas naman at ngayo’y pinaghahanap ng pulisya ang isa pang board member na nakilalang si Ricardo Parojinog.

Sa ulat, naganap ang insidente dakong 2:30 a.m sa residential compound ng mga Parojinog sa Brgy. San Roque Lawis.

Bago ito, dumating sa residential compound ni Parojinog ang mga tauhan ng RCIDG para isilbi ang kanilang dala na anim na search warrants dahil sa pagtatago ng loose firearms.

Pero imbes makipag-usap o kwestiyunin ang hakbang, sinalubong ang mga pulis ng mga putok ng baril habang sila’y pumapasok sa compound ni Parojinog.

Dito na napilitang gumanti ng putok ang kapulisan na tumagal nang halos dalawang oras bago napasok isa-isa ang mga bahay ni Parojinog.

Sa inilatag na clearing operation, natagpuan ang bangkay ng mag=asawang Parojinog at iba pang mga biktima sa magkakahiwalay na bahay.

Ayon kay Supt. Lemuel Gonda, spokesman ng Police Regional Office 10, may natangggap siyang ulat na may 12 – 13 katao ang namatay sa insidente pero bineperipika pa ito.

Nakumpiska sa mga bahay ni Parojinog ang ilang piraso ng granada, M79 rifles, .45 pistols, at hindi malamang halaga ng shabu at pera.

Nakumpiska naman sa bahay ni dating board member at kasalukuyang city councilor Ardot Parojinog ang isang shotgun, tatlong rocket propelled grenade launchers, dalawang hand grenades, walong M79 bullets at isang M79 riffe, shabu paraphernalia, at mga shabu. Hindi ito inabutan sa kanyang bahay.

Ang operasyon ay pinangunahan ni C/Insp. Jovie Espenido, Ozamiz City police chief.

Matatandaang si Espenido rin ang hepe ng pulisya ng Albuera, Leyte, na ang dating mayor na si Rolando Espinosa, ay napatay ng mga pulis sa loob ng kulunngan nito noong nakaraang Nobyembre.

Naging laman din ng mga pahayagan ang pangalan ni Parojinog matapos makasama sa listahan ni Pangulong Rodrigo Duterte na mga pulitikong sangkot sa illegal drugs trade. BOBBY TICZON

TIMBOG ang isang Chinese National matapos magtangkang ipasok sa bansa ang mga smuggled Iphones na aabot sa 2.7 milyong piso ang halaga.

 Ayon sa Bureau of Customs, ang pasahero na kinilala sa pangalang ‘Wen Congkai’ ay lulan ng Xiamen Airlianes Flight 8667 at napag-alamang mayroong 61 iPhone units sa kanyang bagahe.

Ayon kay Major Jaybee Raul Cometa, pinuno ng X-Ray Inspection Project Unit walang naipakitang mga dokumento ng cellphones ang Chinese National kabilang ang importation documents at permit mula sa National Telecommunications Commission o NTC.

Inirekomenda ni Cometa ang paglalabas ng warrant of seizure and detention sa paglabag ni Wen sa Customs Modernization and Tariff Act at NTC memorandum circular.

Ayon sa BOC, magdadagdag pa sila ng 19 na bagong X-ray machines sa tatlong terminal ng NAIA para masugpo ang smuggling.

Sa kasalukuyan, mayroon lamang tig-isang X-ray machines ang BOC sa NAIA Terminal 1 at 2 at dalawang x-ray machines sa Terminal 3.  JOHNNY ARASGA

NABUBULOK na nang marekober ang bangkay ng pitong loggers na pawang dinukot at pinugutan ng bandidong Abu Sayyaf Group (ASG) sa lalawigan ng  Basilan kaninang umaga, Lunes.

Sinabi ni  C/Insp. John Cundo, hepe ng Maluso municipal police station, na unang narekober nitong Linggo ang bangkay ng mag-ama na nakilalang sina Nestor Divinagracia, 50, at ang kanyang anak na si Ily, 25, sa bulubunduking bahagi ng Campo Barn sa munisipyo ng Lantawan.

Sunod namang natagpuan ang mga bangkay ng lima pang biktima na nakilala namang sina Berto Lacastesantos, 48; Hernando Sally, 53; Renato Casiple Jr., 36; Rene Sanson, 28, at si Mamerto Falcasantos, 55.

Ang mga biktima ay kinilala mismo ng kanilang mga pamilya at kaanak sa pamamagitan ng kanilang mga kasuotan na damit.

Sinasabing ang mag-ama ay mga power saw operators sa lugar ay unang dinukot ng mga Abu Sayyaf noong Hulyo 20 matapos sunugin ang kanilang bahay sa may Barangay Lower Mahayahay, Maluso.

Sa parehong araw ay puwersahan ding dinala ng mga bandido ang lima pang mga biktima sa kabilang munisipyo naman ng Lantawan.

Nabatid na nagtanim pa ng bomba ang mga bandido malapit sa kinaroroonan ng mga bangkay na masuwerte na lamang at walang natamaan nang sumabog.

Ayon sa opisyal na lahat ng mga narekober na bangkay ay pugot na ang mga ulo at posible sunud-sunod na silang pinugutan noong araw nang dukutin sila dahil lahat ay nasa stage of decomposition at halos buto at balat na lamang ang natira.

Nauna na rito, napag-alaman pa na may ilan sa mga bangkay ay hiwa-hiwalay din ang parte ng katawan habang dalawa rin sa mga cadaver ang hindi pa nakita ang mga ulo.

Grupo ng Abu Sayyaf na pinamumunuan umano ng isang Pasil Bayali at Otoh Dobol ang itinuturong responsable sa pagdukot at pagpatay sa mga biktima.

Inaalam pa ng awtoridad kung may kinalaman ang pagiging mga logger ng mga biktima sa pagdukot at pagpatay sa kanila ng mga bandido.

Isa sa pitong mga biktima ay ama ng isang miyembro ng media sa Zamboanga City. BOBBY TICZON

TIMBOG ang isang Chinese National matapos magtangkang ipasok sa bansa ang mga smuggled iPhones na aabot sa P2.7-milyon ang halaga.

Ayon sa Bureau of Customs (BOC), ang pasahero na kinilala sa pangalang ‘Wen Congkai’ ay lulan ng Xiamen Airlianes Flight 8667 at napag-alamang mayroong 61 iPhone units sa bagahe.

Ayon kay Major Jaybee Raul Cometa, pinuno ng X-Ray Inspection Project Unit, walang naipakitang mga dokumento ng cellphones ang Chinese national kabilang ang importation documents at permit mula sa National Telecommunications Commission (NTC).

Inirekomenda ni Cometa ang paglalabas ng warrant of seizure and detention sa paglabag ni Wen sa Customs Modernization and Tariff Act at NTC memorandum circular.

Ayon sa BOC, magdadagdag pa sila ng 19 na bagong X-ray machines sa tatlong terminal ng NAIA para masugpo ang smuggling.

Sa kasalukuyan, mayroon lamang tig-isang X-ray machines ang BOC sa NAIA Terminal 1 at 2 at dalawang X-ray machines sa Terminal 3. JOHNNY ARASGA

HULI ang isang lalaki at kanyang live-in partner na umano’y kapwa estapador at sangkot sa iligal na droga sa isinagawang entrapment operation ng mga pulis dahil sa pangloloko sa negosyanteng babae sa Caloocan City kahapon.

Kinilala ni Caloocan police chief S/Supt. Chito Bersaluna ang mga suspek na si Arvin Nepomuceno, 28, ng 123 Dao St., Marikina Heights, Marikina City, at live-in partner nitong si Laila Beldua, 37, ng 95-B Gabronino St., Gen. Mascardo, Bagong Barrio, na naaresto dakong 3:00 ng hapon sa Monserrat St., Morning Breeze, Brgy. 83, Bagong Barrio ng mga tauhan ng Police Community Precinct (PCP) 1 sa entrapment operation.

Ayon kay PCP-1 commander C/Insp. Avelino Protacio II, ang pagkakaaresto sa mga suspek ay dahil sa reklamo ng negosyanteng si Criselda Madrid, 32, ng 77 Gen. Tirona St., Bagong Barrio.

Sinabi ng biktima na nagbigay siya ng pera sa mga suspek para sa housing loan remittances sa Asia World Housing Developer, Inc. ng aabot sa P100,000 at ang P25,000 na una niyang ibinigay sa reservation fee.

Gayunpaman, nadiskubre ng biktima na ang mga suspek na parehong real estate marketing agents ay matagal nang hindi konektado sa naturang kumpanya kaya humingi agad itong humingi ng tulong sa mga pulis.

Narekober ng pulisya sa mga suspek ang tatlong transparent plastic sachet na naglalaman ng hindi pa matukoy na halaga ng pinaniniwalaang shabu habang ang ilang mga drug paraphernalia ay nakuha sa loob ng kanilang gray Toyota Sedan.

Sinabi pa ni C/Insp. Protacio, ang nakuhang cellphone kay Nepomuceno ay may mga mensahe rin na nagpapahiwatig sa transaksyon sa iligal na droga. RENE MANAHAN

IPINAHAYAG ni Philippine National Police (PNP) chief Ronald dela Rosa na mayroon na namang bagong druglord na nagsisimula nang mamayagpag sa Eastern Visayas.

Ayon kay Dela Rosa, itong nasabing bagong druglord ay hindi pa kasama sa listahan ng narco-politicians ni Pangulong Rodrigo Duterte.

Gayunman, mayroon ding isa pang hinihinalang druglord na nasa listahan na ng pangulo.

Naniniwala naman si Dela Rosa na hindi talaga basta kayang iwan ng mga sindikato ang bilyong pisong kita sa industriya ng iligal na droga.

Inihalintulad pa niya ito sa mga kaso ng mga tiwaling pulis na sa kabila ng pagkakaroon ng Counter-Intelligence Task Force ng PNP, ay hindi pa rin natitinag sa mga maling gawain.

Gagawa at gagawa pa rin kasi aniya ng paraan ang mga ito para maituloy ang kanilang mga iligal na aktibidad. JOHNNY ARASGA

POSIBLE umanong naburyong sa pagkakatalo ng mahigit P20-milyon sa casino kaya naisip na magbigti ang isang Korean national sa inuupahan nitong condo sa Malate, Maynila.

Patay na nang matagpuan ang biktimang si Hyun Jin Do, 38, computer generate, ng 1001 Asmiral Bay Suites at nanunuluyan sa 2138 Aldecoa St., Roxas Blvd., Malate, Maynila gamit ang nylon cord.

Sa ulat ni PO3 Marlon San Pedro ng Manila Police District-Homicide Section, dakong 12:13 kaninang madaling-araw nang madiskubre ng kaibigan na si Sang Sik Yang ang biktima sa loob ng kanyang condo sa Malate.

Nabatid na Hunyo 14 nang dumating sa bansa ang biktima bilang tourist kasama ang kaibigan.

Nagsilbi namang driver ng magkaibigan si Arnulfo Atok, Jr.

Ayon sa imbestigasyon, huling nakitang buhay ang biktima noong Hunyo 31 dakong 4:00 at bumalik sa kanilang bahay ng kanyang driver.

Sinundo naman umano ito ni Sang subalit hindi ito sumasagot sa tawag dahilan upang humingi ng tulong ang kaibigan sa may-ari ng condo kung saan nadiskubreng nakabigti ang biktima.

Sinabi naman ni Atok sa pagtatanong ng pulisya na natalo nga ng naturang halaga ang biktima sa Midas Casino sa Pasay City noong Hunyo 27 – 30 at nagpahinga lang ito noong Hunyo 31.

Nakipag-ugnayan na ang pulisya sa Korean Embassy upang maipagbigay-alam sa kamag-anak ng biktima ang pangyayari.

Ang bangkay ng biktima ay pansamantalang inilagak sa Archangel Funeral home upang isalang sa kanyang awtopsiya at safekeeping. JOCELYN TABANGCURA-DOMENDEN

TIGOK ang isang lalaki matapos araruhin ng isang SUV ang traffic outpost sa Marcos Highway sa Dela Paz, Pasig City.

Ayon sa Metropolitan Manila Development Authority (MMDA), naghihintay lamang ang pasahero ng masasakyan nang ito’y araruhin ng puting Ford Ranger na may plakang AAG 6662.

Papunta sa bahagi ng Antipolo ang SUV nang bigla na lamang nag-cut ang isang dyip.

Tumama sa gutter sa harapan ng Robinson’s galleria ang sasakyan bago tumama sa traffic outpost saka dumiretso sa biktima.

Kinilala ang namatay na si Marcelo Julian, ng 15 Kareta, Sto. Niño, Marikina City, habang ang driver naman ng SUV ay si Al-Arjay Tua.

Sasampahan ng kasong homicide at damage to property ang nasabing driver. JOHNNY ARASGA

PATAY ang isang rider habang nasa kritikal naman na lagay ang angkas nito matapos sumemplang ang kanilang sinasakyang motorsiklo sa Valenzuela City kagabi.

Dead-on-arrival sa Valenzuela Medical Center sanhi ng pinsala sa ulo at katawan si Jay Pacheco, 23, ng Paso de Blas habang ang angkas nitong si Caled Martinez, 21, ay ginagamot sa naturang ospital sanhi rin ng tinamong pinsala sa katawan.

Ayon kay Valenzuela police traffic investigator SPO1 Hanival Parinas, dakong 11:20 ng gabi, angkas ni Pacheco sa minamanehong Suzuki Raider (2339-PV) si Martinez at mabilis umano ang pagpapatakbo nito habang binabagtas ang Maysan Rd. patungong McArthur Highway.

Nawalan ng kontrol si Pacheco at rumampa ang motorsiklo sa gutter hanggang sa mahagip ang ginagawang steel railing saka bumangga sa tindahan ng mga bulaklak sa kanto ng Oreta Subd.

Sa lakas ng pakabangga, tumilapon ang mga biktima sa motorsiklo bago bumagsak sa kalsada.

Mabilis na isinugod ng mga tauhan ng Valenzuela Rescue Team ang mga biktima sa naturang pagamutan ngunit binawian na rin ng buhay ang rider. RENE MANAHAN

ANG negosyanteng si Peter Lim na una nang binanggit ni Pangulong Rodrigo Duterte na sangkot sa kalakalan ng iligal na droga, ang itinuturong supplier ng self-confessed druglord na si Kerwin Espinosa sa loob ng mahigit dalawang taon.

Ito’y base mismo sa mga alegasyon na nakasaad sa kasong drug trafficking na isinampa ng Criminal Investigation and Detection Group (CIDG) laban kay Lim, Espinosa at iba pa.

Nakasaad rin dito na isa sa mga transaksyon ng dalawa ay ang pagkuha ni Espinosa ng 50-kilong shabu mula kay Lim sa parking ng Cash & Carry sa Makati City noong June 7, 2015.

Minsan pa umanong tumungo sa Thailand ang dalawa para pag-usapan ang kanilang kasunduan sa kalakalan nila ng iligal na droga.

Naging maganda ang negosyo ng dalawa kaya nakayanan nilang makontrol ang kalakalan ng iligal na droga sa Central at Eastern Visayas.

Sa subpoena na ipinadala ng Department of Justice (DOJ) sa mga respondent, pinadadalo sila sa preliminary investigation sa August 14 at 17.

Maliban kina Espinosa at Lim ay kasama rin sa mga respondent ang druglord na si Peter Co, umano’y drug supplier na si Lovely Adam Impal, Marcelo Adorco, Max Miro, Ruel Malindangan at Jun Pepito. JOHNNY ARASGA

IKINABAHALA ni C/Insp. Jovencio Calagui, hepe ng Diffun Police sa Quirino, ang 10 nahuli nilang lumabag sa nationwide smoking ban ni Pangulong Rodrigo Duterte.

Ayon kay Calagui, pawang mga estudyante ang kanilang nahuli at mismong sa tindahan pa naaktuhan ang mga ito.

Alinsunod sa ordinansa, bawal bentahan ang mga menor-de-edad ng sigarilyo at bawal ding magbenta ang mga tindahan na nasa isang metro ang lapit sa eskwelahan.

Sa ilalim ng public smoking ordinance ng Diffun, pagmumultahin ng P500 o isang-buwang pagkakakulong ang first offender.

Habang P1,000 o dalawang-buwang pagkakakulong sa second offense at mahigit P3,000 o apat na buwang pagkakakulong sa third offense at susunod pang mga paglabag. JOHNNY ARASGA

NAMATAY sa isang ambush ang isang dating newspaper editor at kapatid niyang negosyante sa San Juan City kagabi, Agosto 3.

Ayon kay Eastern Police District (EPD) director C/Supt. Romulo Sapitula, kinilala ang mga biktimang sina Christopher Marasigan na isang negosyante at kapatid niyang si Mike na dating taga-media.

Sa salaysay ng mga nakasaksi sa insidente, nakasakay ang magkapatid sa isang metallic gray na CC5 Mazda (WOU 583) na bumibiyahe sa kanto ng V. Cruz at Barcelona St. sa San Juan pasado alas-6:00 ng gabi nang buntutan ito ng mga suspek at pagbabarilin nang maabutan.

Nang matiyak na napuruhan ang target ay mabilis na sumibat ang mga ito at hanggang sa ngayon ay hindi pa rin natutukoy ang pagkakakilanlan ng mga ito.

Dead-on-the-spot si Mike, habang dinala pa sa San Juan Medical Hospital si Christopher ngunit kalauna’y namatay din.

Ayon naman kay Ssupt. Lawrence Coop, narekober ng mga pulis ang 34 na basyo ng bala, apat ay mula sa cal. .45 na baril habang ang 30 naman ay mula sa 9mm na baril.

Sa ngayon ay wala pang ideya ang pulisya sa motibo sa pagpatay sa magkapatid pero patuloy nang iniimbestigahan ang naturang insidente. JOHNNY ARASGA

TATLONG drug suspects ang patay sa ikinasang buy-bust operation ng mga pulis sa sementeryo sa Sta. Cruz at sa tabing-ilog sa Quiapo, Maynila matapos manlaban.

Sa ulat ng Manila Police District (MPD)- homicide section, nakilala ang mga napatay na suspek na sina Alex Isidro, 44, ng 6209 Manalac St., Brgy. Poclacion, Makati City; Leover Miranda, alyas ‘Bong,’ 39, ng 154 Tendido St., San Jose, Quezon City; at Aries Bajacal, 36, ng 2nd St., Manila North Cemetery sa Sta. Cruz, Manila.

Sa imbestigasyon ni PO2 Jonathan Ruiz, unang napatay si Isidro sa isang buy-bust operation na ikinasa ng MPD-Station 3 sa tabing-ilog sa Ducos St., Quiapo.

Nakahalata umano ang suspek na pulis ang kanilang katransaksyon kaya bumunot ng baril ang mga ito ang nagpaputok.

Isang homemade na kalibre .38 revolver na may apat na bala, isang sachet ng shabu at P100 marked money ang nakuha sa suspek.

Dakong 7:00 naman ng gabi ay nagkasa ng buy-bust operation ang mga tauhan ng MPD-Station 3 sa loob ng Manila North Cemetery sa Sta. Cruz, kung saan napatay ng mga sina Miranda at Bajacal.

Nabatid na nakatanggap ang mga pulis ng tip hinggil sa bentahan ng shabu sa loob ng naturang sementeryo kaya’t kaagad na nagkasa ng operatsyn.

Gayunman, nakahalata ang suspek na pulis ang kausap kaya’t kaagad nagpaputok na ginantihan naman ng awtoridad na ikinamatay ni Miranda.

Naalarma naman si Bajacal nang makarinig ng putukan sa lugar kaya’t mabilis itong bumunot ng baril at rumesponde upang tulungan si Miranda at tinangkang paputukan ang back-up cop na si PO1 Richard Alvarado ngunit naunahan siya ng pulis at napatay.

Narekober sa mga suspek ang isang kalibre .45 pistola, isang kalibre .38 revolver at isang sachet ng shabu. JOCELYN TABANGCURA-DOMENDEN

PINANINIWALAANG inatake sa puso ang isang lolo matapos makipagtalik sa bitbit nitong Guest Relation Officer (GRO) sa Butuan City nitong Biyernes, alas-6:00 ng gabi.

Ayon kay P/S Insp. Paul Paden, Officer-in-charge ng Butuan City Police Station 1, nakilala ang biktimang si Bernabe Maglupay, 61, ng Brgy. Baan-km3, Butuan City.

Hinahanap na ngayon ng pulisya ang babaeng kasama ng biktima na tumakas para makapagbigay-linaw sa tunay na nangyari sa biktima.

Bago ito, bandang ala-1:00 kahapon nang pumasok ang biktima sa nasabing apartelle kasama ang isang babae sakay ng motorsiklo.

Dahil lumampas na sa short time, kinatok ng room boy ang lolo at nang walang sumasagot ay sapilitan itong binuksan.

Natagpuan ang biktima na nakadapa sa kama habang sapo ang kanyang dibdib.

Teyorya naman ng pulisya na posibleng natakot ang babae kung kaya’t bigla itong nawala sa inuupahang kuwarto dahil pinaniniwalaang namatay ang biktima sa atake sa puso. BOBBY TICZON

INAMBUS ng mga hindi nakikilalang armadong kalalakihan ang isang hukom at kanyang asawa sa Butuan City kaninang Sabado ng umaga.

Namatay noon din sanhi ng tinamong tama ng bala sa ulo at sa iba’t ibang bahagi ng katawan ang biktimang nakilalang si Godofredo Abul, Jr., 68, presiding judge ng Regional Trial Court (RTC) Branch 4 ng lunsod.

Habang isinugod naman sa Butuan Medical Center ang asawa ng huwes na nakilalang si Bernarditha, 67, sanhi ng tinamong tama ng bala sa katawan.

Blangko pa ang kapulisan kung sino ang nasa likod ng pang-aambus at kung ano ang motibo sa krimen.

Sa ulat, naganap ang insidente dakong 9 a.m. sa tapat ng bahay ng magasawa sa Purok 16 Alviola village sa Brgy. Baan.

Ayon sa pagsisiyasat ng Butuan City Police Office (BCPO), bago ang pamamaril ay minamaneho ng naturang hukom ang kanyang puting Mitsubishi Montero kasama ang kanyang misis.

Pero pagkalabas pa lamang ng mag-asawa ng kanilang garahe ay biglang sumulpot ang mga suspek lulan ng motorsiklo saka pinagbabaril ang kanilang sasakyan.

Ayon sa mga kasamahan ng mag-asawa sa Free Methodist Church na pastor din si Judge Abul, mabubuting tao ang mag-asawa. BOBBY TICZON

NASA 13 katao na pawang sangkot sa ipinagbabawal na droga at panghoholdap ang nalambat ng mga operatiba ng Quezon City Police District (QCPD) sa magkakahiwalay na operasyon kahapon.

Ayon sa report ng director ng QCPD na si Police C/Supt. Guillermo Lorenzo Eleazar, kinilala ang mga nadakip na sina Jackilyn Dacio, 30, ng Balintawak; Raymond Datul, 30, ng Brgy. San Jose at Arvin Reyes, 21, taga-Caloocan City.

Alas-3:00 ng madaling-araw nang madakip si Dacio ng operatiba ng La Loma Police Station 1, QCPD sa isang buy-bust operation sa Old Samson Rd., Brgy. Apolonio Samson, Balintawak.

Habang sina Datul at Reyes ay naaresto naman alas-8:00 ng umaga sa isa pa ring buy-bust operation sa Taytay St., Brgy. San Jose at nakumpiskahan ng buy-bust money at dalawang sachet ng shabu.

Alas-7:15 ng umaga, nadakip rin ng naturang operatiba si Joselito Francisco, 22, ng Brgy. Apolonio Samson, sa isa pa ring buy-bust operation sa #1177 EDSA, Balintawak, Brgy. Apolonio Samson at nakumpiska dito ang dalawang sachet ng shabu.

Alas-12:45 ng madaling-araw ay nadakip rin ng naturang operatiba ang mga holdaper na sina Frank Geller, 20, at Jonas Espada, ng Road 8, Brgy. Bagong Pag-Asa.

Nadakip rin ng mga pulis alas-8:30 ng umaga ang 16-anyos na binatilyo nang makuhanan ito ng isang plastic sachet ng shabu sa Forestry, Pael Cmpd., Brgy. Culiat. Gayundin, alas-9:30 naman ng umaga ay nadakip si Ricardo Impang sa Richland 5, De Asis Cmpd., Brgy. Bagbag matapos itong makuhanan ng dalawang sachet ng shabu.

Alas-12:55 ng madaling-araw ay nadakip ng Batasan Police Station 6 si Samson Niel Bastan, 18, sa Dyco Cmpd., Laura St., Brgy. Old Balara na naaktuhang sumisinghot ng shabu.

Nadakip naman ng Cubao Police Station 7 sina Manuel Warren, 19, at Raman Mitch Cristal, 20, bandang alas-3:30 ng madaling-araw sa kanto ng P. Tuazon Blvd. at Benitez St., Brgy. Kaunlaran dahil sa panggugulo at dalang patalim. SANTI CELARIO

NALISTON nang buhay ang isang ginang at kanyang dalawang anak matapos lamunin ng apoy ang kanilang bahay sa General Santos kaninang hatinggabi.

Sinabi ni FO3 Macacuna Tumambiling, ng Bureau of Fire Protection (BFP)-GenSan, kinilala ang mag-iinang sina Jovelyn Gamis, Earl, 5, at Shaun Anthony Cagas, 3.

Sa ulat, naganap ang sunog dakong 12 p.m. sa bahay ng mag-iina sa Purok 1 Blaan community village, Labangal, General Santos City.

Ayon sa mga residente, bigla na lamang lumaki ang apoy sa bahay ng mga biktima na gawa lamang sa light materials at mabilis na kumalat sa tatlong boarding house at internet café na pag-aari ni Gamis.

Sa isinagawang clearing operation, natagpuan ang ina sa banyo habang ang dalawang anak naman ay sa kuwarto. BOBBY TICZON

NAKAPUGA ang limang preso Rosario, Cavite kaninang Miyerkules ng umaga, Agosto 9.

Ayon kay Supt. Chitadel Gaoiran, tagapagsalita ng Calabarzon police, nagpanggap na patay ang isa sa mga preso kaya binuksan ng jail guard na si SPO2 Africa ang pinto ng selda.

Pero imbes tumulong ay kinuyog si Africa ng mga preso kaya sila nakatakas.

Kinilala ang mga pugante na sina Dannymar Carino, Ryan James Villanueva, Frederick Legazpi, Lindon Bartolo at Josefino Abad, na pawang nahaharap sa kasong illegal drugs.

Bumuo na ng mga tracker teams ang Cavite police para sa lalong madaling panahon ay maibalik sa selda ang mga preso. BOBBY TICZON