SIYAM katao ang inaresto ng National Bureau of Investigation (NBI) matapos na maaktuhang iligal na nangingisda sa sakop ng Navotas City.

Kinilala ni NBI Director Dante A. Gierran ang siyam na sina Jun Esatan (Boat Captain), Rodolfo Perez (Segunda Maestro), Erwin Tremotcha (Makinista), Floro dela Jente (Segunda Maestro), Rolly Beling (Makinista), Tirso Beling (Boat Captain), Leonardo Jugaran (Boat Captain), Rolando Russians (Boat Segunda Maestro) at Riche Langit.

Ayon sa NBI, nakatanggap sila ng impormasyon na may ilang indibiduwal na illegal na nangingisda sa sakop ng Navotas City kung saan gumagamit ng Danish Seine o tinatawag na “Hulbot”.

Matapos na nakumpirma, nagsagawa ng operasyon ang NBI-Environmental Crime Division (EnCD) sa pamumuno ni Chief Atty. Czar Nuqui kung saan naaktuhan ang siyam na katao na aktong nangingisda gamit ang dalawang motorized banca, gayunpaman, wala rin silang maipakitang fishing permit at lisensiya ng banca, dahilan upang arestuhin ang mga ito.

Nabatid na ang Hulbot ay isang uri ng iligal na pangingisda kung saan ginagamitan ito ng bakal na pantaboy sa mga isda, gayunman, ito ay maaring tumama sa seawall at makasira sa mga corrals.

Ginagamitan din ito ng wikang maliliit na butas na fish net kung saan maging ang maliliit na isda ay nahuhuli.

Ang mga naarestong mangingisda ay umaabot hanggang sa Corridor na sakop ng Cavite hanggang sa Limay, Bataan.

Nabatid na naaresto na rin ang ilan sa kanila subalit na-release din ang mga ito.

Sa ilalim ng Fisheries Administrative Order No. 246 series of 2014, ang paggamit ng Danish Seine and Modified Danish Seine o Hulbot at ipinagbabawal na sa alinmang dagat sa Pilipinas.

Nakumpiska rin ang kanilang fishing paraphernalias.

Kasong paglabag sa Republic Act No. 8550 (Philippine Fisheries Code of 1998) of “An act to prevent, deter, and eliminate illegal of anautorizd, unreported and unregulated fishing, such as operating a commercial vessel with No License and Possession of a fishing gear or prorating a fishing vessel in a fishing area with No License’. JOCELYN TABANGCURA-DOMENDEN

DALAWA ang patay matapos maka-enkwentro ang mga pulis ng PCP-3 ng Northern Caloocan na tumugon sa sumbong na may bentahan ng shabu sa Brgy. 176, Bagong Silang, Caloocan City.

Pinangunahan ni C/Insp. Ronald Cayago ang grupo ng mga mga pulis na nagpunta sa lugar.

Pagdating ng mga ito sa lugar, nakita sila ng look-out na si Yul Retonal na armado ng baril na agad tumakbo at pinaputukan ang mga pulis.

Hinabol naman ito ng mga pulis hanggang sa mapatay ang suspek.

Habang ang isang suspek ay nasa loob ng bahay na kinilalang si Teofisto Trinidad, at pagpasok sa loob ng mga ay pulis bigla nitong inundayan ng saksak ang operatiba kaya napilitan nilang barilan si Trinidad na agad nitong ikinamatay.

Nakuha sa pangangalaga ng mga napatay na suspek ang isang caliber .38 revolver, isang patalim, at ilang sachet ng shabu. RENE MANAHAN

BAGUIO CITY – Anim na babae na umano’y miyembro ng “Wonder Woman” robbery syndicate ang naaresto na nasa aktong nagnanakaw sa Baguio City kahapon, August 9.

Kinilala ng Baguio City Police Office (BCPO) Station 7 ang mga suspek na sina Theresita Medina Fulgencio, 64; Lorna Miranda Pagod, 51; Susan Ipac Imperio, 57; ng Carmen West, Rosales, Pangasinan; Gloria Ferrer Sinco, 62; Grace Venturia Talania, 41; ng Pugo, Sinait, Ilocos Sur; Imelda Tabay Sinco, 49, ng Bungro, Cabugao, Ilocos Sur; Estrella Galvez at Suzete Tinaza.

Sa imbestigasyon, sinabi ng BCPO na ang mga suspek ang nahuli sa isang central district ng Baguio City.

Napag-alamang ang mga suspek ay pawang umaakyat lamang sa Baguio City para lang makapagnakaw lalo na sa mga turista.

Ayon sa BCPO Station 7, ang mga suspek ay responsable sa mga nakaraang insidente ng bag slashing at snatching.

Nakakulong sa ngayon ang mga suspek sa BCPO Station 7 at nakatakdang sampahan ng kaukulang kaso. ALLAN BERGONIA

DALAWANG pulis ang namatay habang apat pa ang nasugatan matapos ang pakikibakbakan laban sa New People’s Army rebels sa Viga, Catanduanes kaninang Huwebes ng umaga.

Sinabi ni S/Insp. Maria Luisa Calubaquib, Region 5 Police spokesperson, na nakatanggap sila ng ulat na sina Senior Police Officer 1 Marwin de Vera at 2 drug surrenderers ay tinatahak ang national highway ng Brgy. Sagrada nang sumabog ang isang improvised explosive device.

Kasabay nito, ang tatlo ay pinaputukan at nasugatan. Dinala sila sa ospital para sa kaukulang medical attention.

Nang malaman naman ni S/Insp. Ernesto Montes, Jr., Viga chief of police; Senior ang insidente, pinadala niya sina PO2 Bienvenido Trinidad; SPO 1 Erwin Pichuela, PO1 Eva Torcilino, at PO3 Joseph Tupue para rumesponde sa lugar.

Nang marating nila ang lugar habahg lulan ng isang privbadong behikulo, naka-engkwentro nila ang may 20 hinihinalang miyembro ng NPA.

Napatay agad sina Torcilino at Tupue at ang bangkay nila ay nasa lugar pa. Si Montes naman ay ginagamot sa ospital sanhi ng tama ng baril sa likod.

Wala namang naiulat na nasaktan o namatay sa panig ng mga rebelde. BOBBY TICZON

DALAWA ang nalagas habang 17 naman ang nasugatan kabilang ang isang dating pulis nang magsuwagan ang isang pampasaherong dyip at 14-wheeler truck sa Bataan town kaninang Biyernes ng umaga.

Sinabi ni C/Insp. Eduardo Guevara, hepe ng Dinalupihan Police, na isa sa mga biktima na nakilalang si Armando Dacayo, 43, ay idineklarang dead-on-arrival sa Bataan District Hospital.

Namatay noon din sanhi ng tinamong pinsala sa ulo at katawan ang pasahero ni Dacayo na si Norma Estivar, 70m na nakapuwesto sa unahan ng dyip matapos itong tumilapon at magulungan pa ng trak.

Nasa kritikal na kondisyon naman ang driver ng dyip na si Ricky Mangalindan, dating pulis na naka-assign sa Dinalupihan police station.

Sa ulat, naganap ang insidente dakong 9:35 a.m. sa national highway ng Brgy. Luacan, sa bayan ng Dinalupihan.

Ayon sa mga nakasaksi, may iniwasan na kotse ang trak na may plakang (UQA 482) na minamaneho ng isang Raymond Castro, 22, kaya sumalpok sa kasalubong na pampasaherong dyip na may plakang CWE 372.

Ang trak ni Castro na hawak na ngayon ng pulisya ay naghahakot ng buhangin. BOBBY TICZON

PATAY ang isang 53-anyos na ginang na umano’y kabilang sa drug watchlist ng pulisya at ng kanilang barangay matapos pagbabarilin ng dalawang hindi nakilalang salarin na magkaangkas na lulan ng isang motorsiklo sa Caloocan City.

Dead-on-the-spot ang biktimang si Nemia Flores, ng 4912 San Vicente St., Brgy. 178, Area D, Camarin sanhi ng mga tama ng bala sa iba’t-ibang bahagi ng katawan.

Nabatid na dakong 5:00 kahapon ng hapon habang binabagtas ng biktima lulan ng isang pampasaherong tricycle pauwi sa kanilang bahay ay bigla na lamang itong hinarang ng mga suspek sa kanto ng Santol at Avocado St.

Agad na pinagbabaril ng mga suspek ang biktima kung saan mabilis namang tumakbo ang driver ng nasabing tricycle sa labis na takot at pagkabigla sa pangyayari.

Matapos ang pamamaril ay agad ding tumakas ang mga salarin sa hindi nabatid na direksyon.

Ayon sa ilang barangay official, matagal na umanong nasa listahan ng mga sangkot sa droga ang biktima kung saan ilang beses na rin daw itong pinuntahan ng kapulisan upang sumuko kaugnay ng programang “Oplan Tokhang” ng PNP. RENE MANAHAN

SUMUKO sa Counter Intelligence Task Forice (CITF) ng Philippine National Police (PNP) ang pitong pulis na umano’y nangikil ng pera sa pamilya ng isang drug suspect.

Kinilala ang mga pulis na sina PO1 Emmanuel Benedict Alojacin, Mark Ryan Mones, Christian Paul Bondoc at Jack Rennert Etcubañas, kasama sina PO2 Jonnel Barocaboc, Jessrald Pacinio at PO3 Kenneth Loria na pawang mga mula sa Navotas police.

Ayon sa CITF, nagsumbong sa kanila ang ina ng isa sa dalawang inaresto ng mga nasabing pulis sa isang anti-drug operation sa Malabon City noong Biyernes.

Ginamit kasi ng mga pulis ang cellphone ng isa sa kanilang mga inarestong drug suspects para tawagan ang ina nito at humingi ng P100,000 kapalit ng kalayaan ng anak nito.

Nagbanta pa umano ang mga pulis na papatayin ang mga drug suspects, kaya nagdesisyon ang ina na magsumbong agad sa CITF sa mismong araw rin na iyon.

Ito ang naging basehan ng CITF para magsagawa ng entrapment operation, ngunit hindi naman sumulpot ang mga ito.

Gayunman, kusa namang sumuko ang mga pulis sa CITF pagdating ng gabi ng Sabado matapos nilang makumpirma ang pagkakakilanlan nito sa tulong ng Northern Police District (NPD) sa isang follow-up operation.

Inihahanda naman na ng CITF ang mga kasong isasampa sa pitong pulis, habang pinalaya naman na ang kanilang mga inaresto. JOHNNY ARASGA

MINSAN pang napatunayan ang kasabihan ng matatanda na ang biyenan at manugang ay hindi maaaring magkasundo na parang langis at tubig.

Namatay noon din sanhi ng tinamong tama ng bala sa dibdib ang biktima na nakilalang si Salvador Villablanca, 67, ng Bula, Camarines Sur.

Hinahanting na ngayon para pamagutin sa krimen ang suspek na nakilalang si Benson Camila.

Binaril si Villablanca sa loob mismo ng kanilang bahay dakong 9:00 ng umaga.

Ayon sa anak ng biktima na asawa naman ng suspek, dati nang may alitan ang ang kanyang ama at asawa.

Hindi aniya nagugustuhan ng kanyang tatay ang disiplinang ginagawa ng suspek sa kanyang mga apo. BOBBY TICZON

TEPOK ang dalawang takas na bilanggo matapos makipagbarilan sa mga pulis sa Rosario, Cavite.

Agosto 9 nang makatakas sa detention cell ng PNP-Rosario ang limang bilanggo na pawang nahaharap sa kasong may kinalaman sa iligal na droga.

Napag-alamang nakatanggap ng impormasyon ang mga pulis na nagtatago sa may ilog ng barangay Muzon Dos ang dalawa sa mga inmate kaya’t nagsagawa silang operasyon na nauwi sa palitan ng putok.

Kinilala ang mga napatay na sina Josefino Abad at Lyndon Bartolo, habang patuloy ang manhunt operations sa tatlong iba pa na sina Cannymar Carinio, Frederick Legaspi at Ryan James Villanueva.

Una rito, isa sa limang inmates ang diumano’y nagpatay-patayan sa loob ng selda at nang buksan ito ng jail guard ay agad nila itong inatake at tumakas. JOHNNY ARASGA

NILAMON ng apoy ang 100 kabahayan kaninang umaga sa Sikap St., San Miguel, Maynila.

Itinaas ang alarma sa task force bravo pasado 5:00 ng umaga sa Brgy. 645.

Ang mga apektadong residente ay pansamantalang nasa kahabaan ng JP Laurel, sa labas lamang ng Malakanyang.

Ayon sa Manila Fire Bureau, pasado alas-3:00 ng madaling-araw nang magsimula ang sunog sa bahay ng isang Oriel Degala.

Mabilis naman umanong kumalat ng apoy sa mga katabing bahay dahil karamihan ay gawa lamang sa light materilas.

Pinutol na rin ang suplay ng kuryente sa San Miguel, Maynila.

Isa naman ang nasugatan na nakilalang si Melvin Romanda ayon sa Manila Disaster Risk Reduction and Management Office (MDRRMO).

Sa ngayon ay inaalam pa ng imbestigador ang sanhi ng sunog at kabuuang halaga ng natupok ng apoy. JOCELYN TABANGCURA-DOMENDEN

DEDO ang isang parking boy matapos tambangan sa kanto ng R.S. Oca at Delgado St., Pier South, Port Area, Manila.

Kinilala ang biktimang si Rodrigo Angeles, 45, na nakatambay lamang sa tapat ng isang karinderya habang nanonood ng OTB nang tambangan ng ‘di pa nakikilalang suspek.

Ayon sa kinakasama ng biktima na si Annie, nasa kalapit na tindahan lang siya nang makarinig ng sunod-sunod na putok ng baril.

Aminado ang ginang na gumagamit ng iligal na droga ang kanyang asawa, pero wala naman umano itong kaaway.

Ayon sa ilang mga nakasaksi, naglalakad lamang ang nag-iisang suspek.

Nagpapatuloy naman ang imbestigasyon ng pulisya sa nasabing insidente ng pamamaril. JOHNNY ARASGA

NASABAT ng pulisya ang may isa’t kalahating kilo ng shabu sa ikinasang buy-bust operation sa Maguindanao St., Brgy. New Lower Bicutan, Taguig City.

Arestado sa naturang operasyon ang apat na sina Don Kadatuan at Ibrahim Kadtugan, kabilang ang dalawang magkapatid na menor-de-edad.

Nakatakas naman ang mga magulang ng mga menor-de-edad na sina alyas ‘Elmer’ at ‘Diana’ na target ng nasabing operasyon.

Narekober mula sa mga suspek ang walong malalaking sachet ng hinihinalang shabu na aabot sa isa’t kalahating kilo ang timbang.

Bukod pa rito, isang rifle replica, samu’t saring mga bala at drug paraphernalia ang nakumpiska sa mga suspek.

Mahaharap ang mga nahuling suspek sa kasong paglabag sa Republic Act 9165 o Comprehensive Dangerous Drugs Act of 2002. JOHNNY ARASGA

DAHIL sa aksidente, nadiskubre ng mga awtoridad ang nasa 72 kinatay na aso lulan ng isang pick-up truck matapos itong sumalpok sa Imus, Cavite kahapo ng umaga, Agosto 17.

Ikinagulat ng mga awtoridad ang mga namataang mga labi ng aso na hinihinalang kinatay at ibibiyahe upang ibenta sa mga kanilang mga parukyano sa Northern Luzon.

Ayon kay Supt. Norman Ranon, hepe ng Imus police, naunang nasangkot sa aksidente ang trak na may plakang RFG-527 nang makabanggan nito ang isa pang sasakyan sa Aguinaldo Highway sa Bgy. Anabu, 2-D.

Ngunit bago pa man dumating ang mga pulis, tumakas na ang hindi nakilalang driver ng trak.

Nang inspeksyunin ang nilalaman nito, laking gulat ng mga pulis nang tumambad sa kanila ang 72 patay na aso.

Sa loob ng sasakyan, nadiskubre ang isa pang plaka ng sasakyan na ZGM 395 na nakarehistro sa La Trinidad, Benguet.

Napapatuloy ang imbestigasyon ng mga awtoridad upang matukoy kung sino ang may-ari ng sasakyan at panagutin ang mga sangkot sa krimen.

Sa ilalim ng Republic Act 8485 o Animal Welfare Act, mariing ipinagbabawal ang pagkatay at pagbebenta ng karne ng aso. JOHNNY ARASGA

ARESTADO at kulong ang limang barangay tanod sa Makati City matapos hindi umano i-turnover ang mga nakumpiskang droga sa Makati City Police.

Sinasabing nakatanggap ng impormasyon ang pulisya hinggil sa isang abandonadong e-bike na may kasamang shabu na tumitimbang ng 450 gramo na narekober ng mga barangay tanod sa Brgy. San Antonio.

Maliban sa mga shabu, nakasabat din ang mga ito ng tatlong sachet ng marijuana at tatlong piraso ng ecstacy.

Kinilala ang mga naarestong tanod na sina Alvin Notado, John Russel Ching, Diosadado Sta. Romana, Dennis Dalisay at Leo dela Cruz dahil sa hindi pag-turnover sa naturang kaso.

Inihahanda na ang mga kaukulang kasong isasampa laban sa mga naturang suspek. JOHNNY ARASGA

TUMIMBUWANG ang anim na mga sibilyan habang marami naman ang nasugatan nang sumalakay ang teroristang Abu Sayyaf sa isang komunidad sa Brgy. Tubigan sa munisipyo ng Maluso sa lalawigan ng Basilan kahapon ng umaga, Lunes.

Sa ulat ng Joint Task Force Basilan, alas-5:30 a.m. nang umatake ang mga bandido na nakasuot pa ng mga camouflage uniforms at nagpaulan ng bala sa mga bahay at nakakasalubong nilang mga sibilyan.

Nagpanggap na mga sundalo ang mga bandido at nagsasalita pa ng tagalog kaya hindi napansin ng mga Cafgu na nagbibigay ng seguridad sa lugar na mga Abu Sayyaf na pala ang kanilang kaharap at may masamang plano sa lugar.

Nabatid na sinunog din ng mga bandido ang apat na mga bahay kasama ang barangay health center.

Kabilang sa anim na kumpirmadong patay ay ang isang kasapi ng CAFGU na nakilalang si Reynaldo Esparcia, 50, na napag-alamang pinagtataga pa sa iba’t ibang bahagi ng katawan.

Kasama rin sa mga napatay sina Martin Jalad, 13, habang ang iba pang nasawi ay sina Tadzma Atakani, 31, Dadang Hassan, 38, Ajid Aminulla, 32 at Carmina dela Cruz, 23.

Dumating na sa Zamboanga City lulan ng commercial vessel ang apat sa mga sugatang biktima na idiniretso sa magkahiwalay na ospital sa lungsod.

Sa ngayon, 11 na ang kinumpirma ng awotoridad na sugatan sa nasabing pag-atake.

May natanggap naman na impormasyon, na tatlo pa sa mga sugatang biktima ang binawian na rin ng buhay sa ospital pero kinukumpirma pa ang nasagap na balita.

Patuloy na tinutugis ng militar ang mga tumakas na bandido na responsable sa madugong pag-atake. BOBBY TICZON

NAREKOBER na kaninang Miyerkules ng umaga ang mga bangkay ng apat kalalakihan na natabunan ng lupa sa Brgy. Peñaranda sa bayan ng Kabasalan sa lalawigan ng Zamboanga Sibugay kaninang madaling-araw.

Kinilala ang mga biktimang sina Sannylito Tuquib, 21; Danilo Balicoco, 53; Adrian Ledesma, 30; at Jeffrey Lamparas.

Nakaligtas naman ang tatlo pa nilang kasamahan na nakilalang sina Ernacio Catipay, Joel Longgaquit at Joe Ledesma.

Sa ulat ng Kabasalan police, nangyari ang insidente dakong alas-5:00 ng umaga sa kasagsagan ng malakas na ulan sa lugar.

Ayon sa mga survivor, nagpapahinga sila sa loob ng isang kubo nang biglang gumuho ang katabing bundok at rumagasa papunta mismo sa kanilang kinaroroonan.

Inabot ng ilang oras bago nakuha ang mga bangkay ng apat na biktima.

Dahil sa insidente, pinaalalahanan ng awtoridad ang mamamayan na maging maingat lalo na kung hindi ligtas ang kinatatayuan ng kanilang mga bahay habang nagpapatuloy ang nararanasang masamang panahon sa Zamboanga Sibugay at mga karatig na lugar. BOBBY TICZON

INAMBUS ng hindi nakikilalang armadong lalaki ang isang barangay traffic enforcer sa Quezon City kaninang Miyerkules ng umaga.

Namatay noon din sanhi ng bala ng hindi pa malamang kalibre ng baril sa iba’t ibang bahagi ng katawan ang biktima na nakilalang si Teogenes Mendez, traffic enforcer ng Brgy. Pasong Putik.

Blangko pa ang mga tauhan ng Quezon City Police District-Criminal Investigation and Detection Unit (QCPD-CIDU), kung sino ang nasa likod ng pamamaril at maging ang motibo sa pagpatay sa biktima.

Sa ulat, naganap ang insidente dakong 8”25 a.m. sa kanto ng Ilang-ilang St., at Oval Road, sa nasabing barangay.

Ayon sa CIDU, bago ang insidente ay lulan ang biktima sa kanyang motorsiklo at pagsapit sa lugar ay pinagbabaril na ito ng suspek.

Nahihiwagahan naman ang CIDU investigators dahil ang sabi ng misis nito at mga kapwa traffic enforcers ay walang kakilalang kaaway ang biktima.

May tatlong buwan pa lamang ang biktima sa pagiging barangay traffic enforcer. BOBBY TICZON

PATAY ang isang 35-anyos na ginang matapos tumalon mula sa ika-17 palapag ng isang condominium sa Quezon City kahapon ng tanghali, Agosto 23, Miyerkules.

Kinilala ni Supt. Igmedio Bernaldez, hepe ng Quezon City Police station 2-Masambong, ang biktimang si Lyn Supnet, ng #18 Sultan Kudarat St., Urduja Village, Novaliches, Caloocan City.

Nagtamo ng matinding pinsala sa ulo at katawan ang biktima na naging dahilan ng agaran nitong pagkamatay.

Sa imbestigasyon ni PO3 Roldan Cornejo, ng Criminal Investigation and Detective Unit ng Quezon City Police District (QCPD-CIDU), naganap ang insidente alas-12:30 ng tanghali sa Walk Way ng ika-17 palapag ng Grass Residences Tower 2 sa Brgy. Santo Cristo, QC.

Bago ang insidente, nagtungo ang biktima sa tinitirhan ng kanyang hipag na si Ramona Bejo sa #1743-44 ng nabanggit na condominium.

Napansin ni Bejo na kakaiba ang ikinikilos ng hipag at nasa bandang balkonahe ito at tangkang tatalon.

Agad pinigilan ni Bejo si Supnet, kinalma ito at inilayo sa balkonahe ng kanyang unit.

Sandaling iniwan ni Bejo ang hipag dahil may aayusin ito sa loob ng kanyang condo unit nang makita na niyang nakahawak sa grill ng balkonahe ang hipag.

Tinangka pa niya itong isalba ngunit nahulog pa rin ito at agad binawian ng buhay sa taas ng pinaglaglagan nito.

Ipinagbigay-alam ni Bejo ang insidente sa security personnel ng naturang condominium kung saan sa ngayon ay iniimbestigahan na ng pulisya kung may foul play sa insidente. SANTI CELARIO

NASAWI ang 30-anyos na misis matapos pagsasaksakin ng kanyang selosong mister makaraan ang pagtatalo nang galit na komprontahin ng suspek ang biktima dahil naghihinala ito na may iba umanong karelasyon ang asawa sa Caloocan City, kagabi.

Dead-on-the-spot sanhi ng dalawang saksak sa dibdib ang biktimang si Joanna Lyn Dolor-Porton, 30, lady guard, ng Blk. 16-A, Lot 41, Phase 3-E1, Langaray, Brgy. 12.

Kinilala naman ni C/Insp. Ilustre Mendoza, OIC ng Caloocan police, ang suspek na si Roque Porton, Jr., 29, na nahaharap sa kasong pariccide sa piskalya ng Caloocan City.

Ayon kina Caloocan police investigators SPO1 Romel Bautista, PO3 Edgar Manapat at PO2 Alvin Pascual, dakong 7:00 ng gabi, lasing ang suspek nang komprontahin nito ang biktima sa loob ng kanilang bahay dahil sa selos matapos nitong maghinala na nakikipagrelasyon ang misis sa kasamahan nitong guwardya.

Nauwi sa mainitang pagtatalo ng mag-asawa sa pisikalan hanggang sa suntukin ng suspek ang biktima bago kumuha ng patalim at inundayan ng dalawang saksak sa dibdib na nagresulta ng agarang kamatayan ng misis.

Humingi naman ng tulong ang mga tambay sa pulis na si SPO1 Freddie Dangle ng PNP Maritime, Camp Crame na nagresulta sa pagkakaaresto sa suspek. RENE MANAHAN

APAT na katao kabilang ang magka-live-in na hinihinalang tulak ng iligal na droga ang naaresto sa isinagawang anti-narcotics operation ng mga tauhan ng Manila Police District (MPD) sa Sampaloc, Maynila kaninang madaling-araw.

Sina Albert Rivera, 48, traysikel drayber, ng 1164 Quintos St., Sampaloc, Maynila, at Allan Verder, 42, pest exterminator, ng 1568 Loreto St., Sampaloc, ay unang naaresto dakong 12:30 ng madaling-araw, sa Loreto St., Sampaloc.

Alas-12:40 ng madaling-araw naman nang maaresto sa Algeciras St. kanto ng Simoun St., Sampaloc ang magka-live-in na sina Romeo Marquez, 67, at Veronica Blatong, 34, pawang taga-1588 Algeciras St., Sampaloc.

Ayon kay Supt. Aquino Olivar, Station Commander ng MPD-Station 4, nagsasagawa ng Anti-Narcotics Operation ang Station Drug Enforcement Team (SDET) sa mga nasabing lugar na nagresulta sa pagkakaaresto ng mga suspek.

Nakuha ang tig-isang sachet ng hinihinalang shabu kina Rivera at Verder, habang tatlong sachet naman ang nakuha kina Marquez at Blatong.

Nahaharap sa kasong paglabag sa R.A. 9165 “Comprehensive Dangerous Drugs Act of 2002” ang mga nahuling suspek, na kasalukuyang nasa kustodiya ng MPD-PS4. JOCELYN TABANGCURA-DOMENDEN