KRITIKAL ang lagay ng isang binata nang pagsasaksakin ito ng kainuman matapos magtalo kaninang madaling araw sa Brgy. Bangkulasi Navotas City.
Inoobserbahan sa Tondo Medical Hospital si Jose Reyes y Rialto, 31, binata, ng #50 Galicia St., ng nasabing barangay sanhi ng maraming saksak sa iba’t ibang parte ng katawan.
Pinaghahanap naman ng mga awtoridad ang tumakas na suspek na nakilala sa alyas na Ape Riego ng nasabi ring barangay.
Ayon sa ulat, dakong ala 1:30 kaninang madaling araw ng maganap ang insidente sa kalye Galicia Bangkulasi.
Nabatid, nag-inuman ang una at huli kasama ng ilang kaibigan ng kapwa malango sa alak sa hindi malaman kadahilanan nagkaroon ang mga ito ng mainitang pagtatalo hanggang sa bigla na lamang nagbunot ng patalim ang suspek at sunod sunod na inundayan ng saksak ang biktima.
Mabilis na tumakas ang suspek bitbit ang ginamit na patalim habang ang biktima ay agad dinala ng kaibigan nitong si Marvin Baluyot sa nasabing ospital.
Inaalam ng mga awtoridad ang tunay na motibo sa nasabing insidente.