NAGTUNGO sa himpilan ng pulisya ang 28-anyos na dalaga upang sampahan ng pormal na reklamo ang kanyang nakaaway na ka-boardmate nang malapnos ang kaliwang bahagi ng kanyang dibdib matapos plantsahin ng suspek kagabi sa Pasay City.
Bukod sa pagkakalapnos, nakalmot din sa mukha ang biktimang si Rhea Perez, laundry attendant, matapos ang kanilang pag-aaway ng ka-boardmate na si Reming Manalon, 40, beautician.
Ang dalawa ay kabilang sa anim na naninirahan sa boarding house sa 339 Caridad Sanches St., naturang lungsod.
Sa isinagawang imbestigasyon ni PO3 Melvin Garcia ng Station Investigation and Detective Management Section (SIDMS) ng Pasay police, may matagal nang alitan ang dalawa sa hindi pa malamang dahilan.
Ayon sa pulisya, kagabi ng alas-11, habang namamalantsa ang suspek ay nagparinig ang biktima at sinabing “Humanda kayo, papatayin ko kayo, good luck,” na ikinairita ng suspek.
Sinita ng suspek si Perez sa pagpaparinig hanggang humantong na sa pisikal na sakitan na naging dahilan upang maplantsa ang kaliwang bahagi ng dibdib ng dalaga.
Nahaharap sa kasong physical injury at threat si Manalon na sumuko sa nagrespondeng pulisya matapos maghain ng reklamo ang biktima.