PATAY ang isang magbiyenan matapos madaganan ng kumalas na kinakadenang troso kagabi sa Gate 3 ng Manila North Harbor Center sa Tondo, Maynila.
Idineklarang dead on arrival sa Tondo Medical Center ang magbiyenan na sina Rolando Asuncion, 54, driver at Kim Aguilar, 25, truck helper, kapawa ng Nueva Ecija.
Sa imbestigasyon ni SP03 Glenzor Vallejo, ng Manila Police District- homicide section, alas-10 ng gabi nang mangyari ang insidente sa Sta. Rita Yard 1 sa Gate 3 ng Manila North Harbor, Tondo, Maynila.
Nauna rito, kinakadena ni Rolando ang mga troso sa truck subalit nakalas ito dahilan para madaganan ang dalawa.
Nakita naman ng manugang ang pangyayari kaya tinangka nitong iligtas ang biyenan subalit maging siya ay nadaganan na rin ng mga naglalaglagang troso.
Mabilis na isinugod ang dalawa sa hospital pero kapwa binawian ng buhay.