NAGKALASOG-LASOG ang katawan ng isang mag-asawa habang malubhang nasugatan ang dalawang magkaibigan nang sumalpok ang kanilang sinasakyang motorsiklo sa dalawa pang motor sa Naga City nitong Huwebes ng hatinggabi (Mayo 23).
Dead on the spot ang mag-asawang sina Gilbert Herras at ang misis nitong si Annaliza, na tatlong buwang buntis habang sugatan naman ang magkaangkas sa iba pang motorsiklo na sina Eddie Boy Baldonado at Carlos Jallores.
Natagpuan naman ang pangatlong sangkot na motorsiklo sa isang taniman ng saging may 70 metro ang layo mula sa lugar ng pinangyarihan pero hindi natagpuan ang nagmamamaneho nito.
Sa ulat, naganap ang insidente alas-12 nitong Huwebes ng hatinggabi sa national highway sa Barangay Pacol, Naga City.
Ayon sa nakasaksi, bago ang insidente ay parehong matutulin ang takbo ng tatlong motorsiklo nang pagsapit sa lugar at sa hindi malamang dahilan ay biglang nagsalpukan ang mga ito.
Tumanggi naman na magbigay ng pahayag sina Jallores at Baldonado na kapwa lango sa alak nang maganap ang insidente.
Sa pagsisiyasat ng mga pulis, nabatid na nakarehistro sa isang Emma Rosales ng Jose Panganiban, Camarines Norte ang motorsiklong nakuha sa sagingan.
Nagmula naman sa isang lamay ang mag-asawang Herras at pauwi na nang masangkot sa aksidente.