HINAHANTING na ng pulisya ang tatlong kalalakihan na kumatay sa isang pick-up girl na natagpuan ang bangkay sa gitna ng sagingan sa Upper Baluan, General Santos City nitong nakaraang Martes (Mayo 29).
Sinabi ni Police Inspector Reynaldo Rojo, hepe ng Lagao PNP, na hindi muna nila ibubunyag ang mga pangalan ng tatlong suspect alinsunod sa ikakasang hot- pursuit operation.
Ang tatlo aniyang nabanggit na suspect ang huling nakitang kasama ng biktimang si Judy Ann Tongal, 24-anyos residente ng Surallah, South Cotabato bago ito natagpuang patay nitong Martes ng gabi.
Isa sa mga suspect ang may dalang screw driver na siyang ipinangsaksak kay Tongal na pinaniniwalaang ginahasa rin.
Batay sa post mortem examination, ang bangkay ng biktima ay nagtamo ng 12 saksak sa iba’t ibang bahagi ng katawan.
Hinihintay naman ang resulta pa ng eksaminasyon kung ginahasa rin ang biktima bago tinarakan ng screw driver.
Nakilala naman ang biktima matapos nagtagpo sa punerarya ang ka-live-in ng biktima at isang lalaki na nagpakilala namang nobyo nito.