HINDI rin nakaligtas ang isang 35 anyos na lalaki na may kinakaharap na kaso matapos itong mamatay sa pukpok ng bato sa ulo sa Tondo, Maynila kagabi.
Namatay habang ginagamot sa Jose Reyes Memorial Medical Center ang biktimang si Alex Torres, binata, ng 2816 Danganan St., Gagalangin, Tondo sanhi ng pukpok ng bato sa ulo.
Sa report ni SPO3 Rodelio Lingcong ng Manila Police District (MPD)-homicide section, dakong 10:00 ng gabi nang natagpuang patay ang biktima sa harapan ng isang bahay sa kanto ng Pag-asa at Cunanan Sts., Gagalangin, Tondo.
Ayon kay Reggie Belen, 22, kaibigan ni Torres, nagpapahinga siya sa kanilang bahay nang ipaalam sa kanya ng isang di nagpakilalang lalaki na may duguang nakahandusay sa nasabing lugar.
Isinugod pa ni Reggie sa ospital ang kaibigan subalit hindi na ito umabot ng buhay.
Ayon kay Carolina Capiral, tiyahin ng biktima, tatlong araw pa lamang nakakalaya si Torres mula sa pagkakakulong sa Manila City Jail dahil sa kasong robbery.
Hinala ni Lingcong na posibleng niresbakan siya ng mga kaanak ng nagpakulong sa kanya nang naispatan itong nakalaya na at nakita pang gumagala malapit sa kanilang bahay.
Dagdag pa ni Lingcong, posibleng bato ang ipinukpok sa ulo ng biktima na sanhi ng kanyang kamatayan.
The post Lalaki pinukpok ng bato sa ulo, dedo appeared first on Remate.