TADTAD ng bala sa ibat ibang parte ng katawan at wala nang buhay ng madiskubre ng kanyang mga kasambahay ang 18 anyos na estudyante kaninang madaling araw sa Pasig City.
Kinilala ni Pasig City Chief of Police P/Sr. Supt. Mario Rariza ang biktima na si Ranilo Raymundo, 18 anyos, residente ng Hydenhower Bend St., Phase 10, Parkwood Village, Brgy. Maybunga ng nasabing lungsod.
Sa ulat, dakong alas-5:32 ng madaling araw nang madiskubre ang bangkay ng biktima sa loob ng kanyang kuwarto ng kanilang kasambahay na si Mirriam Moreno.
Nabatid na inutusan ng kanyang mga amo si Moreno na gisingin na ang biktima dahil sa papasok pa ito sa kanyang eskuwelahan subalit hindi sumasagot kahit na anong gawing pagkatok.
Dahil sa walang sumasagot ay puwersahang winasak ng mga kasambahay ang pintuan at dito nadiskubre ang bangkay ng biktima na nakabalot sa blanket.
Sa tulong ng mga security guard ng nasabing subdibisyon ay agad na naipaalam sa pulisya ang insidente at nagsagawa ng imbestigasyon.
Sa paunang imbestigasyon ay nadiskubre na nawawala ang tatlong cellphone, dalawang laptop at camera sa kuwarto ng biktima na pinaniniwalaang tinangay ng hindi nakilalang suspek.
The post Estudyante patay sa akyat bahay appeared first on Remate.