PATAY ang isang notoryus na mandurukot nang barilin ng di nakilalang suspek habang naglalakad sa tapat ng Manila City hall kaninang umaga.
Kinilala ang biktima na si Juanito Delfin, 40, tubong Pangasinan at residente ng Gate 13, Area B, Parola Compound, Tondo, Maynila, base sa kumpirmasyon ng kanyang live-in partner na si Lani Abad na dumating sa MPD headquarters.
Sa report ni PO3 Lester Evangelista ng MPD-Homicide Section, dakong alas 7:20 ng umaga nang mangyari ang pamamaril sa biktima sa may northbound ng Lagusnilad tapat lamang ng Manila City Hall habang ito ay naglalakad sa lugar.
Nabatid na armado ng .45 kalibre ng baril ang di nakilalang suspek na agad na tumakas patungo sa direksyon ng southbound ng Lagusnilad underpass bitbit ang kalibreng ginamit sa pagpaslang sa biktima.
Aminado naman si Abad na mandurukot nga ang kanyang mister. Gayunman, wala itong alam kung sino ang pumatay sa kanyang asawa maliban na lamang umano sa mga naging biktima nito.
Sa pagsusuri ng SOCO, nagtamo ang biktima ng maraming tama ng bala sa katawan.
Dinala sa St. Harold Funeral Morgue ang labi ng biktima para sa safekeeping at autopsy.
Patuloy naman ang isinasagawang imbestigasyon ng pulisya sa insidente.
The post Notoryus na mandurukot, itinumba appeared first on Remate.