SUGATAN ang tatlong estudyante matapos pagbabarilin ng hindi pa kilalang suspek na sakay ng motorsiklo habang ang mga una ay nasa tapat ng dormitory sa Valenzuela City Lunes ng gabi, Agosto 5.
Ginagamot sa Valenzuela General Hospital sanhi ng tama ng bala sa likod si Malky Malonzo, 16, habang sa kanang hita naman ang tama ni Rodel Julius Manansala, kapwa ng Camia St., Marulas ng nasabing lungsod.
Galos naman sa mga tuhod ang inabot ni Franz Bantaan, 23,-anyos matapos madapa sa pagtakbo sa nasabing lugar.
Base sa ulat, alas-7:30 ng gabi, nagkukuwentuhan ang mga biktima sa tapat ng dormitoryo nang dumating ang suspek sakay ng Yamaha Mio na walang plaka at sunod-sunod na pinaputukan ang mga una.
Nagtakbuhan sa loob ng dormitoryo ang mga biktima habang tumakas naman ang suspek.
Inaalam na ng mga pulis kung sino at ano ang motibo ng suspek.
The post 3 estudyante sugatan sa naka-motorsiklo appeared first on Remate.