KULONG ang isang babae matapos ipamigay ang bagong silang na sanggol sa Caloocan City.
Hindi na pinangalanan ang suspek na may edad 29 ng Barangay 74 ng lungsod.
Nabatid na kanina ay umuwi ang ka-live-in ng suspek at hinahanap ang kanilang bagong silang na sanggol subalit hindi na nakita dahil ipinaampon umano ng suspek.
Agad humingi ng tulong sa barangay tanod ang lalaki sa hinalang ibinenta ang sanggol na naging dahilan upang dakpin ang suspek at dalhin sa presinto.
Lumalabas na noong Hulyo 24, 2013, nanganak ang suspek sa bahay ng komadrona sa Maypajo ng lungsod subalit nang puntahan ay sinabi na kinuha ng mga kasama ng suspek ang sanggol.
Lalo pang nagalit ang ka-live-in ng suspek nang malaman na may ibang karelasyon ang babae na sinabing wala siyang ipanggagastos sa pagpapalaki ng sanggol dahil lingguhan kung umuwi sa kanya ang ka-live-in.
Inaalam na ng mga pulis kung kanino napunta ang sanggol habang nakatakdang sampahan ng kasong child trafficking ang suspek.
The post Bagong silang na sanggol ipinamigay sa Caloocan appeared first on Remate.