KALABOSO ang lalaking snatcher-holdaper makaraang magkasunod na mambiktima ng titser at estudyante sa Caloocan City, Huwebes ng hapon, Agosto 8.
Nakilala ang suspek na si Parminto Alutaya, 32, ng Sitio Matarik, Camarin ng lungsod.
Sa ulat, dakong 1 ng hapon, sakay ang titser na si Evelyn Tapit, 53, ng Fairview, Quezon City sa jitney at pagsapit sa Main Road ng Phase 1, Bagong Silang ng lungsod ay hinablot ng suspek ang ginagamit na cellphone ni Ma’am.
Mabilis na tumakbo papatakas ang suspek habang nagsisisigaw ang biktima na nakatawag ng pansin sa mga nagrorondang mga pulis.
Tumakbo ang suspek sa loob ng gate ng simbahan ng Iglesia ni Cristo kung saan nakita ang estudyanteng si Mark Joseph Cube, 19, ng Phase 1, Bagong Silang.
Sinakal ng suspek si Cube sabay tutok ng paltik, subalit bago makuha ang cellphone ng huli ay nagdatingan na ang mga pulis na humahabol.
Hindi na pumalag ang suspek nang arestuhin, sabay bitaw kay Cube, kung saan nabawi ang cellphone ni Ma’am.
The post Snatcher-holdaper magkasunod na nambiktima, kalaboso appeared first on Remate.