PATAY ang magka-live-in partner matapos ratratin ng bala ng mga hindi pa nakikilalang lalaki sa tapat ng kanilang bahay sa Sampaloc, Maynila kaninang madaling-araw.
Kinilala ni SPO3 Glenzor Vallejo, ng Manila Police District – Homicide Section, ang mga biktima na sina Winebaldo Serrano, 52, inhinyero ng Presidential Management staff sa Malacanang at Letecia Gundayao, 49, empleyado ng PLDT sa SM Centerpoint at pawang naninirahan sa 149 Prudencio St., Sampaloc, Maynila.
Ayon sa report na isinumite ni Vallejo, tinambangan ang mag-asawa sa tapat mismo ng kanilang bahay dakong alas-12:15 kaninang madaling-araw ng tatlong hindi pa nakikilalang mga suspek.
Isinugod sa Ospital ng Sampaloc si Serrano habang sa Lourdes Hospital naman si Gundayao na kapwa idineklarang dead-on-arrival dakong alas-12:45 ng umaga.
Lumabas sa inisyal na imbestigasyon ng MPD-Homicide Section na kararating lamang umano ng mga biktima mula sa pamamasyal nang bigla na lang nilapitan ng tatlong lalaki at agad pinaputukan ang mga biktima.
Agad naman tumakas ang mga suspek patungo sa Ramon Magsaysay Ave. tangay ang ginamit na baril sa pamamaslang.
Narekober sa pinangyarihan ng insidente ang tatlong basyo ng bala, isang slug at mga fragments ng kalibre .45 na baril.
Batay sa awtopsiya, nagtamo ng dalawang tama ng baril si Serrano, isa sa kanang dibdib at isa sa kaliwang braso habang ang kinakasama nito ay nagtamo ng tama sa kaliwang dibdib na siyang ikinamatay ng mga ito.
Tinitingnang posibleng anggulo sa pananambang ang trabaho ni Serrano sa pamahalaan. Hindi rin naman isinasantabi ng pulisya na posibleng motibo sa pagpatay ang mga nakagiriian ng mag-asawa sa kanilang lugar.
Patuloy pa rin ang ginagawang imbestigasyon ng pulisya upang matukoy ang pagkakakilanlan ng mga suspek at mabigyang-linaw ang motibo sa pagpatay.
The post Mag-asawa niratrat, tigbak appeared first on Remate.