NABAWI na ng awtoridad mula sa kamay ng Misuari faction ng Moro Liberation Natinal Front (MNLF) ang mag-asawang hinostage ng mahigit dalawang linggo na sa may Sta. Catalina sa Zamboanga City.
Kasama ring narekober kagabi (Setyembre 24) ang apat pa na hostages sa magkahiwalay na lugar na pareho ring hinawakan ng armadong grupo noong Setyembre 9 o sa unang araw pa lamang na pag-atake ng grupo sa lungsod.
Ayon kay Councilor VG Guingona, ang namumuno sa Hostage Processing Unit ng Crisis Management Committee (CMC), kasalukuyang naka-confine ngayon sa Ciudad Medical Zamboanga Hospital ang mag-asawang James West at ang misis nitong si Lucita West.
Kinilala rin ni Guingona ang apat pang mga bagong napalayang hostage na sina Jomel Baguio, Darren Atilano Ibanez, Princess Ni-An Comon at si Geraldine Francisco Mohammad.
Mababanaag na matamlay at payat na payat na ang mga biktima makalipas ang mahigit kalahating buwan na pananatili sa armadong grupo.
Dahil sa pagkakalaya nila, inaasahan ng awtoridad na iilan na lamang ang mga natitirang hostage na hawak ng mga rebelde at mababawi na rin nila ang mga ito sa lalong madaling panahon.
The post Mag-asawa, 4 pang hostage, nabawi sa MNLF appeared first on Remate.