PATAY na nang matagpuan sa loob ng kanilang sinasakyang barko ang tatlong crew ng fishing company sa karagatan ng Tapaan Island, Siasi sa Sulu, habang nawawala naman ang dalawa pa nilang kasamahan.
Sa ulat mula sa Sulu PNP, kinilala ang mga namatay na sina Van Gala, 51, ang boat skipper at residente ng Barangay Sangali, Zamboanga City; Joel Salig, 38, assistant skipper mula sa Barangay Gango, R.T. Lim, Zamboanga Sibugay at ang isa pang assistant mechanic ng barko na si Walter Cutad, 31, ng Dipolog City.
Kinilala naman ang dalawang nawawalang kasamahan na sina Jhon Descalzo, ang chief mechanic at ang nagsisilbing cook na kinilala lamang sa pangalang Bucoy.
Iniulat na rin ng Philippine Coast Guard na posibleng mga pirata ang pumatay sa mga biktima.
Nabatid na ang lima ay nakasakay sa isang tinatawag na light boat na kumakarga sa mga makina at mga ilaw na ginagamit ng fishing boat sa pangingisda na pagmamay-ari ng GMA Fishing Corporation na nakabase sa Zamboanga City.
Madaling-araw lamang nakita ang mga bangkay ng mga biktima pero paniwala ng awtoridad na kahapon pa nangyari ang insidente.
Sa pagsisiyasat ng mga awtoridad sa loob ng light boat, napag-alaman na nawawala ang mga mahahalagang gamit na pag-aari ng fishing company at ang mga personal na gamit ng mga bikitma tulad ng cellphone, pera at iba pa.
Isa sa mga motibo ng krimen na nakikita ngayon ng mga awtoridad ay ang pagnanakaw na ilang ulit na ring nangyari sa mga karagatan.
Mapapansin na maliban sa maraming mga tama ng bala ng matataas na kalibre ng baril sa iba’t ibang parte ng katawan ng tatlo, may taga ang mga ito.
Hindi pa masabi ngayon kung nasaan na ang dalawang nawawalang biktima dahil maaaring itinapon sila sa dagat matapos barilin o tinangay sila ng mga salarin.
May hinala naman ang Coast Guard na sa pagtalon ng mga mangingisda sa dagat ay saka sila tinadtad ng bala.
Ang bangkay ng tatlo ay dumating na rin sa Zamboanga City.
The post 3 mangingisda natagpuang patay sa Sulu sea appeared first on Remate.