NAHADLANGAN na maging abo ang 4-door apartment sa San Agustin, Novaliches, Quezon City kaninang umaga nang umepal ang K-9 dog at alarmahin ang residente na may sunog na nagaganap.
Sumiklab ang apoy alas-7:30 ng umaga sa ikatlong pinto ng apartment na inuupahan ni Shala Adarme na wala sa kanyang apartment nang maganap ang insidente.
Pero kaagad naagapan ang sunog nang alertuhin ng isang K-9 ang mga residente.
Bago ito, ipinapasyal ni Adarme ang kanyang asong si Debrah nang nagpumilit itong tumakbo palapit sa looban na patungo sa noo’y nasusunog na palang apartment.
Nagulat na lamang si Adarme nang makitang malaki na ang apoy sa kanyang apartment.
Sa panayam kay Rudolph Lu, pamangkin ng may-ari ng aso, itinuturing na bayani ang aso dahil sa ibinigay nitong senyas na may nagaganap na sunog sa kanilang lugar.
Hindi na itinaas ang alarma ng sunog dahil kaagad namang naapula ito dakong alas-8 ng umaga habang inaalam pa ang sanhi nito.
The post K-9 dog ‘bayani’ sa sunog sa QC appeared first on Remate.