INIIMBESTIGAHAN na ng Manila Police District ang pagkamatay ng tatlong lalaki na natagpuan sa loob ng isang tricycle malapit sa National Museum sa Maynila kaninang madaling-araw.
Sa inisyal na report, may mga tama ng bala sa katawan ang mga biktima na pawang sakay ng tricycle (HL 4036).
Kinilala ang mga biktima sa pangalang Michael Cabayo, Baby Mata at Toto.
Ayon sa pulisya, nakaparada ang nasabing tricycle sa Governor Center Drive at sa P. Burgos St. kung saan naroon ang bangkay ng tatlong biktima.
Sinabi ng saksing si Reynaldo Luba, natutulog siya sa lugar nang makarinig ng mga putok ng baril dakong alas-2:00 ng madaling-araw.
Napansin nito ang di nakilalang mga suspek na sakay ng motorsiklo.
Ayon pa kay Luba, namumukhaan niya ang tatlo na kuliglig driver sa Escolta, gayunman, nagtataka siya kung bakit nasa madilim na lugar sila noong mga oras na wala namang pasahero.
Nakuha sa pinangyarihan ng insidente ang 11 basyo ng bala ng kalibre .9mm at .45.
Patuloy naman ang isinasagawang imbestigasyon ng pulisya sa insidente at inaalam ang motibo sa pagpatay sa mga biktima.
The post 3 lalaki natagpuang patay sa Maynila appeared first on Remate.