BUMULAGTA sa sayawan ang isang barangay tanod nang barilin ng lalaking hindi niya pinayagan na makasayaw ang kanilang sekretarya sa Masbate nitong Lunes ng gabi, Pebrero 17.
Nagtamo ng tama ng bala sa dibdib at namatay noon din ang biktimang si Alex Balbuena, 36, ng Barangay Lahong, Baleno.
Hindi naman nabanggit sa ulat kung nahuli ang suspek na si Aldrin Balbuena, 35, o nakatakas ito. Hindi rin malaman kung magkapatid ang dalawa.
Naganap ang insidente alas-10:15 nitong Lunes ng gabi sa isang sayawan sa nasabing barangay.
Bago ito, nagdaraos ng isang sayawan sa lugar nang sawayin ng biktima ang suspek dahil nais niyang isayaw ang kanilang barangay secretary na si Rosie Cortez.
Sa yamot, sinuntok ng suspek ang biktima pero naawat din agad nang pumagitna ang ilan pang mga barangay tanod.
Nadismaya, umuwi na lang ang suspek pero lingid sa nakararami ay bumalik din ito sa lugar at binaril ang biktima.
The post Tanod tigbak sa sinaway na residente appeared first on Remate.