KRITIKAL ang isang ama nang barilin ng sariling anak makaraang mauwi sa sermon ang inuman nilang dalawa, Linggo ng gabi sa Malabon City.
Nakaratay at ginagamot sa Jose Reyes Memorial Medical Center (JRMMC) si Florencio Camino, 64, ng Block 4, Damata, Bgy. Tonsuya sanhi ng isang tama ng bala ng hindi nabatid na kalibre ng baril sa kaliwang balikat.
Agad namang inatasan ni Malabon police Chief, Sr. Supt. Severino Abad ang mga tauhan na hanapin ang suspek na si Ramel Camino, 44, anak ng una na tumakas matapos ang insidente.
Batay sa ulat, alas-7:00 ng gabi nang maganap ang insidente sa loob ng bahay ng mga ito sa nasabing barangay.
Nag-iinuman ang mag-ama hanggang sa magsermon na ang matanda dahil sa pagiging pabaya ng anak sa kanyang hanapbuhay na pagtitinda ng isda kaya napabayaan ang pamilya nito.
Palibhasa lasing ay nagalit ang suspek at pabalang na pinagsasagot ang matandang ama hanggang sa magbunot ito ng baril at malapitang pinutukan ang biktima.
Mabilis na tumakas ang suspek habang ang biktima ay isinugod sa pagamutan.
The post Matalak na tatay, binoga ng anak appeared first on Remate.