SWAK sa kulungan ang tatlong PDEA agent at isang sibilyan matapos madakip sa tangkang robbery at pangingikil sa isang sibilyan sa Quezon City kahapon ng tanghali, Hunyo 2, Lunes.
Kinilala ni Police Chief Superintendent Richard Albano ang mga nadakip na sina Intelligence Officers 1 Florian Rose Cada, Rufino Lumase, PDEA Administrative Officer II Danilo Superable, Jr., at isang sibilyan na si Jake Richard Consorte habang nakalalaya pa ang dalawang kasamahan ng mga ito.
Ayon kay Supt. Ariel Capocao, hepe ng QCPD station 3 Talipapa, kamakalawa ng tanghali dakong 12:30, habang abala si Lily Mae Lozada, 25, may ka-live-in, self-employed at residente ng Camachile Bridge ng Brgy. Unang Sigaw, QC sa paghahanda ng kanilang pananghalian.
Bigla na lamang pumasok at sinira ang pintuan ang anim na armadong kalalakihan sa kanilang bahay at nagpakilala umanong mga tauhan ng PDEA.
Kinuha umano ng mga suspek kay Lozada ang iba’t ibang gamit nito at P14,000 na cash habang nakaposas at dinala sa PDEA office sa NIA Road, Barangay Pinyahan, QC at humihingi umano ng halaga P200,000 para sa kalayaan nito.
Dalawa umano sa mga suspek ang pumasok sa PDEA office habang ang apat ay dinala si Lozada sa Pares Food House sa kahabaan ng Mindanao Avenue, Quezon City.
Lingid sa kaalaman ng mga suspek sinundan umano sila ng kapatid ni Lozada na si Menard Lozada at humingi ng police assistance mula sa QCPD station 3 Talipapa na nagresulta sa pagkakadakip ng mga suspek.
The post 3 PDEA agent, sibilyan timbog sa pangingikil appeared first on Remate.