TODAS ang babaeng may-ari ng isang hotel makaraang barilin ng dalawang armadong lalaki habang sugatan ang kanyang security guard sa Zamboanga City kaninang pasado alas-9:00 ng umaga.
Ayon kay C/Insp. Ariel Huesca, hepe ng Zamboanga City Public Safety Company (ZCPSC), nasa loob ng Hotel Salwa ang negosyanteng si Haja Karol Salwa Kaman na nasa Governor Camins nang umatake ang dalawang armadong lalaki.
Nagtamo ng grabeng tama ng bala sa katawan ang negosyante na naging sanhi ng kanyang pagkamatay habang ang security guard naman ay nasugatan sa bahagi ng kanyang balikat.
Wasak ang main door ng hotel dahil sa mga tama ng bala at nagkalat din ang mga basyo mula sa kalibre .45 pistol.
Nagawa pang makatakas ng mga suspek matapos ang pamamaril ngunit nahuli rin naman ng pulisya makalipas ang ilang minuto.
Kinilala naman ang mga ito na sina Ernesto Angeles Bello, Jr., at si Wilbert Villarial na residente rin ng lungsod.
Teorya ng awtoridad na puntirya talaga ng mga suspek ang nasawi.
Kasalukuyan pang nagsasagawa ng imbestigasyon upang mabatid ang motibo sa pamamaslang.
The post Hotel owner binoga, todas appeared first on Remate.