TATLONG katao ang malubhang nasugatan nang sumalpok ang kanilang sinasakyang sports utility van (SUV) sa mga punong nasa center island sa Quezon City kaninang madaling-araw, Hulyo 8.
Nagtamo ng matinding pinsala sa ulo at katawan ang isa sa mga biktimang nagngangalang Joey.
Isinugod ito kasama ang dalawa pa na hindi nakuha ang mga pangalan sa pinakamalapit na pagamutan.
Tumakas naman at ngayon ay pinaghahanap na ng awtoridad para panagutin sa insidente ang nagmamaneho ng Toyota Fortuner na kulay dark gray (ZDX-316).
Sa ulat, naganap ang insidente dakong 12:35 ng madaling-araw sa may Mindanao Avenue, sa Barangay Tandang Sora, Q.C.
Ayon kay Ronald dela Paz, barangay tanod sa lugar, mabilis ang takbo ng sasakyan at nagulat na lamang siya nang biglang tinumbok nito ang dalawang puno na nasa center island ng Mindanao Avenue.
Sa lakas ng pagkakasalpok, bumaliktad nang paulit-ulit ang SUV bago sumalampak sa gitna ng kalsada.
The post Puno ng center island sinuwag ng SUV, 3 kritikal appeared first on Remate.