SUGATAN ang tatlong miyembro ng pamilya kabilang ang isang sanggol nang barilin ng pusher na kapitbahay makaraang sitahin ng isa sa mga una ang pagtutulak ng huli sa Caloocan City, Linggo ng hapon, Hulyo 13.
Ginagamot sa Jose Rodriguez Memorial Hospital (JRMH) sina Elizalde Ramos, 37; Cresencia Galado, 30; at Angelo Sobrepeña, 1, pawang ng Phase 8B, Bagong Silang ng lungsod.
Pinaghahanap naman ng mga pulis si Michael Lindayan, alyas Lupin, ng Phase 8A, Bagong Silang ng lungsod.
Sa ulat, alas-3 ng madaling-araw, nasa tapat ng kanilang bahay ang mga biktima nang sumulpot ang suspek at putukan si Ramos.
Tinamaan sa katawan si Ramos at tumagos sa katawan bago tumama sa kanang braso ng sanggol at tumama sa likod ni Galado dahilan upang dalhin sa nasabing ospital habang tumakas naman ang suspek.
Nabatid na bago ang insidente ay nakasagutan ni Ramos ang suspek dahil sinita ng una ang pagtutulak ng shabu sa kanilang lugar ng huli.
Nang pumalag ang suspek ay naglabas ng screw driver si Ramos bago hinabol ng saksak ang una na nagawang makatakas at bumuwelta dala ang kalibre .45. RENE MANAHAN