ISA na namang Konsehal ng Batangas town ang inambus sa Lipa City kaninang tanghali, Hulyo 18.
Dead-on-the-spot sanhi ng tinamong tama ng bala sa ulo at katawan ang biktimang si Rodante Encallado, incumbent councilor ng Balete, Batangas.
Blangko pa ang awtoridad kung sino ang nasa likod ng pananambang pero isa sa sinisilip na motibo ay may kaugnayan sa politika.
Sa ulat, naganap ang insidente sa tapat ng isang motocycle shop sa may Barangay Marawoy, Lipa City, Batangas.
Bago ito, pumunta sa nabanggit na lugar ang biktima para bumili ng piyesa ng kanyang motorsiklo.
Pero habang kausap nito ang tindera ng naturang motorcycle shop, dalawang armadong kalalakihan ang biglang lumapit at pinagbabaril ang biktima.
Nang makatiyak na napuruhan ang target, mabilis na sumakay ang mga suspek sa isang motorsiklo na nakaparada ilang metro lamang ang layo sa motorcycle shop.
Maalalang ilang konsehal ng Batangas town ang inambus nitong nakalipas na tatlong buwan pero hanggang ngayon ay wala pa ni isang nalulutas. Robert C. Ticzon