LABING-ISANG preso ng Mandaluyong Police detention cell ang nakatakas kaninang madaling-araw, Hulyo 21.
Ani Mandaluyong City Police Chief Senior Superintendent Tyrone Masigon, sinira ng mga preso ang rehas bandang 1 a.m. hanggang 3 a.m.
Winasak din ng mga preso ang kandado ng pintuan ng kulungan para tuluyang makatakas.
Ani Masigon, nadiskubre na lamang ng mga jail guard ang insidente nang nang nagroronda na sila.
Pawang may mga kasong robbery, illegal drugs at theft ang mga nakapuga.
Nahuli naman sa isinagawang follow-up operations sa Welfareville Compound ang isa sa mga preso na kinilalang si Gabby Capistrano.
Mayroon pang 10 kabilang ang itinuturong promotor sa pagtakas na si Djordan Villadolid.
Tatlong araw umanong nilagari ng mga preso ang kanilang rehas na sinabayan ng pagbuhos ng tubig upang walang makarinig.
Walo umano ang hindi sana sasama sa pagtakas, pero ginising at tinakot umanong bubugbugin ng grupo ni Villadolid kung hindi sasama sa kanila.
Samantala, sinibak na sa pwesto ang limang jail guard kasama ang superior nito na naka-duty nang mangyari ang pagtakas ng mga preso.
Dahil dito, hinigpitan na agad ang sistema sa mga dalaw sa bilangguan para hindi na maulit ang pagpuga ng mga preso. Robert C. Ticzon