MALAKI ang hinalang may kaugnayan sa bawal na gamot ang naganap na pamamaril sa isang ex-convict matapos barilin ng riding in tandem sa Port Area, Manila, kagabi.
Kinilala ang biktimang si Cosain Disomimba, 28 anyos , Muslim ng 12 St., Port Area, Manila, na namatay noon din sa pinangyarihan ng krimen.
Samantala, malalimang imbestigasyon ang isinasagawa ng mga tauhan ng Manila Police District, habang patuloy ang paghahanap ng testigo para sa ikalulutas ng kaso.
Batay sa ulat na isinumiti ni Det. Julito Malindog kay P/Insp. Steve Casimiro, hepe ng MPD-Crime Against Persons Investigation (homicide )section, dakong 7:00 ng gabi nang maganap ang pamamaril sa biktma sa panulukan ng 17th Street at 13th Street,sa Port Area.
Bago ang insidente, sinundo umano ang biktima ng mga suspek sa kanilang bahay at pinasakay ito sa motorsiklo.
Pagsapit sa nasabing lugar, pinababa umano si Disomimba , saka ito pinagbabaril, at siniguro itong patay bago iniwang nakahandusay.
Lumitaw sa rekord ng pulisya, nakulong umano ang biktima dahil sa droga at ng makalaya naharap na ito sa panghoholdap sa di-kalayuan sa kanilang lugar.
Gayunman, dahil sa tradisyon ng mga kapatirang muslim, hindi na pina-awtopsiya ang bangkay at dinala na ito sa Mosque para sa isang gabing lamay