PANUNUTOK ng baril ang ginawang pagpapakilala ng isang bagitong pulis sa isang kahera sa Caloocan City Sabado ng madaling araw.
Nahaharap sa kasong grave threat at paglabag sa Omnibus Election Code si PO1 Reynaldo Fortalisa, 30, nakatalaga sa Manila Police District at residente ng P. Zamora st., ng lungsod.
Sa pahayag ng biktimang si Maricar Mallari, 29, ng Doña Consuelo st., kahera sa Off Track Betting Station dakong alas-12:10 ng madaling araw, naglalakad siya papauwi sa lugar nang madaanan si Fortalisa na lasing na nakaupo sa motorsiklo.
Tinanong ng suspek ang biktima kung kilala siya na sinagot naman ng hindi ni Mallari.
Napikon ang suspek sabay bunot ng kalibre .45 at tinutok sa kahera sabay sabing “O ngayon, Gusto mo pa ako makilala” na naging dahilan upang awatin ng hindi pa kilalang lalaki.
Nang makaalis ang biktima ay nagsumbong sa mga pulis at nang respondehan ay inabutan ang suspek na nakasukbit ang kalibre .45 na naging dahilan upang arestuhin at dalhin sa presinto.