NAMATAY ang apat na buwang sanggol makaraan umanong madaganan ng kanyang ama habang sila ay natutulog sa Barangay Caaoacan, Laoag City, Miyerkules ng umaga.
Ayon sa salaysay ni Barangay Chairman Aurelio Arcano, lasing ang ama ng biktima na si Antonio Mateo na katabi nitong matulog at hindi namalayang nadaganan na ang sanggol.
Kinondena naman ng mga kamag-anak ang ina ng sanggol na si Rely dahil hinayaang tumabi sa biktima ang lasing na ama.
Pinabulaanan naman ng mga magulang ng sanggol na sa dagan ng ama kung kaya namatay ang kanilang anak.
Gayunman, inamin ni Antonio na nasa gitna nilang mag-asawa ang kanilang anak nang sila ay natulog kagabi.
Inamin din niya na nakainom siya ng alak ngunit hindi lasing.
Nabatid kay Rely na nagulat na lamang sila ng kanyang asawa nang makita ang anak kaninang madaling araw na nangingitim na.