MULING binalaan ng Movie Television Review and Classification Board o MTRCB ang lahat ng buses na bibiyahe sa mga probinsiya ngayong Semana Santa laban sa pagpapalabas ng malalaswa at mararahas na panoorin sa kanilang telebisyon.
Ayon sa MTRCB ang pinapayagan lamang nilang ipalabas sa mga buses ay iyong mag panoorin na may “G” (General patronage) rating.
Dahil dito bibisitahin ni MTRCB head Eugenio Villareal at ng kanyang grupo ang mga bus terminals sa lungsod Quezon upang makasiguro na sumusunod sa ipinaiiral na alituntunin ng ahensiya ang mga buses na may videos sa loob ng kanilang mga sasakyan.
Sinabi pa ni Villareal na nagkaroon na ng kasunduan sa pagitan ng MTRCB at Land Transportation Franchising and Regulatory Board noong 2011 na iyon lamang mga videos na may “G” ang maaring panoorin ng mga pasahero.
Dahil dito , magpapaskel, aniya, ang grupo ng MTRCB sa mga bus terminals ng “public advisory” tarpaulins para mapaalalahanan ang publiko tungkol sa videos na ipapalabas.
Simula noong Sabado umabot na sa 504 ang bilang ng mga buses ang nabigyan ng special permits para makabiyahe sa ibat-ibang probinsiya ngayong mahal na araw.
Inaasahan ang pagdagsa ng mga biyahero sa mga probinsiya sa susunod na mga araw para makasama sa pagbabakasyon ang kanilang mga pamilya.