NAGING madugo ang ikinakasang pabasa sa Quezon City nang barilin ng riding-in-tandem ang isang lalaking may suot na mamahaling alahas sa katawan nitong umaga ng Huwebes Santo.
Isinugod sa St Luke’s Hospital sanhi ng isang tama ng bala sa katawan ang biktima na si Ramon Mallari Jr. residente ng Barangay Masambong, Q.C.
Kasama sa pagtakas ng dalawang hindi nakikilalang armadong suspect ang gintong kuwintas ng biktima na nagkakahalaga ng P100,000.
Sa ulat, naganap agn insidente dakong alas 8 ng umaga nitong nakaraang Huwebes Santo ilang metro lamang ang layo sa bahay ng biktima.
Bago ito, papunta ang biktima sa isang pabasa ng kanilang kapitbahay nang biglang sumulpot sa kanyang likuran ang isa sa mga suspect at binaril si Mallari Jr.
Pagbagsak sa kalsada, hinablot agad ng suspect ang naksabit na kuwintas ng biktiman at mabilis na sumakay sa motorsiklo ng kanyang kasamahan.
Hinala ng Quezon City Police District (QCPD) na matagal nang minamatyagan ng mga suspect ang biktima sa paglabas sa kanyang bahay dahil lagi nitong suot ang kanyang mamahaling alahas.
Kilalang matulungin sa kanyang kapitbahay si Mallari Jr.