NILALAPATAN ng lunas sa pagamutan ang 11 sakay ng isang wild truck o 4×4 pick up sa Camarines Norte matapos na mawalan ng kontrol ang kanilang
sinasakyan at mahulog sa sapa.
Batay sa ulat na ipinaabot ng Camarines Norte Police Provincial Office
(CNPPO), minamaneho ng isang Godofredo Callejo y Manlogon, 43, ng
Patnanongan, Quezon ang nasabing sasakyan nang mawalan ng preno
matapos na magkaproblema sa makina sa bahagi ng Maharlika Highway sa
Barangay Alayao, bayan ng Capalonga.
Dahil dito, nahulog sa sapa sa gilid ng kalsada ang sasakyan na
ikinasugat ng 10 pasahero at ni Callejo.
Kabilang na rito ang limang menor de edad na ang tatlo ay may edad
hanggang 14-anyos.
Agad namang nadala sa ospital ang mga ito para bigyan ng lunas matapos
magtamo ng pasa at gasgas sa kanilang katawan.
Nabatid na galing Paracale ang mga biktima.
Sa ngayon, patuloy ang imbestigasyon ng PNP Capalonga at inaalam pa
ang kabuuang pinsala na iniwan ng aksidente.