TIGBAK ang isang driver ng school service matapos pagbabarilin ng riding in-tandem habang naglilinis ng kanyang sasakyan sa Quezon City kaninang umaga Abril 3, 2013 (Miyerkules).
Kinilala ang biktima na si Rodrigo Diaz, 57, may-asawa, ng 30-B Sta Catalina Street, Brgy. Holy Spirit, QC na namatay noon din dahil sa tinamong walong tama ng bala ng baril sa kanyang katawan.
Ayon kay SPO1 Alden Lasam ng Quezon City Police District station 6 Batasan, naganap ang insidente dakong 11:25 ng umaga kanina sa no.29 Sta Catalina St.,Brgy. Holy Spirit sa tapat ng Creative Learning School.
Sinabi ni Lasam na kasalukuyan naglilinis ng kanyang sasakyan ang biktima nang biglang dumating ang dalawang suspek sakay ng isang motorsiklo na pawang naka helmet at agad pinagbabaril ang nasawi.
Matapos ang pamamaril iniwan ng mga suspek ang duguang biktima na ikinasawi ng huli.
Iniaalis naman ng mga pulis ang anggulong holdap ang dahilan ng pamamaril dahil wala naman nawala sa gamit ng biktima.
Nagsasagawa na ng follow-up operation ang mga awtoridad sa mga tumakas na suspek.