DEAD ON ARRIVAL sa Ospital ng Muntinlupa ang biktimang si John Mathew Raela, ng 75 Bunyi Compound Barangay Cupang, sanhi ng isang tama ng hindi pa batid na kalibre ng baril sa kaliwang bahagi ng dibdib.
Habang arestado naman sa isinagawang follow-up operation ang isang Louie Alcala, nasa hustong gulang, sangkot sa krimen.
Ayon sa ulat, naglalakad ang biktima, kasama ang dalawang kaibigan na sina Erwin Arbolado at Froilan Barrientos sa Bunyi Compound alas-4:00 ng madaling-araw nang biglang lumapit si Alcala at sinapak sa bibig si Barrientos.
Matapos ang pa-traydor na pananapak, nagtatakbo si Alcala kaya’t hinabol siya ng magkakaibigan subalit isang kulay pulang kotse na walang plaka ang biglang dumating at pinasakay ang suspek sa sasakyan.
Matapos sumakay si Alcala, biglang may nagpaputok ng baril mula sa sinakyan nitong pulang kotse hanggang duguan na lamang bumulagta si Raela.
Patuloy na inaalam ng awtoridad kung ano ang motibo ni Alcala sa pananapak sa kaibigan ng biktima at kung sino ang mga nakasakay sa kotse na nagpaputok ng baril.
Nakatakda namang sampahan ng kasong physical injuries at homicide si Alcala sa Muntinlupa Prosecutor’s Office habang nakakulong.