HINDI na umabot sa Gov. Roque Ablan Sr Memorial Hospital ang isang pastor ng Church of Christ at provincial coordinator ng 1st Kabagis Partylist makaraang barilin ng dalawang ‘di nakilalang suspek sa Brgy. 9, Lungsod ng Laoag kaninang umaga.
Pasado alas-8:00 ng umaga nang barilin ang biktimang si Pastor Macario Campañano, 40, may asawa, tubong Brgy. Tagipuro, Bangui, Ilocos Norte, kasalukuyang nanunuluyan sa isang apartment sa Brgy. 9, nasabing lungsod.
Binaril ng dalawang suspek ang pastor habang nakikipag-usap ito sa kapwa niya pastor mula sa Sta. Maria, Ilocos Sur kasama ang asawa nito.
Tumama ang bala ng kalibre .45 sa panga ng biktima na tumagos sa kanyang batok at lumabas sa kanyang tainga.
Ayon sa salaysay ng asawa ng biktima na si Gng. Mina Campañano, wala silang alam na dahilan upang gawan ng masama ang kanyang asawa.