DEAD on the spot ang isang matansero makaraang ratratin sa harap ng bahay nito Quezon City, Biyernes ng hapon.
Kinilala ang biktima na si Julius Francis Cabales, 38-anyos, at taga-Kasunduan St., Barangay Commonwealth, QC.
Sa ulat ni SPO1 Restituto Zaldariaga ng Quezon City Police District-Criminal Investigation and Detection Unit, naganap ang insidente dakong 3:30 ng hapon sa harapan ng bahay biktima sa nasabing lugar.
Ayon sa saksing si Elena Cabales, sister in-law ng biktima, huli niyang nakita ang biktima na kumain ng pananghalian bago lumabas ng kanilang bahay at umistambay sa lugar.
Ilang saglit lamang ay dalawang motorsiklo umano ang nakita niyang pumarada sa harapan ng biktima at isa sa nakaaangkas ang bumunot ng baril at pinaputukan ang biktima sa ulo at ibang bahagi ng katawan.
Matapos ang pamamaril, tumakas ang mga suspek sakay ng dalawang motorsiklo.