TINUTUGIS na ng mga awtoridad ang isang dating family driver na pumatay sa kanyang dating amo at nakasugat sa dalawang iba pa nitong nakalipas na Huwebes ng madaling araw sa Quezon City.
Ito’y matapos mamatay ang ginang na si Cindy Nakayama, 49 anyos, bandang 6:45 ng gabi noong Biyernes sanhi ng tinamong tama ng bala ng “sumpak” sa kanyang ulo matapos operahan sa New Era hospital.
Nakaligtas naman ang kanyang 15 anyos na anak na si Christene at pinsang si Elvira Umbas,59 anyos, na kapwa nagtamo ng mga saksak sa katawan at inoobserbahan sa ospital.
Bunsod nito, iniutos na ni Quezon City Police District Director Senior Supt. Richard Albano kay Supt. Michael Macapagal, hepe ng QCPD Station 3 TAlipapa ang pagtugis sa tumakas na salarin na si Mark Andrew Dalde, 20 anyos, dating stay in driver sa mga Nakayama sa Union Village, Brgy. Culiat.
Naniniwala ang kaanak ng biktima na matinding galit umano ang nag-udyok sa suspek upang patayin ang dating amo kasama ang dalawang hindi pa nakikilalang suspek dahil madalas umanong magtalo ang dalawa (biktima at suspek) noon.
Ayon sa mga pulis ang masaklap ay walang record ang mga Nakayama sa pagkatao ng tumakas na suspek dahil inirekomenda lamang ito ng isang kakilala may anim na buwan na ang nakalilipas.
Wala rin umanong nakuhang ID o drivers license o ano mang pagkakakilanlan ng nasabing driver makaraang halughugin ang kanyang mga kagamitan.
Tanging ang kuha lamang sa CCTVs ang nagpatibay na kasama ang suspek ng dalawang iba pa na pumasok sa bahay ng mga biktima nang mangyari ang pamamaril.