MATAPOS mabalitaan na nagtanan ang kapatid na dalaga na siyang bumubuhay sa pamilya sa probinsya, minarapat ng nakakatandang kapatid nito na lalaking operator ng photocopy na magbigti sa Quezon City kaninang madaling araw Abril 18, 2013 (Huwebes).
Kinilala ng pulisya ang biktima na si Roldan Alboro, 25, naninirahan sa Barangay South Triangle, Quezon City.
Ayon sa ulat ng Quezon City Police District Criminal Investigation and Detection Unit (QCPD-CIDU) naganap ang insidente 4:30 ng umaga kanina. Hindi na naisugod ng mga kasamahan sa pagamutan si Alboro matapos makitang wala ng buhay na nakabigti sa banyo ng pinapasukan na kumpanya sa Scout Borromeo gamit ang isang nylon cord na ipinulupot sa kanyang leeg.
Nabatid sa report ni SPO1 Joel Gagasa, imbestigador, hinihinalang problema sa pamilya ang posibleng dahilan ng pagpapatiwakal ng biktima matapos mabalitaan na nag–asawa ng maaga ang nakababatang kapatid nitong babae na nasa Bogo, Cebu.
Napag-alaman sa pamangkin ng biktima na si Farrah Estomata, si Roldan lang kasi at ang kapatid nitong babae ang inaasahan ng kanilang pamilya na naiwan nila sa probinsiya na naghahanap buhay para sa araw-araw nilang pangangailangan.
Isinailalim sa awtopsiya ang bangkay ng biktima para malaman kung may foul–play sa pagkamatay nito.