HINDI pa rin narerekober ang apat na katao na natabunan ng gumuhong bundok ng basura sa Rodriguez landfill sa Barangay San Isidro, Rodriguez, Rizal kagabi.
Nakilala ang mga biktima na si Gary Balahibo, operator ng backhoe at tatlong trabahador kabilang ang magtiyuhing sina Pablito, Esto at Egoy Olog.
Nabatid na nililinis ng magtitiyuhin ang manhole sa ibaba ng tambakan nang mangyari ang pagguho.
Bandang alas-7:00 kagabi hinarangan na ng mga kaanak ng magtiyuhin ang daan papasok sa landfill para huwag nang tapunan pang muli ng basura.
Nabatid pa sa mga kaanak ng mga biktima na tinatayang katumbas ng tatlong poste ng kuryente o higit 100 metrong taas ng basura ang gumuho.
Posibleng umabot pa sa isa o dalawang araw ang paghahanap sa mga biktima.