AGAD na nasawi ang isang lalaki makaraang barilin ng hindi pa kilalang salarin sa Brgy. San Marcelino, Dingras, Ilocos Norte.
Nakilala ang biktima na si Romulo Ballesteros, ng Brgy. Barong sa nasabing bayan habang nagtamo ng stray bullet ang kanyang live-in partner na si Elisa Mamuad, residente rin sa nasabing lugar.
Nabatid na nagtungo ang mag-live-in sa Brgy. San Marcelino upang mamanhikan para sa anak ng kumpare ng biktima.
Nagkaroon ng inuman sa magkabilang partido ng nobyo at nobya nang bigla na lamang nakarinig ang mga ito ng putok kung saan tinamaan si Ballesteros sa kanyang likod at dumiritso ang bala sa kanyang bunganga.
Nakita umano ng ilang testigo ang suspek ngunit hindi namukhaan dahil nakabonet.
Patuloy na nagsasagawa ng imbestigasyon ang pulisya.